नवी दिल्ली : जगात कोरोनाने हाहाकार माजवला आहे. दिवसेंदिवस कोरोनाबदनाची संख्या जगभरात वाढतच आहे. मात्र या सर्वात दिलासादायक गोष्ट म्हणजे अनेक देशांमध्ये विविध प्रतिबंधात्मक लसींवर संशोधन केले जात आहे. मात्र, ती जगातील सर्वच देशांना पुरवणे तितकेच अवघड काम आहे. यासाठी आता युनिसेफने पुढाकार घेतला असून जगातील गरजू देशांना महिन्याला ८५० टन करोना प्रतिबंधक लसीचे डोस पोहोचवणार असल्याचे सांगण्यात येत आहे.

“संघटना पुढील वर्षापासून प्रत्येक महिन्याला सुमारे ८५० टन लसीचे डोस गरजू देशांना पुरवण्यासाठी पूर्णपणे तयार आहे. या कामात कोणत्याही प्रकारचा अभाव ठेवला जाणार नाही, तसेच प्राधान्याने हे काम केले जाईल.” करोना प्रतिबंधक लस विविध देशांमध्ये पोहोचवण्यासाठी व्यावसायिक विमानांचाच वापर करण्यात येईल. जर गरज पडलीच तर चार्टर्ड विमानही वापरली जातील.

युनिसेफच्या कार्यकारी संचालक हैनरिएटा फोर यांनी याची माहिती दिली. तसेच संघटनेवर ही एक मोठी आणि ऐतिहासिक जबाबदारी असल्याचे म्हटले आहे. या कामी बरंच काही पणाला लागले आहे. तरीही संघटना ही जबाबदारी पूर्णपणे निभावण्यासाठी तयार असल्याचे युनिसेफने म्हटले आहे.

या जीवघेण्या आजारावर लस विकसित करणाऱ्या देशांकडून गरीब देशांमध्ये ७० हजार फ्रीजची खरेदी करुन ते पुढील वर्षाच्या शेवटापर्यंत बसवले जातील. या आधुनिक फ्रीजच्या माध्यमातून करोना महामारीच्या लसीच्या उपलब्धतेचा परीघ वाढवण्यात येणार असल्याचेही सांगण्यात येत आहे. ‘कोवैक्स’ लसीला सुरक्षित ठेवण्यासाठी २ ते ८ डिग्री तापमानाची गरज असते. या कामात हे फ्रीज महत्वाची भूमिका बजावतील. या फ्रीजची सर्वात मोठी विशेष बाब म्हणजे हे फ्रीज सौर ऊर्जेवर चालतील. अशा प्रकारे या फ्रीजच्या माध्यमातून गरीब आणि कमी उत्पन्न असलेल्या देशांमध्ये लस सहज उपलब्ध करुन दिली जाईल, असंही युनिसेफनं म्हटलं आहे.