Vaibhav Sooryavanshi India Debut Postponed : भारत आणि आयर्लंड यांच्यातील पहिल्या टी-२० सामन्याची उत्सुकता शिगेला पोहोचली असतानाच, भारतीय क्रिकेट चाहत्यांसाठी एक अत्यंत निराशाजनक बातमी समोर आली आहे. आयपीएल २०२६ चा हंगाम गाजवून थेट ऑरेंज कॅप पटकावणारा १५ वर्षांचा वंडर बॉय वैभव सूर्यवंशी या सामन्यात आंतरराष्ट्रीय पदार्पण करत नाहीये. संपूर्ण क्रिकेट विश्वाचे लक्ष वैभवच्या पदार्पणाकडे लागून राहिले होते, मात्र कर्णधार श्रेयस अय्यरने टॉसच्या वेळी घोषणा केली की, वैभवला सध्या अंतिम अकरा खेळाडूंमध्ये स्थान मिळालेले नाही.

वैभवला का मिळाली नाही संधी? कॅप्टन अय्यरचे स्पष्टीकरण –

नाणेफेकीच्या वेळी जेव्हा श्रेयस अय्यरला वैभव सूर्यवंशीच्या पदार्पणाबाबत विचारण्यात आले, तेव्हा तो म्हणाला, “दुर्दैवाने, वैभव आज खेळत नाहीये. तो एक कमालीचा आणि प्रतिभावान खेळाडू आहे यात शंका नाही, परंतु आमच्याकडे असे काही सर्वोत्तम खेळाडू आहेत ज्यांनी आधीच भारतासाठी सातत्याने चांगली कामगिरी केली आहे. त्यामुळे आम्ही सध्या त्यांच्या अनुभवावर विश्वास दाखवत आहोत. योग्य वेळ आल्यावर वैभवलाही नक्कीच संधी दिली जाईल.”

टी-२० वर्ल्ड कपच्या टॉप-३ मध्ये कोणताही बदल नाही –

कर्णधार श्रेयस अय्यरने नाणेफेक जिंकून प्रथम गोलंदाजी करण्याचा निर्णय घेतला. नुकत्याच पार पडलेल्या टी-२० विश्वचषक २०२६ च्या अंतिम सामन्यात ज्या खेळाडूंनी धुमाकूळ घातला होता, त्यांनाच संघात प्राधान्य देण्यात आले आहे. भारताकडून अभिषेक शर्मा आणि संजू सॅमसन हे दोघेच ओपनिंग (सलामी) करत आहेत. संजू हा टी-२० विश्वचषकात ‘प्लेअर ऑफ द टूर्नामेंट’ ठरला होता. तिसऱ्या क्रमांकावर इशान किशन असून, त्याने विश्वचषकात ३०० हून अधिक धावा कुटल्या होत्या.

हेही वाचा – Venezuela Earthquake 2026 : मैदानात प्रतिस्पर्ध्यांना धूळ चारणारा खेळाडू एका रात्रीत झाला पोरका! व्हेनेझुएलातील भूकंपाने हिरावला संसार

माजी कर्णधार सूर्यकुमार यादवच्या जागी चौथ्या क्रमांकावर स्वतः श्रेयस अय्यर कर्णधाराच्या भूमिकेत खेळत आहे. याशिवाय, विश्वचषकाची फायनल खेळणारे शिवम दुबे, अक्षर पटेल, तिलक वर्मा आणि अर्शदीप सिंग हेदेखील संघात आहेत. दुखापतीतून सावरून वेगवान गोलंदाज हर्षित राणाचे पुनरागमन झाले आहे, तर प्रसिद्ध कृष्णा २०२३ नंतर पहिल्यांदाच टी-२० जर्सीमध्ये मैदानात उतरला आहे. वॉशिंग्टन सुंदर हा दुसऱ्या फिरकीपटूची आणि अष्टपैलूची भूमिका बजावत आहे.