नीरा (वार्ताहर) – पुरंदर तालुक्यातील नीरानजीक असलेल्या पाडेगाव (ता. खंडाळा) येथील हिंदू-मुस्लीम ऐक्याचे प्रतीक असलेल्या हजरत पीर सय्यद पठाणशाह बाबा दर्गाहचा 40 वा उरुस शुक्रवार (दि.26), शनिवार (दि. 27), रविवार (दि. 28) तीन दिवस उत्साहात व शांततेत साजरा करण्यात आला. उरूसानिमित्त हजारो भाविकांनी दर्शनासाठी गर्दी केली होती.

पुणे आणि सातारा जिल्ह्याच्या हद्दीवर असलेल्या पाडेगाव येथे हिंदू मुस्लीम ऐक्याचे प्रतीक असलेली हजरत पीर सय्यद पठाणशाह बाबा दर्गाह अनेक वर्षांपासून आहे. रविवारी (दि. 28 जुलै) सकाळी नऊ वाजता कुराण पठण झाल्यानंतर सकाळी 11 वाजता जियारतचा धार्मिक विधी करण्यात आला. त्यानंतर महाप्रसादाचे आयोजन करण्यात आले होते.

यावेळी हजारो भाविकांनी महाप्रसादाचा आस्वाद घेतला. यावेळी पुरंदरचे आमदार संजय जगताप, सोमेश्‍वर सहकारी साखर कारखान्याचे अध्यक्ष पुरुषोत्तम जगताप, पुणे ट्रस्ट प्रँक्टीस असोसिएशनचे माजी अध्यक्ष अ‍ॅड. शिवराज कदम-जहागिरदार, पुणे जिल्हा नियोजन समितीचे सदस्य विराज काकडे, नीरेचे उपसरपंच राजेश काकडे, दत्ताजी चव्हाण, बाळासाहेब ननवरे, समर्थ पतसंस्थेचे अध्यक्ष राजेश चव्हाण,

संदीप धायगुडे, अनिल चव्हाण, महेश काकडे, विक्रम दगडे, पाडेगावचे भगवान माने यांच्यासह अनेक मान्यवरांनी बाबांचे दर्शन घेतले. यावेळी ट्रस्टचे अध्यक्ष मुस्तफा आतार यांनी मान्यवरांचे स्वागत व सत्कार केला. तर उपाध्यक्ष रशीद सय्यद, सचिव फिरोज सय्यद, विश्‍वस्त मोहंम्मदगौस आतार यांच्यासह दर्गाह खिदमदगार कमिटीच्या सदस्यांनी विशेष परिश्रम घेतले.