Uddhav Thackeray : महाराष्ट्राच्या राजकीय वर्तुळातून एक अत्यंत मोठी आणि खळबळजनक बातमी समोर येत आहे. उपमुख्यमंत्री एकनाथ शिंदे यांच्या ‘ऑपरेशन टायगर‘मुळे शिवसेना (उद्धव बाळासाहेब ठाकरे) पक्षाला (Uddhav Thackeray) दिल्लीत मोठा धक्का बसण्याची शक्यता वर्तवली जात असतानाच, आता स्थानिक पातळीवर पुण्यामध्येही भाजपने ठाकरेंना मोठा सुरुंग लावला आहे.

पुणे जिल्ह्यातील ठाकरे गटाचे (Uddhav Thackeray) खंदे नेते आणि युवासेनेचे जुने जाणते पदाधिकारी ओंकार शिवाजी तुपे यांनी आपल्या शेकडो कार्यकर्त्यांसह भारतीय जनता पार्टीत जाहीर प्रवेश केला आहे. या दुहेरी राजकीय घडामोडींमुळे पुणे जिल्ह्यात भाजपची ताकद कमालीची वाढली असून ठाकरे गटासाठी हा एक अत्यंत मोठा मानसिक आणि राजकीय धक्का मानला जात आहे.

युवासेना आणि शिवसेनेत तब्बल ११ वर्षे अत्यंत सक्रिय असलेले आणि उपजिल्हाप्रमुख पदाची धुरा यशस्वीपणे सांभाळणारे ओंकार तुपे यांनी अखेर उद्धव ठाकरे यांच्या शिवसेनेला रामराम ठोकला आहे. त्यांनी आज मुंबई येथील भाजपच्या मुख्य पक्ष कार्यालयात अत्यंत उत्साही वातावरणात भारतीय जनता पार्टीत जाहीर प्रवेश केला.

भाजप युवा मोर्चाचे प्रदेशाध्यक्ष कृष्णराज महाडिक यांच्या हस्ते ओंकार तुपे यांनी भाजपचे ‘कमळ’ हाती घेतले. या पक्षप्रवेशाच्या वेळी त्यांच्यासोबत पुणे जिल्ह्यातील शेकडो सक्रिय कार्यकर्त्यांनी आणि समर्थकांनी देखील भाजपचा झेंडा खांद्यावर घेतला.

गेल्या दशकभरापेक्षा जास्त काळ शिवसेनेच्या विविध पदांवर प्रामाणिकपणे कार्यरत राहिलेल्या ओंकार तुपे यांनी आपण भाजपची विचारधारा आणि विकासाच्या धोरणावर विश्वास व्यक्त करून हा निर्णय घेतल्याचे सांगितले. तुपे यांच्या या पक्षप्रवेशामुळे पुणे जिल्ह्यात भाजपच्या युवा मोर्चाला मोठी बळकटी मिळणार असल्याचा दावा पक्षाच्या वरिष्ठ नेत्यांनी केला आहे.

दुसरीकडे, स्थानिक पातळीवर पक्ष संघटना पोखरली जात असतानाच, दिल्लीच्या पातळीवरही ठाकरे गटाच्या (Uddhav Thackeray) गोटात प्रचंड अस्वस्थता निर्माण झाली आहे. उद्धव ठाकरे यांच्या ९ लोकसभा खासदारांपैकी तब्बल ६ खासदार पक्षाची साथ सोडण्याच्या तयारीत असून ते एकनाथ शिंदे यांच्या ‘शिंदेसेनेत’ प्रवेश करणार असल्याची जोरदार चर्चा सुरू आहे.

या संदर्भात शिंदे गटाचे नेते चंद्रकांत रघुवंशी यांनी आज एक खळबळजनक दावा करून राजकीय वर्तुळात खळबळ उडवून दिली. उद्धव ठाकरे गटातील ६ लोकसभा खासदारांनी पक्ष बदलून शिंदे गटात प्रवेश केल्याचे त्यांनी स्पष्टपणे सांगितले.