Tu Meri Main Tera Trailer: कार्तिक आर्यन आणि अनन्या पांडे यांच्या आगामी रोमँटिक-कॉमेडी चित्रपट ‘तू मेरी, मैं तेरा’ चा ट्रेलर अखेर प्रदर्शित झाला आहे. रिलीजच्या अवघ्या आठवडाभर आधी धर्मा प्रोडक्शनच्या अधिकृत यूट्यूब चॅनलवर हा ३ मिनिटे २१ सेकंदांचा ट्रेलर शेअर करण्यात आला आहे. ट्रेलरमध्ये दोघांची रोमँटिक केमिस्ट्री, हलकी-फुलकी कॉमेडी आणि मजेशीर संवाद पाहायला मिळतात. हा चित्रपट २५ डिसेंबर रोजी सिनेमागृहात प्रदर्शित होणार आहे. ट्रेलर रिलीज होताच सोशल मीडियावर प्रेक्षकांच्या संमिश्र प्रतिक्रिया येऊ लागल्या आहेत. कार्तिक-अनन्याची केमिस्ट्री प्रेक्षकांना भावली कार्तिक आर्यन आणि अनन्या पांडेच्या चाहत्यांना ट्रेलर खूप आवडला आहे. दोघांची ऑन-स्क्रीन केमिस्ट्री प्रेक्षकांच्या पसंतीस उतरली आहे. कार्तिक आर्यनचे संवाद चाहत्यांना विशेष भावले असून त्याच्या स्टाइलचं कौतुक केलं जात आहे. अनेक युजर्सनी चित्रपट रिलीजपूर्वीच ‘हिट’ ठरेल, असा अंदाज व्यक्त केला असून ख्रिसमस वीकएंडला धमाल माजवेल, असं म्हटलं आहे. काही प्रेक्षकांची टीकाही ट्रेलरला सकारात्मक प्रतिसाद मिळत असतानाच, काही युजर्सनी टीकाही केली आहे. काहींच्या मते ही एक नेहमीची प्रेमकथा असून त्यात फारसा नवा प्रयोग दिसत नाही. तर काही प्रेक्षकांनी चित्रपटाची आणखी गाणी लवकर रिलीज करण्याची मागणी केली आहे. धर्मा प्रोडक्शनने या चित्रपटाची निर्मिती केली असून कार्तिक आर्यन आणि अनन्या पांडे प्रमुख भूमिकेत दिसणार आहेत. आता चित्रपट रिलीज झाल्यानंतर बॉक्स ऑफिसवर तो कसा कामगिरी करतो, याकडे सर्वांचं लक्ष लागलं आहे.
