Volodymyr Zelensky | युक्रेनचे राष्ट्राध्यक्ष वोलोदोमिर झेलेन्स्की आणि अमेरिकेचे राष्ट्राध्यक्ष डोनाल्ड ट्रम्प यांच्यात व्हाइट हाऊस येथे झालेल्या बैठकीत वाद झाल्याचे पाहायला मिळाले. या वादानंतर रशियाविरुद्धच्या युद्धात युक्रेनसाठी अमेरिकेकडून मिळणारी मदत बंद होऊ शकते. मात्र, आता झेलेन्स्कींनी अमेरिकेसंदर्भात काहीशी मवाळ भूमिका घेतल्याचे पाहायला मिळाले. अमेरिकेकडून सुरक्षेची हमी मिळाल्यास व युक्रेनला नाटोचे सदस्यत्व देण्यात आल्यास राष्ट्राध्यक्षपद सोडण्यास तयार असल्याचे झेलेन्स्की यांनी म्हटले आहे. सोबतच, अमेरिकेसोबत खनिज करार करण्यासही तयार असल्याचे ते म्हणाले.

ट्रम्प यांच्यासोबत झालेल्या वादानंतर झेलेन्स्की यांनी ब्रिटनला भेट दिली होती. या दौऱ्यात त्यांनी ब्रिटनचे पंतप्रधान कीर स्टार्मर यांची भेट घेतली. तसेच, अनेक युरोप राष्ट्रांच्या प्रमुखांशीही त्यांनी संवाद साधला. यावेळी कीर स्टार्मर यांनी युक्रेनमध्ये शांतता प्रस्थापित करण्यासाठी युरोपियन नेत्यांमध्ये शांती योजनेवर सहमती झाल्याची माहिती दिली. तसेच, युक्रेनला मदत करण्यासाठी संरक्षणावरील खर्चात वाढ करणार असल्याचेही त्यांनी सांगितले.

त्याआधी बोलताना वोलोदोमिर झेलेन्स्की यांनी अमेरिकेशी पुन्हा चर्चा करण्यासाठी तयार असल्याचे म्हटले आहे. रिपोर्टनुसार, झेलेन्स्की म्हणाले की, अमेरिकेचे राष्ट्राध्यक्ष डोनाल्ड ट्रम्प यांच्यासोबत संबंध सुधारले जाऊ शकतात, पण चर्चा बंद खोलीत झाली पाहिजे. जर युक्रेनला NATO चे सदस्यत्व आणि सुरक्षिततेची हमी मिळत असेल तर ते राष्ट्राध्यक्षपद सोडण्यासही तयार आहे.

तसेच, रशियासोबत शांतता करार करताना ते युक्रेनचा कोणताही भूभाग सोडण्यास तयार नसल्याचेही झेलेन्स्की यांनी स्पष्ट केले. सोबतच, अमेरिकेसोबत खनिज करार करण्यास तयार असल्याचेही त्यांनी सांगितले.

दरम्यान, व्हाइट हाऊसमध्ये ट्रम्प यांच्यासोबत झालेली झेलेन्स्की यांची बैठक जगभरात चर्चेचा विषय ठरली. या बैठकीत दोन्ही देशांच्या प्रमुखांमध्ये शाब्दिक वाद झाल्याचे पाहायला मिळाले. वादावादीनंतर झेलेन्स्की यांनी व्हाइट हाऊस सोडावे लागले होते.