पिंपरी – शहरातील बांधकामांसाठी प्रक्रिया केलेले (ट्रीटेड) पाणी वापरणे बंधनकारक करण्यात येणार असून, नवीन बांधकाम परवानगी घेतल्यानंतरही याच पाण्याचा वापर करावा लागणार आहे. बांधकामांना पिण्याचे पाणी पुरवले जाणार नाही.

टँकरद्वारेही अशा बांधकामांना पाणीपुरवठा होऊ नये, यासाठी महापालिका कठोर भूमिका घेणार आहे. नियमांचे उल्लंघन होत आहे का, हे तपासण्यासाठी बांधकामांच्या ठिकाणी अचानक भेटी देण्यात येणार असल्याची माहिती आयुक्त डॉ. विजय सूर्यवंशी यांनी बुधवारी (दि. २८) दिली.

शहरातील पिण्याच्या पाण्यावरील वाढता ताण लक्षात घेऊन बांधकामांसाठी प्रक्रिया केलेल्या पाण्याचा वापर करण्यावर महापालिका भर देणार आहे. बांधकाम व्यावसायिकांना प्रक्रिया केलेले पाणी (ट्रीटेड वॉटर) वापरण्याच्या सूचना देण्यात आल्या आहेत. नवीन बांधकाम परवानगी मिळाली तरी या नियमातून सूट मिळणार नाही.

बांधकामस्थळी प्रत्यक्ष तपासणी करून नियमांचे पालन होते की नाही, हे पाहिले जाणार आहे. नियमांचे उल्लंघन आढळल्यास संबंधितांवर कारवाई करण्यात येईल, असे आयुक्तांनी स्पष्ट केले.

तसेच, बांधकाम साईटवर टँकरने देखील पाणीपुरवठा बंद करण्यात येणार आहे. कारण टँकरमधून पिण्याच्या पाण्याचा पुरवठा होण्याची शक्यता आहे. त्यामुळे बांधकाम व्यावसायिकांना प्रक्रिया केलेले पाणीच वापरणे बंधनकारक असणार आहे.

त्यासोबतच भामा आसखेडचे पाणी जानेवारी अखेर येईल यादृष्टीने नियोजन करण्यात आले आहे. ते पाणी आल्यानंतर काहीसा दिलासा मिळेल अशी अपेक्षा आयुक्त सूर्यवंशी यांनी व्यक्त केली.

शेतकऱ्यांना विश्‍वासात घेतल्याशिवाय काहीही नाही
पवना बंद जलवाहिनीच्या प्रकल्पासाठी जिल्हाधिकारी कार्यालयात बैठक झाली आहे. शेतकऱ्यांशी देखील संवाद साधत आहे. पुढे २०५१ पर्यंतच्या पाण्याचे मोजमाप करून जेवढे पाणी उरेल तेवढेच पाणी आम्हाला द्या अशी मागणी शेतकऱ्यांकडे केली आहे.

अंतिम निर्णय घेण्यासाठी मुख्यमंत्री यांच्याकडे बैठक होईल. मात्र, मावळमधील शेतकऱ्यांना विश्‍वासात घेतल्याशिवाय प्रकल्पाचे कोणतेही काम करणार नसल्याचे देखील आयुक्तांनी स्पष्ट केले.

Nevasa : अहिल्यानगर जिल्ह्यात दुष्काळाचे सावट गडद! चौदा तालुके दुष्काळग्रस्त