Strait of Hormuz : इराणसोबत सुरू असलेल्या युद्धाच्या पार्श्वभूमीवर अमेरिकेचे राष्ट्राध्यक्ष डोनाल्ड ट्रम्प यांनी स्ट्रेट ऑफ होर्मुजवरून मोठा दावा केला आहे. इराणचा पराभव केल्यानंतर स्ट्रेट ऑफ होर्मुजला अमेरिकेचा भूभाग घोषित करण्याची योजना असल्याचे ट्रम्प यांनी म्हटले आहे. लॉन्ग आयलँड येथे झालेल्या रिपब्लिकन पक्षाच्या रॅलीत त्यांनी हे वक्तव्य केले.

ट्रम्प यांनी इराण सध्या मोठ्या प्रमाणात कमकुवत होत असल्याचा दावा केला. युद्ध संपल्यानंतर होर्मुजवर अमेरिकेचे नियंत्रण कायम ठेवण्याचे संकेतही त्यांनी दिले. यापूर्वी ट्रम्प यांनी अमेरिकेचे होर्मुजवर ‘पूर्ण नियंत्रण’ असल्याचे म्हटले होते. तसेच अमेरिकेची नौदल नाकेबंदी ही ‘स्टीलची भिंत’ असल्याचे सांगत इराण त्याविरोधात काहीही करू शकत नसल्याचा दावा त्यांनी केला होता.

इराणचे लष्करी सामर्थ्य कमकुवत झाल्याचा दावा करताना ट्रम्प यांनी तेहरानवर महागाई आणि केवळ वक्तव्यांपुरते मर्यादित राहिल्याचा आरोपही केला.

दरम्यान, ट्रम्प यांच्या दाव्याला इराणने तातडीने प्रत्युत्तर दिले आहे. अमेरिकेचे अधिकारी वारंवार होर्मुज सामुद्रधुनी बंद नसल्याचे सांगत असले, तरी त्यामुळे प्रत्यक्ष परिस्थितीत कोणताही बदल होत नाही, होर्मुज अद्याप बंद असून, आपल्या अटी मान्य झाल्याशिवाय तो खुला केला जाणार नाही, असे इराणने म्हंटले आहे.

होर्मुज सामुद्रधुनी हा जगातील महत्त्वाच्या रणनीतिक समुद्री मार्गांपैकी एक आहे. या भागातील तणाव वाढल्यास जागतिक कच्च्या तेलाच्या किमती आणि ऊर्जा बाजारावर मोठा परिणाम होत असतो. सध्याच्या परिस्थितीत समुद्री सुरक्षाही वाढवण्यात आली आहे. काही व्यापारी जहाजांनी मार्ग बदलले असून, आंतरराष्ट्रीय पातळीवर संयमाचे आवाहन केले जात आहे.

महत्त्वाच्या या समुद्री मार्गातून व्यावसायिक जहाजांची वाहतूक कडक सुरक्षा निगराणीखाली सुरू असली, तरी अमेरिका आणि इराणमधील तणावामुळे परिसरातील परिस्थिती अद्याप अत्यंत अस्थिर आहे.