गंगोत्री : देशभर उन्हाळ्याच्या झळा सुरु झालेल्या असताना उत्तराखंडमध्ये अजूनही हिमवर्षावाच्या बातम्या येत आहेत. उत्तराखंडमध्ये नुकत्याच झालेल्या पावसामुळे आणि बर्फवृष्टीमुळे हवामान थंड झाले आहे. डोंगरांमधील रस्ते अजूनही बंद आहेत.

तिसऱ्या दिवशीही गंगोत्री महामार्गावर सामान्य वाहनांची वाहतूक सुरळीत झालेली नाही. सीमा रस्ते विभागाच्या मते, फक्त टूव्हीलर्स अथवा छोटी वाहनेच या रस्त्याने जाऊ शकतात. सुकी टॉप ते झाला आणि हर्षिल दरम्यान सुमारे एक फूट बर्फवृष्टीमुळे बीआरओला अडचणी येत आहेत.

बर्फवृष्टीनंतर, हनुमान चट्टीच्या पलीकडे बर्फवृष्टीमुळे बद्रीनाथ महामार्ग बंद करण्यात आला आहे. भापकुंडच्या पलीकडे असलेल्या मलारी महामार्गावर आणि कांचुलखर्कच्या पलीकडे असलेल्या चमोली-उखीमठ महामार्गावरही वाहनांची वाहतूक बंद आहे. सुनील गावाच्या पलीकडे औली रस्ताही बंद आहे. बद्रीनाथ धाममध्ये सुमारे तीन फूट आणि हेमकुंड साहिबमध्ये चार फूट बर्फ जमा झाला आहे. व्हॅली ऑफ फ्लॉवर्स, औली, गोरसन आणि इतर उंच भागात जोरदार बर्फवृष्टी झाली आहे.