नवी दिल्ली : केंद्र सरकारने संसदेचे विशेष अधिवेशन बोलावले असून येत्या 18 सप्टेंबरपासून ते २२  22 सप्टेंबरपर्यंत हे अधिवेशन सुरू राहणार आहे. 19 तारखेला हे अधिवेशन नव्या इमारतीत शिफ्ट होणार असल्याचे सांगण्यात येत असले तरी त्याआधी 17 सप्टेंबर  पंतप्रधान नरेंद्र मोदी यांचा वाढदिवस  आहे आणि याच दिवशी नव्या संसद इमारतीवर तिरंगा फडकवण्याचा सोहळा पार पडणार असल्याचे सांगण्यात येत आहे.त्यासोबतच संसदेच्या नव्या इमारतीत विश्वकर्मा पूजा देखील करण्यात येणार असल्याची माहिती समोर येत आहे.

एका वृत्तवाहिनीने याविषयी महिती दिली आहे. त्यानुसार केंद्रीय लोक निर्माण विभागाने नवी इमारत बांधली आहे. नव्या संसदेत तीन प्रवेशद्वार आहेत . या तीन प्रवेशद्वारापैकी एक मुख्य प्रवेशद्वार असणाऱ्या गजद्वारासमोर ध्वजारोहण सोहळा पार पडणार आहे. उद्घाटानंतर पार पडणारा हा पहिलाच सोहळा आहे. 18 ते 22 सप्टेंबरला विशेष अधिवेशन संसदेच्या जुन्या इमारतीत सुरू होणार आहे. नव्या संसदेत उद्घाटनानंतर होणारा हा पहिला कार्यक्रम आहे. नव्या संसदेचे उद्घाटन 28 मे रोजी पंतप्रधान नरेंद्र मोदींनी केले होते.

दरम्यान, पंतप्रधान नरेंद्र मोदींच्या वाढदिवसानिमित्त भाजपकडून जोरदार तयारी केली जात आहे. येऊ घातलेल्या निवडणुकांच्या पार्श्वभूमीवर यंदा मुंबईत नरेंद्र मोदी यांचा वाढदिवस धुमधडाक्यात साजरा करण्याचे नियोजन भाजपने सुरु केले आहे. मोदींच्या वाढदिवसाच्या निमित्ताने भाजप सक्रिय होणार आहे.

मुंबईत जनसामान्यांपर्यंत पोहचण्यासाठी 15 दिवस कार्यक्रमांची रेलचेल असणार आहे. रक्तदान शिबीर, आयुष्यमान भारत कार्डचे वाटप, स्वच्छता मोहीमांचा धडाका असणार आहे. तसेच खासदारांपासून आमदार, नगरसेवक, जिल्हा अध्यक्ष, मंडल अध्यक्षांना कार्यक्रमाचे आयोजन करण्याचे आदेश देण्यात आले आहेत. अधिकाधिक सर्वसामान्य नागरिकांना कार्यक्रमात सामील करून घेण्याचे आदेश आहेत. पंतप्रधान नरेंद्र मोदींच्या वाढदिवसापासून महात्मा गांधींच्या जयंतीपर्यंत कार्यक्रम सुरु राहणार आहे. दरवर्षी पंतप्रधानांच्या वाढदिवशी अशा प्रकारच्या कार्यक्रमांचे आयोजन करण्यात येत असते त्याप्रमाणेच यंदा देखील त्याच उत्साहात भाजपकडून जोरात तयारी सुरु असल्याचे दिसून येत आहे .