Nepal Floods – नेपाळच्या हिमलुंग हिमाल या शिखराजवळ सोमवारी झालेल्या हिमस्खलनामध्ये गाडल्या गेलेल्यांपैकी आणखी दोघांचे मृतदेह सापडले आहे. यामुळे या घटनेत सापडलेल्या मृतदेहांची संख्या ४ झाली आहे. तर आणखी १२ जण अजूनही बेपत्ता आहेत, असे अधिकाऱ्यांनी सांगितले.

नेपाळच्या मनांग जिल्ह्यात नार-फू भागातल्या ७,१२६ मीटर उंचीच्या हिमलुंग हिमाल शिखराच्या बेस कॅम्पवर रविवारी हिमकडा कोसळला होता. यामुळे बेस कॅम्पवर गिर्यचारोहकांचा तंबू बर्फाखाली गाडला गेला होता. काही गिर्यारोहक आणि त्यांचे मदतनीस या हिमस्खलनात बेपत्ता झाले आहेत.

आज सापडलेले मृतदेह बिरेंद्र गुरंग आणि घनश्‍याम राय या दोघांचे असल्याचे नेपाळ नॅशनल माउंटन गाइड असोसिएशनने सोशल मीडियावरच्या पोस्टमध्ये म्हटले आहे.

छेबी भोते आणि पसांग भोते या दोघांचे मृतदेह रविवारीच सापडले होते. विपरीत हवामान असूनही उर्वरित गिर्यारोहक आणि मदतनीसांच्या शोधासाठी शोध मोहिम सुरू असल्याचे संघटनेने म्हटले आहे.