UP Division: उत्तर प्रदेशच्या विभाजनाचा मुद्दा पुन्हा चर्चेत आला आहे. उत्तर प्रदेश सरकारमधील मंत्री आणि सुहेलदेव भारतीय समाज पक्षाचे (सुभासपा) अध्यक्ष ओम प्रकाश राजभर यांनी भविष्यात उत्तर प्रदेशचे चार भाग होतील, असा दावा केला आहे.

देवरिया येथे २० सप्टेंबरला झालेल्या ‘सामाजिक समरसता महारॅली’त बोलताना राजभर यांनी जातीय जनगणनेनंतर राज्याच्या विभाजनाचा मार्ग मोकळा होईल, असा दावा केला. पंतप्रधान नरेंद्र मोदी यांनी याबाबत आश्वासन दिल्याचेही त्यांनी सांगितले. मात्र, हे राजभर यांनी केलेले दावे आहेत.

उत्तर प्रदेशचे विभाजन झाल्यास पूर्वांचल स्वतंत्र राज्य व्हावे आणि तेथे राजभर समाजातील व्यक्ती मुख्यमंत्री व्हावी, अशी भूमिका त्यांनी मांडली. आगामी विधानसभा निवडणुकीच्या पार्श्वभूमीवर त्यांच्या या वक्तव्यामुळे राज्याच्या राजकारणात पुन्हा विभाजनाची चर्चा सुरू झाली आहे.

यापूर्वी २०११ मध्ये तत्कालीन मुख्यमंत्री मायावती यांच्या सरकारने उत्तर प्रदेशचे पूर्वांचल, बुंदेलखंड, अवध प्रदेश आणि पश्चिम प्रदेश असे चार भाग करण्याचा प्रस्ताव विधानसभाेत मंजूर केला होता.