Pimpri Chinchwad: परंपरा जपूया, पर्यावरण वाचवूया! कुंडातच गणेशमूर्तींचे विसर्जन करण्याचे आयुक्तांचे आवाहन
Pimpri Chinchwad: गणेशमूर्ती विसर्जनासाठी कृत्रिम हौद, कृत्रिम जलकुंड आणि विसर्जन कुंडांची व्यवस्था
पिंपरी – गणेशोत्सवाच्या उत्साहात शहराची स्वच्छता आणि पर्यावरणाचे संरक्षणही तितकेच महत्त्वाचे आहे. जलस्रोतांचे प्रदूषण टाळण्यासाठी नागरिकांनी गणेशमूर्तींचे विसर्जन नदी, नाला किंवा तलावात न करता महापालिकेने उपलब्ध करून दिलेल्या कृत्रिम हौद, जलकुंड तसेच विसर्जन कुंडांमध्येच करावे.
तसेच फुले, हार, दुर्वा आदी निर्माल्य जलस्रोतांमध्ये न टाकता स्वतंत्र निर्माल्य कुंडात जमा करावे, असे आवाहन महापालिका आयुक्त डॉ. विजय सूर्यवंशी यांनी केले आहे.
गणेशमूर्ती विसर्जनानंतर मोठ्या प्रमाणात निर्माल्य जमा होते. हे निर्माल्य जलस्रोतांमध्ये टाकल्यास पाण्याची गुणवत्ता आणि परिसराच्या स्वच्छतेवर विपरीत परिणाम होण्याची शक्यता असते. त्यामुळे नागरिकांनी गणेशोत्सवातील धार्मिक परंपरा जपत पर्यावरणाचीही काळजी घ्यावी, असे महापालिका प्रशासनाने स्पष्ट केले आहे.
आयुक्त डॉ. विजय सूर्यवंशी म्हणाले, “गणेशोत्सवातील श्रद्धा आणि परंपरा जपत शहराची स्वच्छताही कायम ठेवणे आवश्यक आहे. गणेशमूर्तींचे विसर्जन कृत्रिम जलकुंडात आणि निर्माल्य स्वतंत्रपणे निर्माल्य कुंडात जमा करून नागरिकांनी महापालिकेच्या स्वच्छता उपक्रमाला सहकार्य करावे.
नागरिकांच्या सहभागातून स्वच्छ आणि पर्यावरणपूरक गणेशोत्सव साजरा करता येईल.” महापालिकेच्या वतीने शहरातील विविध ठिकाणी गणेशमूर्ती विसर्जनासाठी कृत्रिम हौद, कृत्रिम जलकुंड आणि विसर्जन कुंडांची व्यवस्था करण्यात आली आहे.
त्याचबरोबर निर्माल्य संकलनासाठी स्वतंत्र कुंडही उपलब्ध करून देण्यात आले आहेत. त्यामुळे विसर्जनाच्या वेळी निर्माल्य जलकुंडात किंवा अन्य जलस्रोतांमध्ये न टाकता निर्धारित निर्माल्य कुंडातच जमा करण्याचे आवाहन प्रशासनाने केले आहे.
उप आयुक्त डॉ. प्रदीप ठेंगल म्हणाले, “निर्माल्याचे स्वतंत्र संकलन आणि गणेशमूर्तींचे कृत्रिम विसर्जनस्थळी विसर्जन या दोन बाबी नागरिकांनी कटाक्षाने पाळल्यास जलस्रोतांचे प्रदूषण टाळण्यास आणि गणेशोत्सवाच्या काळात शहराची स्वच्छता राखण्यास मोठी मदत होईल.”
गणेशोत्सव हा श्रद्धा, भक्ती आणि उत्साहाचा सण आहे. या उत्सवाला पर्यावरण संवर्धनाची जोड देत नागरिकांनी महापालिकेने उपलब्ध करून दिलेल्या कृत्रिम विसर्जन कुंडांचा तसेच निर्माल्य कुंडांचा वापर करावा. नागरिकांच्या सामूहिक सहभागातून स्वच्छ, सुंदर आणि पर्यावरणपूरक गणेशोत्सव साजरा करण्याचे आवाहन महापालिका प्रशासनाने केले आहे.
