Tripti Dimri: ‘लैला मजनू’, ‘बुलबुल’ आणि ‘कला’ या चित्रपटांमधील दमदार अभिनयाने प्रेक्षकांच्या मनात घर करणारी अभिनेत्री तृप्ती डिमरी सध्या तिच्या आगामी चित्रपट ‘ओ रोमियो’ मुळे चर्चेत आहे. विशाल भारद्वाज दिग्दर्शित हा चित्रपट 13 फेब्रुवारी 2026 रोजी प्रदर्शित होत असून, त्यानिमित्ताने दिलेल्या एका खास मुलाखतीत तिच्या आयुष्यातील अनेक गोष्टी मनमोकळेपणाने सांगितल्या. तृप्तीने सांगितलं की, तिने ‘लैला मजनू’सारख्या तीव्र प्रेमकथेने अभिनय कारकिर्दीची सुरुवात केली असली, तरी प्रत्यक्ष आयुष्यात ती वेड्या प्रेमावर विश्वास ठेवत नाही. “प्रत्येकाची प्रेमाबद्दलची दृष्टी वेगळी असते. मला मात्र फक्त खऱ्या प्रेमावर विश्वास आहे. अतीव प्रेम मला फारसं कळत नाही,” असं ती म्हणाली. तिचा चित्रपट व्हॅलेंटाईन डेच्या आसपास प्रदर्शित होत असला, तरी त्या दिवसाचं तिला विशेष आकर्षण नसल्याचंही तिने स्पष्ट केलं. Tripti Dimri कारकिर्दीच्या सुरुवातीच्या काळात तृप्तीने तीन वर्षांत तीन चित्रपट केले. मात्र ‘एनिमल’च्या यशानंतर तिच्या वाट्याला एकामागोमाग एक चित्रपट येत आहेत. 2024 मध्ये ती ‘बॅड न्यूज’, ‘विकी विद्या का वो वाला व्हिडिओ’ आणि ‘भूल भुलैया 3’ मध्ये झळकली. पुढे ‘ओ रोमियो’सोबतच ‘स्पिरिट’ आणि ‘मां बहन’सारख्या मोठ्या चित्रपटांमध्येही ती दिसणार आहे. याबद्दल बोलताना ती म्हणाली, “आता दर चौथ्या-पाचव्या चित्रपटासाठी माझ्याकडे ऑफर येते, हेच माझ्यासाठी मोठं समाधान आहे. कारण मी बराच मोठा प्रतीक्षेचा काळ पाहिला आहे.” संघर्षाच्या दिवसांविषयी बोलताना तृप्ती म्हणाली की, ऑडिशनसाठी फिरण्याचे दिवसही तिला तितकेच आनंद देणारे होते. “त्या काळातही मी आनंदी होते. आज जे चाललंय त्याचाही वेगळाच आनंद आहे. संघर्षाचे दिवस नसते, तर कदाचित आजच्या यशाची किंमत मला इतकी कळली नसती,” असं तिने प्रामाणिकपणे सांगितलं. Tripti Dimri अभिनेत्री होण्याचा निर्णय घेतला, तेव्हा तिच्या पालकांना खूप भीती वाटत होती, असा खुलासाही तृप्तीने केला. “त्यांना वाटायचं की मी अभ्यास टाळण्यासाठी अभिनयाकडे वळतेय,” असं सांगत ती हसली. मात्र आज तिचं यश पाहून पालकांना तिचा प्रचंड अभिमान वाटतो. “आता ते खूप आनंदी आहेत. कधी कधी माझे इंटरव्ह्यू स्वतःहून लावून पाहतात, तेव्हा मला थोडी लाज वाटते. पण ते खुश आहेत, आणि त्यामुळे मीही खुश आहे,” असं ती म्हणाली. ‘ओ रोमियो’ चित्रपटातील तिच्या भूमिकेबद्दल बोलताना तृप्तीने दिग्दर्शक विशाल भारद्वाज यांचं विशेष कौतुक केलं. “त्यांच्यासोबत काम करणं म्हणजे एक प्रकारची अभिनय कार्यशाळाच आहे. कधी कधी ते तुम्हाला खोल समुद्रात सोडतात. तुम्हाला वाटतं, सीन समजला आहे, पण पुढच्याच क्षणी लक्षात येतं की अजून खूप काही शिकायचं आहे,” असं तृप्तीने सांगितलं.
