शिरूर (अरूणकुमार मोटे) – भाजपा शिरूर शहराध्यक्ष नितीन पाचर्णे यांनी शहराध्यक्षपदाचा तडकाफडकी राजीनामा दिल्यानंतर त्यांच्या समर्थनार्थ शिरूरमधी‌ल भाजपच्या महीला मोर्चा आघाडीच्या अध्यक्ष प्रिया बिराजदार व सरचिटणिस शुभांगी पाचर्णे यांच्या सहीत १६ महीला पदाधिकाऱ्यांचे राजीनामे तालुका अध्यक्ष आबासाहेब सोनवणे यांच्याकडे दि. ०५ जुलै रोजी निसर्ग गार्डन मंगल कार्यालयात पक्षाच्या मिटींगमध्ये सुपुर्द करण्यात आल्याने खळबळ माजली आहे. त्यामुळे भाजपचा बालेकिल्ला शिरुरमधून उध्वस्त होऊ लागला आहे.

पक्ष पदाधिकाऱ्यांना कोणतेही सहकार्य करत नाही. वरीष्ठ पदाधिकारी फोन उचलत नाही. शासकीय अधिकाऱ्यांशी जनतेच्या कामांसंदर्भात कुठलाही संपर्क करत नाही. या कारणामुळे शिरूर शहरातील पदाधिकाऱ्यांनी तडकाफडकी राजीनामे दिल्याचे महीला आघाडी सरचिटणिस शुभांगी पाचर्णे यांनी सांगितले आहे.

नुकत्याच झालेल्या लोकसभा निवडणुकीत भाजपा शहर पदाधिकारी यांनी केलेली कामगिरी कौतुकाची होती. शिरुर तालुक्यातील मताधिक्यापेक्षा शिरूर शहरातील मताधिक्य खाजदार अमोल कोल्हे यांना त्या तुलनेत फार कमी झाले आहे. या साठी भाजपा पदाधिकाऱ्यांनी मोलाचे कष्ट केले होते.

आता येणाऱ्या आगामी विधानसभा, जिल्हा परीषद पंचायत समिती, नगर परिषद निवडणुकीत भाजपाचा बुरुंज ढासळत असल्याने राजकारणात अनेक नवीन बदल पाहवायास मिळतील हे नक्की..