मंचर : कळंब (ता.आंबेगाव) येथे पुणे-नाशिक महामार्गावरून चक्क कंटेनर ट्रेलरवर रेल्वेचा डबा मंगळवार, दि.२२ रोजी सकाळी जाताना दिसल्याने नागरिकांमध्ये कुतूहल निर्माण झाले.रस्त्यावरून रेल्वेचा डबा जात असल्याचे दृश्य पाहण्यासाठी अनेकांनी गर्दी केली.

कळंबचे माजी उपसरपंच डॉ. सचिन भालेराव हे मुलांना शाळेत सोडण्यासाठी जात असताना त्यांना हा अनोखा प्रकार दिसला.पुण्याच्या दिशेने नाशिककडे एका अवाढव्य कंटेनर ट्रेलरवर रेल्वेचा संपूर्ण डबा नेण्यात येत होता. डॉ.भालेराव यांनी या दृश्याचे मोबाईलमध्ये चित्रीकरण केले.लहान मुलांनी ‘रेल्वे आली, रेल्वे आली’ असे म्हणत आनंद व्यक्त केला. मात्र, आंबेगाव तालुक्यातून जाणाऱ्या प्रस्तावित पुणे-नाशिक रेल्वे प्रकल्पाच्या पार्श्वभूमीवर या घटनेची परिसरात चर्चा रंगली.

अनेक वर्षांपासून या भागातील नागरिक आणि शेतकरी पुणे-नाशिक रेल्वेची प्रतीक्षा करीत आहेत. त्यामुळे प्रत्यक्ष रेल्वेचा डबा रस्त्यावरून जाताना पाहून नागरिकांनी आश्चर्य व्यक्त केले. रेल्वेचा हा डबा दुरुस्ती अथवा अन्य कारणासाठी दुसऱ्या ठिकाणी नेला जात असावा, असा प्राथमिक अंदाज व्यक्त केला जात आहे. मात्र, या अनोख्या दृश्यामुळे कळंब परिसरात दिवसभर चर्चा सुरू होती.

 

“पुणे-नाशिक रेल्वे आमच्या भागातील शेतकरी, विद्यार्थी आणि कामगारांसाठी अत्यंत महत्त्वाची आहे. रेल्वेचा डबा रस्त्यावरून जाताना अनेकांनी पाहून आनंदही झाला आणि आपल्या रेल्वेच्या प्रतीक्षेची आठवणही झाली.
– प्रा.दत्तात्रय भालेराव,अध्यक्ष आंबेगाव तालुका मित्र मंडळ, पुणे.