विश्रांतवाडी- विधानसभा निवडणुकीच्या प्रचाराची रणधुमाळी आज (दि.१८) संपली. प्रचारात सर्वच उमेदवारांनी एकमेकांवर आरोप-प्रत्यारोप केले. वडगावशेरी मतदारसंघात अनेक बड्या नेत्यांच्या सभा झाल्या. त्यामुळे कार्यकर्त्यांमध्ये उत्साह निर्माण होऊन जोरदार प्रचार केला.

या दरम्यानच्या काळात महायुतीच्या उमेदवाराचा प्रचार करताना भाजपचे माजी नगरसेवक अनिल (बॉबी) टिंगरे दिसले नाहीत. केवळ प्रचाराच्या शुभारंभाचा नारळ फोडताना धानोरीगावात दिसले होते. त्यानंतर ते प्रचारातून गायब झाले आहेत, अशी परिसरात चर्चा आहे.

अनिल टिंगरे प्रत्येक निवडणुकीत त्यांच्या कार्यालयातून स्वतंत्र यंत्रणा राबवत होते. निवडणूक काळात त्यांच्या कार्यालयात नागरिकांची वर्दळ असायची. टिंगरे यांनी आजवर झालेल्या वेगवेगळ्या निवडणुकीत त्यांचे वर्चस्व असलेल्या टिंगरेनगर, धानोरी, कळस, विश्रांतवाडी भागातून प्रत्येक उमेदवाराला मताधिक्य मिळवून दिले आहे.

मात्र या निवडणुकीत त्यांच्या कार्यालयात शांतता पहायला मिळाली. त्यांचे सर्व प्रमुख कार्यकर्तेही प्रचारापासून दूर असल्याचे पहायला मिळाले. त्यामुळे सर्वत्र उलटसुलट चर्चा सुरू आहे.

वडगावशेरी मतदारसंघातील भाजपच्या प्रमुख पदाधिकाऱ्यांशी संवाद साधण्यासाठी आमदार पंकजा मुंडे यांच्या उपस्थितीत सप्टेंबर (दि.४) महिन्यात बैठक आयोजित केली होती. त्यावेळी उपस्थितांसमोर जाहीरपणे बोलताना टिंगरे म्हणाले होते की, लोकसभा निवडणुकीत महायुतीच्या घटक पक्षातील लोकप्रतिनिधी यांनी युती धर्म पाळला नाही. भाजपच्या उमेदवाराचा प्रचार न करता विरोधी पक्षाच्या उमेदवाराला मदत होईल असेच काम केले. त्यांनी प्रामाणिक काम केले असते तर भाजपच्या उमेदवाराचे मताधिक्य आणखीन वाढले असते, अशी तक्रार अनिल टिंगरे यांच्यासह अनेक पदाधिकाऱ्यांनी आमदार मुंडे यांच्याकडे केली होती.

त्यांनी सर्वांसमोर त्या लोकप्रतिनिधीबाबत जाहीर नाराजी व्यक्त केली होती. विधानसभा निवडणुकीत घटक पक्षाच्या लोकप्रतिनिधीला पुन्हा उमेदवारी मिळाल्यास त्यांचा प्रचार करणार नाही, असेही ते म्हणाले होते. लोकसभेच्या निवडणुकीतील नाराजीमुळे प्रचारापासून दूर राहिले नाहीत ना? अशी देखील चर्चा परिसरात सुरू आहे.

टिंगरे यांनी २०१२ ते २०२२ या दरम्यान सलग दोनदा निवडून येत महापालिकेत प्रभाग क्रमांक एकचे नेतृत्व केले आहे. त्यांच्या कार्यकाळात त्यांनी प्रभागामध्ये अनेक महत्त्वाकांक्षी प्रकल्प उभारले आहेत. त्याच बरोबर प्रभागाचा सर्वांगीण विकास करण्याचा प्रयत्न केला आहे. त्यामुळे त्यांची प्रभागातील जनसामान्यांमध्ये “काम करणारा माणूस” अशी प्रतिमा आहे. लोहगाव, नागपूर चाळ, येरवडा परीसरातही त्यांचा दांडगा संपर्क असल्याने त्यांचे समर्थकही मोठ्या संख्येने आहेत. त्यामुळे टिंगरे यांच्या प्रचारापासून दूर राहण्याचा कोणाला नुकसान होणार अन कोणाला फायदा होणार हे निवडणूक निकालानंतरच स्पष्ट होईल.

महायुतीचेच काम करतोय – अनिल टिंगरे

प्रचारापासून दूर राहण्याच्या कारणाबाबत अनिल टिंगरे यांना संपर्क साधून विचारणा केली असता, ते म्हणाले की, ‘मी महायुतीच्या घटक पक्षाचा नगरसेवक आहे. त्यामुळे मी पक्ष नेतृत्वाच्या आदेशाचे पालन करून महायुतीचेच काम करत आहे.’