Urvashi Rautela : काही दिवसांपूर्वी अभिनेत्री क्रिती सॅनन रक्षाबंधनानिमित्त एका जाहिरातीत झळकली आणि तिच्या लूकवरून सोशल मीडियावर मोठा वाद निर्माण झाला. जाहिरातीतील क्रितीच्या पेहरावावर काही नेटकऱ्यांनी आक्षेप घेतला. वाढता विरोध पाहता संबंधित ब्रँडने ही जाहिरात मागे घेत ती विविध डिजिटल प्लॅटफॉर्मवरून हटवली. मात्र, यानंतरही या जाहिरातीची चर्चा सुरूच आहे.

या वादात अभिनेत्री कंगना रणौत हिनेही क्रितीवर टीका केली होती. आता अभिनेत्री उर्वशी रौतेला हिनेही या प्रकरणावर आपले मत व्यक्त केले आहे. एका वृत्तसंस्थेशी बोलताना उर्वशीने कोणाचेही कपडे किंवा पेहराव यावरून व्यक्तीला जज करण्याचे समर्थन करत नसल्याचे स्पष्ट केले.

मी भारतीय संस्कृतीचा खूप आदर करते. भाऊ-बहिणीच्या नात्याचा उत्सव असलेला रक्षाबंधन हा अतिशय सुंदर सण आहे. त्यामुळे काही गोष्टींसाठी एक मर्यादा निश्चित असणं गरजेचं आहे. महिलांना स्वातंत्र्य आहे, त्या सक्षम आहेत आणि त्यांना स्वतःचे निर्णय घेण्याचा पूर्ण अधिकार आहे.

मात्र, स्वातंत्र्यासोबत सामाजिक आणि सांस्कृतिक जाणीव असणेही तितकंच महत्त्वाचं आहे. आपण सर्व भारतीय आहोत आणि आपल्या देशाच्या संस्कृतीचा व परंपरांचा आदर केला पाहिजे असं तिने म्हंटलं आहे. यावेळी  उर्वशीने क्रितीचे थेट नाव घेतलेले नसले तरी तिच्या वक्तव्याचा संबंध क्रितीच्या जाहिरातीशी जोडला जात आहे.