Uddhav Thackeray | Muslim vote – यंदाच्या लोकसभा निवडणुकीत उद्धव ठाकरे यांचे स्थान भक्कम झाले आहे. मुंबईतील ६ पैकी ३ जागांवर त्यांच्या पक्षाच्या उमेदवारांना विजय मिळाला आहे. शिवसेनेत फूट पडल्यानंतर झालेल्या या पहिल्या निवडणुकीत ठाकरे आपल्या अस्तित्वासाठीच लढत असल्यामुळे सगळ्यांचे लक्ष मुंबईकडे होते.

त्यात ठाकरेंनी आपला गड राखला असून आणखी एका गोष्टीबाबत कुतुहल होते. ते म्हणजे मुंबईतील मुस्लिम मतदार ठाकरेंना साथ देणार का. तर त्याचेही उत्तर होकारार्थी म्हणजे ठाकरेंच्या बाजूने लागले आहे.

निकालानंतर जी आकडेवारी समोर आली आहे त्यानुसार मुस्लिम मतदार ठाकरेंच्या बाजूने ठामपणे उभा राहीला असल्याचे सिध्द झाले आहे. भायखळा, मुंबादेवी, मानखुर्द- शिवाजी नगर, अणुशक्ती नगर, कुर्ला चांदिवली, घाटकोपर पश्‍चिम, मालाड आणि मालवणी अशा मुस्लिम बहुसंख्य असलेल्या भागांमध्ये उद्धव ठाकरेंच्या उमेदवारांना भरभरून मते मिळाली आहेत.

ठाकरे गटाचे अरविंद सावंत दक्षिण मुंबईत ५२,६७३ मतांनी विजयी झाले. भायखळा, मुंबादेवीतील मुस्लिम मतदारांनी त्यांच्या विजयात महत्वाचा वाटा उचलला. मुंबादेवी येथे अमिन पटेल कॉंग्रेसचे आमदार आहेत. त्याच मतदारसंघातून सावंत यांना ७७,४६९ मते मिळाली.

दक्षिण मध्य मुंबईत ठाकरे गटाचे अनिल देसाई रिंगणात होते. त्यांनी शिंदे गटाचे राहुल शेवाळे यांचा पराभव केला. या मतदारसंघातील दलित आणि मुस्लिम बहुसंख्य असलेल्या धारावी भागात देसाई यांना ७६,६७७ मते मिळाली.

देसाई यांनीही शेवाळेंचा ५३ हजार मतांनी पराभव केला. इशान्य मुंबईतील ठाकरे गटाचे उमेदवार संजय दिना पाटील यांच्या विजयात मानखुर्द शिवाजी नगर मतदारसंघातील मुस्लिम मतदारांचा मोठा हातभार लागला. पाटील यांना येथून १ लाख १६ हजार मते मिळाली. समाजवादी पक्षाचे अबू आझमी येथे आमदार आहेत.