US Open 2024 (Jessica Pegula vs Aryna Sabalenka) : – अमेरिकेच्या जेसिका पेंगूलाने चेक प्रजासत्ताकच्या कॅरोलिना मुचोव्हाला तर दुसऱ्या मानांकित बेलारूसच्या आरिना साबलेन्काने अमेरिकेच्या एम्मा नवारोचा पराभव करताना यूएस ओपन स्पर्धेच्या महिला एकेरीच्या अंतिम सामान्यात धडाक्यात प्रवेश केला.

स्पर्धेच्या उपांत्य फेरीत जागातिक क्रमवारीत सहाव्या स्थानावर असलेल्या अमेरिकेच्या जेसिका पेंगूलाने कॅरोलिना मुचोव्हाला १-६, ६-४, ६-२ असे पराभूत केले. पहिल्या सेटमध्ये पेंगूलाने थोडीशी संथ सुरुवात केली. त्यावेळी कॅरोलिनाने शानदार खेळाचे प्रदर्शन करताना पहिला सेट ६-१ असा जिंकला. त्यानंतर मात्र पेंगूलाने जोरदार पुनारागमन केले. दुसरा व तिसरा सेट पेंगूलाने अनुक्रमे ६-४ व ६-२ असा जिंकताना स्पर्धेच्या अंतिम फेरीत धडाक्यात प्रवेश केला.

३० वर्षीय अमेरिकेच्या जेसिका पेंगूलाने गेल्या १६ पैकी १५ सामन्यांमध्ये विजय साकारला आहे. उपांत्यपूर्व फेरीत पेंगूलाने जागतिक क्रमवारीत अव्वल स्थानी असलेया पोलंडच्या इगा स्विटेकला ६-२, ६-४ असे सरळ सेटमध्ये पराभूत केले होते. सहाव्या मानांकित असलेल्या पेंगुलाला ग्रँड स्लॅम स्पर्धेत उपांत्यपूर्व फेरीतच सहा वेळा पराभवाचा सामना करावा लागला होता.

दुसऱ्या उपांत्य फेरीच्य लढतीमध्ये दुसऱ्या मानांकित बेलारूसच्या आरिना साबलेन्काने अमेरिकेच्या एम्मा नवारोला सरळ सेटमध्ये ६-३, ७-६ (७) असे पराभूत करताना स्पर्धेच्या अंतिम फेरीत प्रवेश केला. पहिल्या सेटमध्ये आरिना साबलेन्काने ६-३ असा जिंकला. मात्र दुसऱ्या सेटमध्ये एम्माने जोरदार पुनरागमन करताना साबलेन्काला टायब्रेकरमध्ये पकडले. मात्र मोक्याच्या क्षणी आरिनाने आपला खेळ उंचावताना २ पॉंईटसची कमाई करताना विजय साकारला. जागतिक क्रमवारीत दुसऱ्या स्थानावर असलेल्या साबलेन्काने उपांत्यपूर्व फेरीत चीनच्या क्वीनवेन झेन्गचे आव्हान ६-१, ६-२ असे मोडून काढले होते.

IPL 2025 : टीम इंडियानंतर आता राहुल द्रविड राजस्थान रॉयल्सला बनवणार चॅम्पियन…?

हेड – टू – हेड

यापूर्वी पेंगूला – साबलेन्का ७ वेळा आमनेसामने आल्या होत्या. यापैकी ५ सामन्यांमध्ये साबलेन्काने बाजी मारली होती. तर पेंगूलाला केवळ २ वेळा साबलेन्काचे आव्हान मोडून काढण्यात यश मिळाले आहे. नुकत्याच झालेल्या सिनसिनाटी ओपन टेनिस स्पर्धेच्या अंतिम फेरीत साबलेन्काने पेंगूलाला ६-३, ७-५ असे पराभूत करताना विजेतेपदावर शिक्कामोर्तब केले होते.

Duleep Trophy 2024 : 19 वर्षीय मुशीर खानने रचला इतिहास, पदार्पणातच मोडला सचिन तेंडुलकरचा 33 वर्ष जुना महाविक्रम…

पेगुला विरुद्ध सबालेन्का सामन्याचे तपशील

तारीख : 8 सप्टेंबर (रविवार)
वेळ : To Be Decided (अजून ठरलेली नाही)
स्थळ : आर्थर ॲशे स्टेडियम, न्यूयॉर्क

लाईव्ह स्ट्रिमींग….

यूएस ओपन 2024 सोनी स्पोर्ट्स नेटवर्कवर भारतात थेट प्रक्षेपित केले जाईल. चाहते सोनी लिव्ह ॲपवर ग्रँड स्लॅम इव्हेंट अंतिम सामन्याचा विनामूल्य थेट प्रक्षेपणाचा आनंद देखील घेऊ शकतात