Vinod Tawde : समाजवादी पक्षाने (सप) उत्तरप्रदेशात मागास, दलित आणि अल्पसंख्याक (पीडीए) फॉर्म्युला लावून धरला आहे. त्यावरून भाजपचे उत्तरप्रदेश प्रभारी विनोद तावडे (Vinod Tawde) यांनी त्या पक्षावर निशाणा साधला. सपसाठी पीडीए म्हणजे पराया धन अपना असल्याची उपरोधिक टिप्पणी त्यांनी केली.

भाजपची सत्ता असणाऱ्या उत्तरप्रदेशात पुढील वर्षीच्या पहिल्या तिमाहीत विधानसभा निवडणूक होईल. त्यासाठी काहीच महिने उरले असल्याने सर्वच राजकीय पक्ष तयारीत गुंतले आहेत. आगामी निवडणुकीसाठी सज्ज होत असलेल्या भाजपनेही मोर्चेबांधणीवर लक्ष केंद्रित केले आहे.

त्या पक्षाने नुकतीच तावडे (Vinod Tawde) यांची प्रभारीपदी नियुक्ती केली. त्यानंतर ते प्रथमच उत्तरप्रदेशमध्ये दाखल झाले. पत्रकारांशी बोलताना त्यांनी भाजपचा प्रमुख प्रतिस्पर्धी असणाऱ्या सपविरोधात रणशिंग फुंकले. सपच्या पीडीए घोषणेची हवा भाजप आणि एनडीएमधील मित्रपक्ष काढून टाकतील, अशी खिल्ली त्यांनी उडवली.

एनडीए कार्यकर्त्यांच्या बळावर आगामी निवडणूक लढवेल. भाजपच्या प्रचार मोहिमेचे नेतृत्व पंतप्रधान नरेंद्र मोदी, केंद्रीय गृहमंत्री अमित शहा, मुख्यमंत्री योगी आदित्यनाथ, पक्षाचे अध्यक्ष नितीन नवीन, प्रदेशाध्यक्ष पंकज चौधरी करतील. उत्तरप्रदेशात एनडीए सलग तिसऱ्यांदा बाजी मारेल, असा विश्‍वासही तावडे (Vinod Tawde) यांनी व्यक्त केला.