Uddhav Thackeray : महाराष्ट्र राज्याच्या राजकारणातून एक अत्यंत मोठी आणि खळबळजनक बातमी समोर येत आहे. शिवसेना ठाकरे गटाला (Uddhav Thackeray) आतापर्यंतचा सर्वात मोठा धक्का बसला असून, ठाकरे गटाच्या ९ पैकी ६ खासदारांनी उद्धव ठाकरे यांची साथ सोडल्याचे वृत्त आहे. हे सर्व बंडखोर खासदार मुख्यमंत्री एकनाथ शिंदे यांच्या ‘शिवसेना शिंदे गटात’ प्रवेश करणार असल्याचे जवळपास निश्चित मानले जात आहे.

मात्र, या मोठ्या राजकीय भूकंपादरम्यान धाराशिवचे खासदार ओमराजे निंबाळकर यांच्या एका भूमिकेने आणि बंडखोर खासदार संजय दिना पाटील यांच्या कुटुंबातील अंतर्गत बंडाने या संपूर्ण नाट्याला (Uddhav Thackeray) एक नवे वळण दिले आहे.

शिंदे गटाची धाकधूक वाढली!
६ खासदारांनी बंडाचे निशाण फडकावले असले, तरी धाराशिवचे खासदार ओमराजे निंबाळकर यांनी घेतलेल्या सावध भूमिकेमुळे शिंदे गटाचे टेन्शन कमालीचे वाढले आहे.”मी अद्याप कोणताही अंतिम निर्णय घेतलेला नाही. मी आधी माझ्या मतदारसंघात जाईन, तिथल्या सर्वसामान्य कार्यकर्त्यांशी आणि जनतेशी सविस्तर चर्चा करेन आणि त्यानंतरच माझी पुढील राजकीय दिशा ठरवेन,” अशी स्पष्ट भूमिका ओमराजे यांनी घेतली आहे.

सूत्रांनी दिलेल्या माहितीनुसार, ओमराजे निंबाळकर यांचे ठाकरे गटाचे प्रमुख उद्धव ठाकरे यांच्याशी फोनवर बोलणे झाले आहे. एवढेच नव्हे तर, सोमवारी (उद्या) ओमराजे हे थेट ‘मातोश्री’वर जाऊन उद्धव ठाकरेंची (Uddhav Thackeray) भेट घेण्याची दाट शक्यता आहे. त्यामुळे शिंदे गटाच्या गोटात धाकधूक वाढली असून, ओमराजे नेमका काय निर्णय घेतात, यावरच या बंडखोर खासदारांचे पुढील भवितव्य अवलंबून असणार आहे.

बंडखोर खासदार संजय दिना पाटलांना घरातूनच धक्का!

एकीकडे ओमराजेंनी सस्पेन्स वाढवला असतानाच, दुसरीकडे ठाकरे गटातून बंडखोरी केलेले खासदार संजय दिना पाटील यांना त्यांच्याच घरातून खूप मोठा राजकीय धक्का बसला आहे.संजय दिना पाटील यांच्या कन्या आणि शिवसेना ठाकरे गटाच्या माजी नगरसेविका राजुल पाटील यांनी आज थेट ‘मातोश्री’ निवासस्थानी जाऊन उद्धव ठाकरे यांची भेट घेतली.

या भेटीनंतर प्रसारमाध्यमांशी बोलताना राजुल पाटील यांनी अत्यंत मोठे आणि खळबळजनक विधान केले. त्या म्हणाल्या, “मी उद्धव ठाकरे यांच्यासोबतच आहे आणि कायम राहणार. आता माझी आणि माझ्या वडिलांची (संजय दिना पाटील) भविष्यातील राजकीय वाटचाल पूर्णपणे वेगळी असेल. मी माझे काम संपूर्ण निष्ठेने ठाकरे गटातच करत राहीन.”मुलीने घेतलेल्या या थेट भूमिकेमुळे खासदार संजय दिना पाटील कमालीचे अडचणीत आले आहेत.

आज संध्याकाळपर्यंत चित्र स्पष्ट होणार

या संपूर्ण राजकीय घडामोडींचे चित्र आज संध्याकाळपर्यंत पूर्णपणे स्पष्ट होण्याची शक्यता आहे. शिवसेना शिंदे गटाकडून आज ‘ऑपरेशन टायगर’ संदर्भातील महत्त्वाचे पुरावे सादर केले जाण्याची शक्यता वर्तवली जात आहे. ठाकरे गटाकडून या पुराव्यांची मागणी करण्यात आली होती.

थोडक्यात काय तर…६ खासदारांच्या बंडामुळे उद्धव ठाकरेंना धक्का बसला असला, तरी ओमराजे निंबाळकरांची चाल आणि राजुल पाटलांची निष्ठा यामुळे शिंदे गटाचा आनंद तूर्तास तरी संभ्रमात पडला आहे. आता संपूर्ण महाराष्ट्राचे लक्ष आज संध्याकाळच्या घडामोडींवर आणि उद्या होणाऱ्या ओमराजेंच्या संभाव्य भेटीवर लागले आहे.