भोर : भोर-महाड रस्त्यावरील आपटी (ता. भोर) येथील एसटी बसथांब्याची अवस्था दयनीय झाली असून, प्रवाशांना जीव मुठीत धरून बसची वाट पाहावी लागत आहे. काँक्रिटच्या या शेडच्या भिंतींवर शेवाळाचा थर साचला असून, छतावर अर्धा-एक फूट उंच गवत व झुडपे उगवली आहेत. बसथांब्याच्या आत अस्वच्छता आणि सापांसारख्या विषारी प्राण्यांचा वावर वाढल्याने प्रवाशांना नाईलाजास्तव रस्त्याच्या कडेला ताटकळत उभे राहावे लागत आहे.

आपटी येथील बसथांब्याचे शेड जीर्ण झाले असून, छताला भेगा पडल्याने पावसाचे पाणी आत गळत आहे. भिंतींमधील सततच्या ओलाव्यामुळे सर्वत्र उग्र दुर्गंधी पसरली असून, डास व इतर कीटकांचा प्रादुर्भाव झाला आहे. इतकेच नव्हे तर, शेडमधील तुटलेल्या फरश्यांमधून पडलेल्या भेगांमध्ये विषारी सापांनी आसरा घेतला आहे. यामुळे शेडमध्ये थांबणे म्हणजे आजाराला आणि धोक्याला आमंत्रण देण्यासारखे झाले आहे.

या गंभीर समस्येचा सर्वाधिक फटका रुग्ण, ज्येष्ठ नागरिक आणि शाळकरी विद्यार्थ्यांना बसत आहे. पावसाळ्यात छत्रीचा आधार घेऊन आणि उन्हाळ्यात तीव्र चटका सहन करत प्रवाशांना ताटकळावे लागते. कडक उन्हामुळे काही ज्येष्ठ नागरिक व रुग्णांना चक्कर आल्याचे प्रकारही घडले आहेत. या परिस्थितीकडे लोकप्रतिनिधी आणि संबंधित प्रशासनाचे पूर्णपणे दुर्लक्ष होत असल्याने नागरिकांमधून तीव्र संताप व्यक्त होत आहे.

बसथांब्याचे शेड अत्यंत जीर्ण झाले असून त्याचा पाया खचला आहे. दुरावस्थेमुळे प्रवाशांचे प्रचंड हाल होत आहेत. नागरिकांची ही गैरसोय थांबवण्यासाठी प्रशासनाने या ठिकाणी तातडीने नवीन बसथांब्याचे शेड उभारावे अशी मागणी ग्रामस्थांकडून होत आहे.
– अविनाश गायकवाड, माजी उपसरपंच, आपटी.