Pune District : पुणे-नाशिक महामार्गावर वाहतूक कोंडीचा कहर
Pune District : दिवाळीच्या सुट्ट्यांसाठी गावी गेलेले नागरिक, पर्यटनासाठी बाहेर पडलेले पर्यटक आणि सुट्ट्या संपवून कामावर परतणारे कर्मचारी रविवारी मोठ्या संख्येने पुण्याच्या दिशेने निघाले होते.

राजगुरुनगर :दिवाळीच्या सुट्ट्या संपवून पुण्याच्या दिशेने परतणाऱ्या नागरिकांना रविवारी पुणे-नाशिक राष्ट्रीय महामार्गावर वाहतूक कोंडीचा मोठा फटका बसला. राजगुरुनगरपासून चाकण, कुरुळी, चिंबळी ते मोशीपर्यंत वाहनांच्या लांबच लांब रांगा लागल्याने संपूर्ण महामार्गावर वाहतुकीचा खोळंबा झाला. दुपारी तीन ते रात्री नऊ वाजेपर्यंत अनेक रुग्णवाहिकाही या कोंडीत अडकून पडल्याने परिस्थितीचे गांभीर्य वाढले. नोकरदार, कामगार, शासकीय अधिकारी, माहेरवाशिणी आणि विद्यार्थ्यांना तासन् तास रस्त्यावरच थांबावे लागल्याने प्रवाशांमध्ये तीव्र नाराजी व्यक्त होत आहे.
दिवाळीच्या सुट्ट्यांसाठी गावी गेलेले नागरिक, पर्यटनासाठी बाहेर पडलेले पर्यटक आणि सुट्ट्या संपवून कामावर परतणारे कर्मचारी रविवारी मोठ्या संख्येने पुण्याच्या दिशेने निघाले होते. त्यामुळे सकाळपासूनच महामार्गावर वाहनांचा ताण वाढला. दुपारनंतर वाहतुकीचा वेग अधिकच मंदावला आणि सायंकाळपर्यंत वाहनांच्या रांगा वाढत गेल्या. काही किलोमीटरचे अंतर पार करण्यासाठी वाहनचालकांना कित्येक तास लागले. कामावर वेळेत पोहोचण्याच्या नियोजनाचा फज्जा उडाला, तर लहान मुले, महिला आणि ज्येष्ठ नागरिकांचेही मोठे हाल झाले.
राजगुरुनगर बाह्यवळण, शिरोली गावाजवळील पाइट फाटा, वाकी येथील आंबेठाण फाटा, चाकण-तळेगाव चौक, आळंदी फाटा, स्पायसर कंपनी चौक, कुरुळी फाटा, चिंबळी फाटा आणि मोशी चौक या प्रमुख ठिकाणी वाहतुकीचा खोळंबा झाला. राजगुरुनगरपासून मोशीपर्यंत संपूर्ण मार्गावर कोंडीचे चित्र निर्माण झाले होते. वाहतूक सुरळीत करण्यासाठी पोलिसांना मोठी कसरत करावी लागली. मात्र, अपुरे मनुष्यबळ आणि वाहनांची प्रचंड संख्या यामुळे कोंडी सोडविण्यात अडथळे निर्माण झाले.
विशेष म्हणजे, राजगुरुनगर-चाकण हा मार्ग आता केवळ सणासुदीच्या काळातच नव्हे, तर दर शनिवार आणि रविवारी वाहतूक कोंडीचा हॉटस्पॉट बनत आहे. वाहनचालकांमधील पुढे जाण्याची स्पर्धा, बेशिस्त वाहन चालविणे, नियमांचे उल्लंघन आणि स्थानिक पातळीवरील वाहतूक नियोजनाचा अभाव यामुळे परिस्थिती अधिक बिकट होत आहे. महामार्गावर वाहनांची संख्या दिवसेंदिवस वाढत असताना रस्त्यांची क्षमता आणि वाहतूक व्यवस्थेत त्या प्रमाणात सुधारणा झालेली नाही. त्यामुळे रस्ते तेवढेच आणि वाहनांची संख्या मात्र वाढत असल्याने महामार्ग अपुरा पडत आहे.
रुग्णवाहिकाही सहा तास अडकल्या
चाकणमधील वाहतूक कोंडीची समस्या आता राजगुरुनगर, वाकी आणि शिरोलीपर्यंत विस्तारली आहे. दर आठवड्याला हजारो प्रवाशांना या समस्येला सामोरे जावे लागत असतानाही गेल्या अनेक वर्षांत कायमस्वरूपी उपाययोजना झालेल्या नाहीत. विशेषतः रुग्णवाहिकांना सहा तासांपर्यंत कोंडीत अडकून राहावे लागण्याची परिस्थिती गंभीर असून, आपत्कालीन रुग्णांच्या उपचारात विलंब होण्याचा धोका निर्माण झाला आहे.
रुग्णवाहिकांनाही मार्ग मिळत नसेल, तर महामार्गावरील वाहतूक व्यवस्थेचे नियोजन नेमके कोणासाठी? असा संतप्त सवाल नागरिकांकडून उपस्थित केला जात आहे. या मार्गावरील वाहतूक कोंडीवर तातडीने ठोस आणि कायमस्वरूपी उपाययोजना करण्याची मागणी होत आहे.
चाकणनंतर राजगुरुनगर, वाकी, शिरोलीही कोंडीच्या विळख्यात!
चाकणची वाहतूक कोंडी ही अनेक वर्षांपासूनची समस्या असताना आता राजगुरुनगर, वाकी आणि शिरोली हीदेखील कोंडीची नवी केंद्रे बनली आहेत. दर शनिवार-रविवारी आणि सणासुदीच्या सुट्ट्यांमध्ये या मार्गावर वाहनांच्या रांगा लागणे नित्याचे झाले आहे. वाहतूक कोंडी सोडविण्यासाठी तात्पुरत्या उपायांऐवजी महामार्गाची क्षमता, चौकांचे नियोजन, अवजड वाहनांची वाहतूक आणि पुरेसे वाहतूक पोलीस याबाबत ठोस निर्णय घेण्याची गरज आहे. प्रवाशांना दर आठवड्याला या यातना कधीपर्यंत सहन कराव्या लागणार, असा सवाल उपस्थित होत आहे.





