राजगुरुनगर : भारतीय स्वातंत्र्यलढ्यातील थोर क्रांतिकारक हुतात्मा शिवराम हरी राजगुरू यांची 118वी जयंती राजगुरुनगर शहरासह खेड तालुक्यात सोमवारी (दि. 24) विविध उपक्रमांनी आणि उत्साहपूर्ण वातावरणात साजरी करण्यात आली. शहरातील हुतात्मा राजगुरू, भगतसिंग आणि सुखदेव यांच्या स्मृतीशिल्पांना पुष्पहार अर्पण करून मान्यवरांनी अभिवादन केले.

राजगुरुनगर एसटी बसस्थानक आवारातील स्मृतीशिल्पस्थळी आमदार बाबाजी काळे, जिल्हा परिषदेचे उपाध्यक्ष विवेक वळसे पाटील, खेड तालुका शिक्षण प्रसारक मंडळाचे अध्यक्ष अ‍ॅड. देवेंद्र बुट्टेपाटील, जिल्हा सहकारी बोर्डाचे अध्यक्ष हिरामण सातकर, खेड पंचायत समितीच्या सभापती विद्याताई मोहिते, बाजार समितीचे सभापती अशोक राक्षे, माजी सभापती तथा जिल्हा परिषदेचे गटनेते अ‍ॅड. विजयसिंह शिंदे पाटील, बाळासाहेब सांडभोर, विजया शिंदे, प्रांताधिकारी अनिल दौंडे, गटविकास अधिकारी विशाल शिंदे, हुतात्मा राजगुरू महाविद्यालयाचे प्राचार्य डॉ. शिरीष पिंगळे, अ‍ॅड. मनिषा टाकळकर आदींनी पुष्पहार अर्पण करून अभिवादन केले.

हुतात्मा राजगुरू महाविद्यालयाच्या राष्ट्रीय छात्र सेनेच्या पथकाने यावेळी मानवंदना दिली. महात्मा गांधी विद्यालय आणि हुतात्मा राजगुरू विद्यालयातील विद्यार्थ्यांनी शहरातून प्रभात फेरी काढली. ‘राजगुरू अमर रहे’च्या घोषणांनी शहराचा परिसर दुमदुमून गेला. या अभिवादन कार्यक्रमाचे आयोजन हुतात्मा राजगुरू प्रतिष्ठानचे अध्यक्ष कोंडिबा टाकळकर, अ‍ॅड. मुकुंद आवटे, अशोक दुगड आदींनी केले. राजगुरुनगर सहकारी बँकेत अध्यक्ष सागर पाटोळे, उपाध्यक्ष रामदास धनवटे, अरुण थिगळे, अविनाश कहाणे यांनी हुतात्मा राजगुरू यांच्या पुतळ्यास पुष्पहार अर्पण करून अभिवादन केले.

जन्मस्थळ राष्ट्रीय स्मारकात ध्वजारोहण

हुतात्मा राजगुरू यांच्या जन्मस्थळ राष्ट्रीय स्मारकात प्रांताधिकारी अनिल दौंडे यांच्या हस्ते ध्वजारोहण करण्यात आले. यावेळी हुतात्मा राजगुरू यांचे वंशज सत्यशील राजगुरू, प्रशांत राजगुरू, गिर्यारोहक सुविधा कडलग, तहसीलदार प्रशांत बेडसे, राजगुरुनगर नगर परिषदेचे मुख्याधिकारी अंबादास गर्कळ, उपनगराध्यक्ष मनोहर सांडभोर, भाजप तालुका अध्यक्ष शांताराम भोसले, सभापती विद्याताई मोहिते, उपसभापती मंगेश सावंत, माजी नगरसेवक प्रदीप कासवा, शिवसेनेच्या जिल्हा महिला संघटक विजया शिंदे, हुतात्मा राजगुरू स्मारक समितीचे अध्यक्ष अतुल देशमुख, सुशिल मांजरे, प्रकाश पाचारणे, रेखा क्षोत्रीय, सतीश चांभारे, वैभव नाईकरे यांच्यासह नगरसेवक व नागरिक मोठ्या संख्येने उपस्थित होते.

हुतात्मा राजगुरू आणि त्यांचे क्रांतिकारी सहकारी भगतसिंग व सुखदेव हे स्वातंत्र्यपूर्व काळातील युवकांचे प्रेरणास्थान होते. आजच्या विद्यार्थी व युवकांना त्यांच्या विचारांची प्रेरणा मिळत असून, नव्या पिढीतील युवकांची ऊर्जा आणि परिवर्तनाची इच्छाशक्ती नव्या सामाजिक क्रांतीचे द्योतक ठरत आहे.
– अ‍ॅड. विजयसिंह शिंदे, जि. प. सदस्य