Truck Accident – राष्ट्रीय महामार्ग ५४८ डी वर सुरू असलेल्या सिमेंट काँक्रिट रस्त्याच्या कामादरम्यान तळेगाव ढमढेरे येथील एन. पी. पेट्रोल पंपासमोर बुधवारी (दि. २४) दुपारी एक ट्रक उलटल्याची घटना घडली. रस्त्याचे काम सुरू असल्यामुळे या मार्गावरील वाहतूक वळविण्यात आली असली तरी, सुरक्षिततेच्या उपाययोजनांकडे दुर्लक्ष झाल्याने हा अपघात घडल्याचे समोर आले आहे. सुदैवाने, या घटनेत ट्रक चालकासह कोणालाही दुखापत झाली नाही, मात्र काही काळ परिसरात गोंधळाचे वातावरण निर्माण झाले होते. मिळालेल्या माहितीनुसार, पेट्रोल पंपासमोरील भागात सध्या बंदिस्त गटार लाईनचे काम सुरू आहे. या ठिकाणी रस्त्याची पुरेशी मजबुती नसतानाही अवजड वाहनांची वाहतूक सुरू ठेवण्यात आली होती. दरम्यान, एक ट्रक या मार्गावरून जात असताना त्याचे चाक रस्त्याच्या कडेला असलेल्या खचलेल्या भागात गेले. जमिनीचा आधार नसल्यामुळे चाक अचानक रुतले आणि ट्रकचा समतोल बिघडून तो रस्त्यातच उलटला. स्थानिक नागरिकांनी तातडीने घटनास्थळी धाव घेत मदतकार्य केल्याने मोठी जीवितहानी टळली. या घटनेनंतर स्थानिक ग्रामस्थांनी संबंधित ठेकेदाराच्या प्रतिनिधीला जाब विचारत तीव्र संताप व्यक्त केला. कामाच्या ठिकाणी आवश्यक सूचना फलक नसणे, धोकादायक भागांची मजबुती न तपासणे आणि धूळ नियंत्रणासाठी वेळेवर पाणी न मारणे अशा अनेक तक्रारी नागरिकांनी केल्या आहेत. भविष्यात असे अपघात टाळण्यासाठी प्रशासनाने तातडीने बॅरिकेड्स उभारणे, सुरक्षित पर्यायी मार्ग निश्चित करणे आणि कामाच्या ठिकाणाची नियमित तपासणी करणे गरजेचे असल्याचे मत नागरिकांनी व्यक्त केले आहे.
