Traffic Update – पिंपरी-चिंचवड शहरातील मेट्रो स्टेशन क्रमांक १० येथे स्कायवॉक (फुट ओव्हर ब्रिज) उभारणीचे काम हाती घेण्यात आले आहे. या कामासाठी मुंबई–बेंगळुरू महामार्गावरील मुख्य मार्गावरील वाहतूक तात्पुरती बंद करून ती शेजारील सेवा रस्त्यावरून वळविण्याचा निर्णय वाहतूक शाखेने घेतला आहे. त्यामुळे वाहनचालकांनी पर्यायी मार्गांचा वापर करावा, असे आवाहन करण्यात आले आहे. पिंपरी-चिंचवड शहरातील वाहतूक सुरक्षित व सुरळीत राहावी यासाठी वाहतूक शाखेकडून ही अधिसूचना जारी करण्यात आली आहे. मेट्रो स्टेशन क्रमांक १० येथे स्कायवॉकचे काम सुरू असल्यामुळे काही काळासाठी मुख्य महामार्गावरील वाहतूक रोखून ती सेवा रस्त्यांवरून वळविण्यात येणार आहे. या बदलामुळे मुंबईकडून साताऱ्याकडे तसेच साताऱ्याकडून मुंबईकडे जाणाऱ्या वाहनांना मुख्य मार्गाचा वापर करता येणार नाही. या कालावधीत सर्व प्रकारची वाहने महामार्गाशेजारील सेवा रस्त्याचा वापर करून आपल्या इच्छित स्थळी जाऊ शकतील. काम सुरू असताना वाहनचालकांना अडचण होऊ नये म्हणून ठिकठिकाणी मार्गदर्शक फलक लावण्यात येणार असून बॅरिकेडिंग व ट्रॅफिक वॉर्डनची नियुक्तीही करण्यात येणार आहे. वाहतूक बदलाची अंमलबजावणी निश्चित कालावधीत करण्यात येणार असून वाहनचालकांनी वाहतूक पोलिस सूचनांचे पालन करून सहकार्य करावे, असे आवाहन वाहतूक शाखेचे पोलीस उपआयुक्त विवेक पाटील यांनी केले आहे.
