Private Jet Crash : अमेरिकेच्या मेन राज्यातील बँगर आंतरराष्ट्रीय विमानतळावर रविवारी संध्याकाळी एक खाजगी जेट विमान कोसळल्याची घटना घडली. या विमानात एकूण ८ जण प्रवास करत होते, अशी माहिती प्राथमिक तपासावर आधारित सूत्रांच्या हवाल्याने सीएनएनने दिली आहे.

सीएनएनशी बोलताना सूत्रांनी सांगितलं की, या अपघातात जखमी झालेल्या प्रवासी किंवा क्रू मेंबर्सच्या प्रकृतीबाबत अद्याप अधिकृत माहिती उपलब्ध नाही. प्राथमिक माहितीनुसार, अपघातग्रस्त विमान हे बॉम्बार्डियर चॅलेंजर 650 बिझनेस जेट असल्याचं स्पष्ट झालं आहे. हे विमान बँगर येथून उड्डाण करत असतानाच कोसळलं.

नेमकं काय घडलं?

बँगर विमानतळ प्रशासनाने दिलेल्या माहितीनुसार, घटनेची माहिती मिळताच स्थानिक वेळेनुसार रात्री सुमारे ७.४५ वाजता आपत्कालीन बचाव पथके घटनास्थळी दाखल झाली. सुरक्षेच्या कारणास्तव त्यानंतर विमानतळ तात्काळ बंद करण्यात आले.

हा अपघात ईशान्य अमेरिकेतील काही भागांमध्ये सुरू असलेल्या भीषण हिमवादळाच्या पार्श्वभूमीवर घडला. त्या वेळी मेन राज्यात तापमान गोठणबिंदूपेक्षा खाली होतं, हलका हिमवर्षाव सुरू होता आणि दृश्यमानताही अत्यंत कमी होती.

संघीय नोंदींचा हवाला देत सीएनएनने सांगितलं की, हे विमान ह्यूस्टनस्थित एका मर्यादित दायित्व कंपनीच्या नावावर नोंदणीकृत आहे. सरकारी अधिकाऱ्यांच्या माहितीनुसार, हे जेट विमान टेक्सासहून मेनमध्ये आले होते.

नोंदणीकृत मालक म्हणून नमूद करण्यात आलेल्या कंपनीचा ह्यूस्टनमधील पत्ता हा ‘अर्नोल्ड अँड इटकिन’ या वैयक्तिक इजा कायद्याच्या फर्मच्या पत्त्याशी जुळत असल्याचंही समोर आलं आहे.

एफएए (Federal Aviation Administration) च्या नोंदींनुसार, हे विमान एप्रिल २०२० मध्ये सेवेत दाखल झालं होतं. एफएएने स्पष्ट केलं आहे की, या अपघाताची चौकशी राष्ट्रीय परिवहन सुरक्षा मंडळा (NTSB) सोबत संयुक्तपणे केली जाणार आहे.

हेही वाचा :

Plane Crash : अमेरिकेत टेकऑफनंतर खाजगी जेट विमान कोसळले ; अपघातात विमानाला भीषण आग

US air services : हिमवादळामुळे अमेरिकेतील विमानसेवा विस्कळीत; नागरिकांना बसला मोठा आर्थिक फटका