USD INR: भारत -अमेरिका व्यापार करार लवकरच होणार आहे. अशा परिस्थितीत भारताची निर्यात वाढणार आहे आणि चालू खात्यावरील तूट कमी होणार आहे. यामुळे रुपयाचे मूल्य मंगळवारी तब्बल 122 पैसे म्हणजे 1.22 टक्क्यांनी वाढून 90.27 रुपये प्रति डॉलर या पातळीवर गेले. गेल्या 13 महिन्यापासून डॉलरच्या तुलनेत रुपयाचे मूल्य सहा टक्क्यांनी घसरले आहे. ही तूट एकाच दिवसात बर्याच प्रमाणात भरून निघाली. विश्लेषकांनी सांगितले की, आता निर्यात वाढल्यामुळे भारतात परकीय गुंतवणूक वाढेल. त्याचबरोबर परकीय चलनाचा साठा वाढेल. अशा परिस्थितीत आगामी काळात रुपया आणखी मजबूत होणार आहे. भारतात मोठ्या प्रमाणात गुंतवणूक – रुपया कमकुवत असल्यामुळे परदेशी गुंतवणूकदारांना भारतात केलेले गुंतवणूक परवडत नव्हती. त्यांना गेल्या वर्षी डॉलरमध्ये अत्यंत कमी नफा झाला आहे. आता त्यांना डॉलरमध्ये मिळणारा नफा रुपया बळकट झाल्यामुळे वाढणार असल्यामुळे हे गुंतवणूकदार पुन्हा भारतात मोठ्या प्रमाणात गुंतवणूक करतील. याचा एकूणच अर्थव्यवस्थेला लाभ होणार आहे. त्यातच जागतिक बाजारात गेल्या आठवड्यात खनिज तेलाचे दर 72 डॉलरपर्यंत वाढले होते. आता ते कमी होऊन 66 डॉलर इतके झाले आहेत. याचाही रुपयाचे मूल्य काही प्रमाणात वाढण्यास मदत झाली असल्याचे दिसून येते. जागतिक बाजारात डॉलरचे मूल्य दर्शविणारा डॉलर इंडेक्स 0.05 टक्क्यांनी कमी होऊन 97.57 अंकावर आला आहे. याचाही रुपयाचा भाव वाढण्यास मदत झाली आहे. भारताची निर्यात वाढण्याची शक्यता – युरोपियन समुदायांबरोबर व्यापार करार केल्यानंतर भारताची निर्यात वाढण्याची शक्यता निर्माण झाली होती. त्यातच अचानक अमेरिकेने भारतासोबत व्यापार करार केला आहे. विशेष म्हणजे भारताच्या स्पर्धक देशापेक्षा भारतावरील आयात शुल्क कमी आहे. त्यामुळे भारताची निर्यात अमेरिकेला मोठ्या प्रमाणात वाढण्याची शक्यता खुली झाली आहे. सोमवारी परदेशी गुंतवणूकदारांनी शेअर बाजारात 1,832 कोटी रुपयांच्या शेअरची विक्री केली असली तरी मंगळवारी या गुंतवणूकदारांनी बरीच खरेदी केली असण्याची शक्यता आहे. Gold Silver Price Hike: सोने-चांदीच्या पुन्हा सुसाट! तीन दिवसांच्या घसरणीनंतर किमतीत मोठी वाढ चालू खात्यावरील तूट पाव टक्क्यांनी घटनार – भारत आणि अमेरिकेत दरम्यान व्यापार कराराची घोषणा झाली आहे. याचा तपशील लवकरच भारत आणि अमेरिकेचे वाणिज्य मंत्रालय जाहीर करण्याची शक्यता आहे. एकूण परिस्थिती पाहिली असता भारताची अमेरिकेला निर्यात वाढून भारताकडे परकीय चलनाचा साठा वाढणार आहे. अशा परिस्थितीत आगामी वर्षात भारताची चालू खात्यावरील वाढलेली तूट 0.25 टक्क्यांनी कमी होऊन 0.8 टक्के इतकी होईल असे विश्लेषकांना वाटते. अमेरिकेसोबत झालेल्या मतभेदांनंतर भारताची चालू खात्यावरील तुट वाढली होती आणि त्याचा परिणाम रुपयाच्या मूल्यावर झाला होता. गेल्या 13 महिन्यात रुपयाचे मूल्य डॉलरच्या तुलनेत सहा टक्क्यांनी कमी झाले आहे. या कराराची घोषणा झाल्यानंतर मंगळवारी रुपयाचे मूल्य एकाच दिवसात 1.22 टक्क्यांनी वाढले. यावरून या कराराचा रुपयाला किती मोठा आधार मिळणार आहे याची कल्पना येते. रुपयाचे मूल्य कमी झाल्यामुळे आणि भारत- अमेरिकेचे संबंध खराब झाल्यामुळे बरीच थेट परकीय गुंतवणूक मंदावली होती. आता अमेरिकेतून भारतामध्ये थेट परकीय गुंतवणूक वाढणार आहेत. त्याचबरोबर नवे तंत्रज्ञान भारताला उपलब्ध होणार आहे. याशिवाय भारतीय निर्देशांक आता इतर वेगाने विकसित होणार्या देशापेक्षा कितीतरी कमी आहेत. मात्र रुपायाचे मूल्य घसरल्यामुळे परदेशी संस्थागत गुंतवणूकदारांनी भारतातून गेल्या 13 महिन्यांमध्ये जवळजवळ दोन लाख कोटी रुपयांची गुंतवणूक काढून घेतली होती. आता ही गुंतवणूक वेगाने परत येण्यास मदत होईल. त्याचाही रुपयाला मोठ्या प्रमाणात आधार मिळू शकतो असे समजले जाते.
