मॉस्को : रशियाने शुक्रवारी पुन्हा युक्रेनवर वेगवान हवाई हल्ले केले. (Russia launches another major missile attack on Ukraine) ज्यामध्ये अनेक ऊर्जा केंद्रे आणि महत्त्वाच्या इमारती उद्‌ध्वस्त झाल्या आहेत. स्थानिक अधिकाऱ्यांनी सोशल मीडियाच्या माध्यमातून दिलेल्या माहितीत सांगितले की, रशियाकडून हे सर्व हवाई हल्ले युक्रेनच्या उत्तर-पूर्व भागात राजधानी कीव आणि खार्किवमध्ये झाले आहेत. रशियन हल्ल्यांमुळे खार्किव आणि सुमी या भागात वीजपुरवठा खंडित झाला आहे. क्षेपणास्त्र हल्ल्यात एक निवासी इमारतही पूर्णपणे उद्‌ध्वस्त झाली आहे. त्याच्या ढिगाऱ्यात लोक अडकल्याची शक्‍यता आहे.

कीवचे महापौर विटाली क्‍लिट्‌स्को यांनी लोकांना रशियाने हवाई हल्ले थांबेपर्यंत बंकरमध्ये राहण्याचे आवाहन केले. गुरुवारीही रशियाने युक्रेनच्या अनेक भागात क्षेपणास्त्रे आणि ड्रोनने हल्ला केला. यामध्ये अनेकजणांचा मृत्यू झाला होता. रशिया सातत्याने युक्रेनवर क्षेपणास्त्रांनी हल्ला करून त्याला गुडघे टेकण्याचा प्रयत्न करत आहे. पण, युक्रेनही या हवाई हल्ल्यांना जोरदार प्रत्युत्तर देत आहे. बुधवारी युक्रेनने राजधानी कीववर हल्ला केलेले 13 ड्रोन नष्ट केले.

युक्रेनचे सैन्य जनरल ओलेक्‍सी रेझनिकोव्ह यांनी इशारा दिला आहे की, रशिया पुढील वर्षाच्या सुरुवातीला हल्ल्यांचा वेग वाढवू शकतो. यासोबतच रशिया 2 लाख नवीन सैनिक तैनात करण्याच्या तयारीत असल्याचेही त्यांनी सांगितले. रशियन सैन्याच्या ताब्यातून मुक्‍त झालेल्या युक्रेनच्या प्रदेशात अनेक छळ कक्ष सापडले आहेत. युक्रेनच्या संसदेचे मानवाधिकार आयुक्‍त दिमिट्रो लुबनेट्‌स यांनी ही माहिती दिली.

Maharashtra : दर्जेदार रस्त्यांच्या माध्यमातून राज्याची वेगळी ओळख निर्माण करणार – मुख्यमंत्री शिंदे

पत्रकार परिषदेत त्यांनी सांगितले की, नुकतेच रशियापासून मुक्त झालेल्या खेरसनमध्ये 10 टॉर्चर चेंबर्स सापडले आहेत. यातील एक छेडछाड केंद्र फक्‍त मुलांसाठी होते. ज्यामध्ये अल्पवयीन मुलांवर अत्याचार करण्यात आले. दिमित्रोने सांगितले की, मुलांना धोकादायक थंडीत अतिशय पातळ मॅटवर ठेवण्यात आले होते. त्यांना दोन दिवसांतून एकदाच पाणी दिले जात असून खायलाही काही मिळाले नाही.