Rahul Dravid On Reward By BCCI : – खेळाडू म्हणून अपूर्ण राहिलेली द्रविडची विश्वचषक जिंकण्याची इच्छा प्रशिक्षक म्हणून पूर्ण झाली. अर्थात भारतीय संघाला वर्ल्ड चॅम्पियन बनवल्यानंतरही द्रविडचे पाय जमिनीवरच आहेत तसेच टीम इंडियाचे माजी प्रशिक्षक राहुल द्रविडला जेंटलमन का म्हणतात, हे त्याने त्याच्या कृतीतून पुन्हा एकदा सिद्ध केलं आहे. यानंतर त्याच्यावर सर्व स्तरातून कौतुकाचा वर्षाव होत आहे. नेमकं राहुल द्रविड याने अशी काय कृती केली आहे ते सविस्तर जाणून घेऊया….

भारतीय संघाचे प्रशिक्षक म्हणून राहुल द्रविड टी-20 विश्वचषकानंतर पदावरून पायउतार झाले आहेत. यादरम्यानच द्रविड यांनी बीसीसीआयने टी-20 विश्‍वचषकसाठी बक्षीस म्हणून दिलेली अतिरिक्त रकमेतील निम्मी रक्कम न घेण्यचा निर्णय घेतला आहे. बीसीसीआयने टी-२० विश्वचषक विजेत्या संघासाठी 125 कोटींची बक्षिसाची रक्कम जाहीर केली आहे. यापैकी 5 कोटी रूपये हे खेळाडू आणि मुख्य प्रशिक्षक यांना दिले जाणार आहेत. पण या 5 कोटी रुपयांच्या बक्षीस रकमेपैकी निम्मी रक्कम द्रविड घेणार नसल्याचे समोर आले आहे.

रोहित शर्माच्या नेतृत्त्वाखालील भारतीय संघाने अंतिम फेरीत दक्षिण आफ्रिकेचा पराभव करून टी-20 विश्वचषक 2024 चे विजेतेपद पटकावले. या ऐतिहासिक विजयानंतर संघ, कोचिंग स्टाफ आणि सपोर्ट स्टाफला एकूण 125 कोटी रुपये बक्षीस म्हणून देण्यात येणार असल्याचे बीसीसीआयने जाहीर केले. संघातील खेळाडूंच्या बरोबरीने मुख्य प्रशिक्षक राहुल द्रविड यांना 5 कोटी रुपये देण्याचीही चर्चा होती, तर संघाच्या इतर प्रशिक्षकांना अडीच कोटी रुपये देण्यात येणार होते. पण द्रविड यांनी बोर्डाला त्यांच्या बक्षीसाची रक्कम 2.5 कोटी रुपये कमी करण्यास सांगितले.

या मागचे कारण खूप खास आहे, ते म्हणजे राहुल द्रविड यांना त्याच्या कोचिंग स्टाफच्या बक्षीस रकमेपेक्षा अधिक रक्कम घ्यायची नाही. अहवालानुसार, बीसीसीआयच्या एका सूत्राने सांगितले, राहुलला त्याच्या उर्वरित सपोर्ट स्टाफ (गोलंदाजी प्रशिक्षक पारस म्हांब्रे, क्षेत्ररक्षण प्रशिक्षक टी दिलीप आणि फलंदाजी प्रशिक्षक विक्रम राठौर) प्रमाणेच बोनस रक्कम (2.5 कोटी रुपये) मिळावी, अशी त्यांची इच्छा आहे आणि त्यांच्या भावनांचा आम्ही आदर करतो.

T20 World Cup 2024 : खेळाडूंना मिळते सापत्न वागणूक, महाराष्ट्र सरकारवर बॅडमिंटनपटू चिराग शेट्टीचा हल्लाबोल…

2018 मध्येही दाखवला होता दिलदारपणा…

2018 मध्ये भारताच्या 19 वर्षांखालील विश्वचषक विजेत्या संघाचे मुख्य प्रशिक्षक म्हणून द्रविड यांनी नेमके हेच केले होते. त्यावेळी द्रविडला 50 लाख रुपये, तर सपोर्ट स्टाफच्या इतर सदस्यांना प्रत्येकी 20 लाख रुपये मिळणार होते. खेळाडूंना प्रत्येकी 30 लाख रुपये मिळणार होते, पण द्रविडने बक्षीस रकमेचे असे विभाजन करण्यास नकार दिला आणि त्यामुळे बीसीसीआयला प्रत्येकाला समान रक्कम देण्यास भाग पाडले. त्यानंतर बीसीसीयने रोख पुरस्कारांची सुधारित यादी जारी केली, ज्यामध्ये द्रविडसह सपोर्ट स्टाफच्या प्रत्येक सदस्याला 25 लाख रुपये मिळाले.