कोशांबी: स्वातंत्र्य दिनानिमित्त देशभरात दरवर्षी  विविध कार्यक्रमांचे आयोजन करण्यात येते. यंदाही तीच प्रथा देशभरात राबवण्यात आली. दरम्यान,  उत्तर प्रदेशात अशाच एका कार्यक्रमात तुफान राडा झाल्याचे समोर आले आहे.  इथल्या कोशांबीचे आमदार संजय कुमार गुप्ता यांनी तिरंगा यात्रेचे आयोजन केले होते. भाजप कार्यकार्त्यांसाठी आमदार गुप्तांनी मोफत पेट्रोल ठेवले  होते. मात्र फुकट मिळणाऱ्या पेट्रोलसाठी भाजप कार्यकर्त्यांमध्येच तुफान राडा झाला असल्याचे सांगण्यात आले आहे.

तिरंगा यात्रेत गर्दी जमवण्यासाठी आमदार संजय कुमार गुप्तांनी मोफत पेट्रोल देण्याची घोषणा केली. त्यामुळे शेकडो लोक तिरंगा यात्रेत सहभागी होण्यासाठी पोहोचले. स्वत:चा जीव धोक्यात घालून लोक पेट्रोलच्या बाटल्या मिळवण्यासाठी धडपडत होते.आधी धक्काबुक्कीपर्यंत असलेले  प्रकरण नंतर थेट हाणामारीपर्यंत गेलं. कोखराज पोलीस ठाण्याच्या हद्दीत हा प्रकार घडला. यावेळी काही अनर्थ घडला असता, तर शेकडो लोकांच्या जीवावर बेतले असते. मात्र त्याची कोणतीही पर्वा न करता लोकांची मोफत पेट्रोलसाठी झुंबड उडाली.

कौशांबीतल्या चायल विधानसभा मतदारसंघाचे आमदार संजय कुमार गुप्ता यांनी स्वातंत्र्य दिनानिमित्त तिरंगा यात्रेचे आयोजन केले होते. यात्रेत मोठ्या संख्येने सहभागी होण्याचे आवाहन गुप्ता यांनी केले होते. भरवारीतल्या किड्सझी स्कूल कॅम्पसमधून यात्रा सुरू होणार होती. यात्रेत सहभागी होणाऱ्यांना मोफत पेट्रोल देण्याची घोषणा आमदारांनी केली होती.

पेट्रोलच्या हजारो बाटल्या स्कूल कॅम्पसमध्ये ठेवण्यात आल्या होत्या. तिरंगा यात्रेला सुरुवात करण्यापूर्वी बाटल्या मिळवण्यासाठी भाजप कार्यकर्त्यांनी गोंधळ घातला. परिसरात चेंगराचेंगरीसारखी परिस्थिती निर्माण झाली. पेट्रोलच्या बाटल्यांसाठी भाजप कार्यकर्ते भिडले. त्यांनी एकमेकांना मारहाणदेखील केली.