नागपुर : विधानसभेच्या निवडणुकीनंतर महाविकास आघाडीला मोठी गळती लागली आसल्याचे दिसून आले आहे. विशेषत: उद्धवसेनेतून अनेक मतब्बर नेत्यांनी पक्षापासून फारकत घेतली आहे. अनेकांनी भाजप, शिंदेसेना किंवा अजित पवारांच्या राष्ट्रवादीत प्रवेश केला आहे. नाशिकमध्ये उद्धवसेनेला जोरदार धक्के लागल्यानंतर आता चंद्रपुरमधून देखील उद्धवसेनेला मोठा धक्का बसला आहे. चंद्रपुरचे उद्धवसेनेचे जिल्हाध्यक्ष रवींद्र शिंदे यांनी पक्षाला जय महाराष्ट्र केला असून ते लवकरच भाजपमध्ये प्रवेश करणार आहेत.

नुकतेच चंद्रपूर जिल्हा मध्यवर्ती बँकेवर बिनविरोध निवडून आलेले रवींद्र शिंदे लवकरच भाजपमध्ये प्रवेश करणार आहेत. भाजप प्रदेशाध्यक्ष रवींद्र चव्हाण यांच्या हस्ते मुंबईत त्यांचा प्रवेश होणार असल्याची प्राथमिक माहिती आहे. रवींद्र शिंदे हे जिल्हा मध्यवर्ती बँकेवर यापूर्वी चार वेळा संचालक म्हणून निवडून आले असून, बँकेच्या राजकारणात त्यांची ओळख किंगमेकर अशी आहे.

यावेळी चंद्रपूर जिल्हा मध्यवर्ती बँकेवर २१ संचालकांपैकी ९ जागांवर भाजप समर्थक उमेदवार निवडून आले आहेत. ही कामगिरी बँकेच्या इतिहासात भाजपसाठी पहिलीच एवढ्या मोठ्या प्रमाणावरची आहे. त्यामुळेच, शिंदेंच्या राजकीय ताकदीची आणि बँकेत त्यांच्या प्रभावाची दखल घेऊन भाजपकडून त्यांना अध्यक्षपद देण्याची शक्यता वर्तवली जात आहे. या साऱ्या घडामोडींमध्ये भाजप आमदार बंटी भांगडिया यांची खेळी निर्णायक ठरली आहे. त्यांच्या नेतृत्वाखाली भाजपने बँकेवर आपली ताकद वाढवली असून पहिल्यांदाच जिल्हा मध्यवर्ती बँकेवर भाजपचा अध्यक्ष बसण्याची शक्यता निर्माण झाली आहे.

शिंदे यांच्याकडे स्वतःचे ४ ते ५ संचालक असल्याने त्यांना अध्यक्षपदाची जबाबदारी सोपवली जाऊ शकते. दरम्यान, आजवर काँग्रेसचे वर्चस्व असलेल्या या बँकेत भाजपचे पहिल्यांदाच इतक्या मोठ्या प्रमाणात संचालक निवडून आले आहेत. हे काँग्रेससाठी मोठे राजकीय आव्हान ठरणार आहे. शिंदे यांचा भाजप प्रवेश आणि अध्यक्षपदाच्या शक्यतेमुळे, बँकेच्या नेतृत्वाची दिशा आणि धोरणे देखील बदलण्याची शक्यता वर्तवली जात आहे.