Shirur : शिरूरमध्ये सोनसाखळी चोरट्यांचा पुन्हा धुमाकूळ
Shirur : पिरुकुटे मोनीकुटम पिल्लई (वय 62, रा. सुशीला पार्क, शिरूर) या नेहमीप्रमाणे सकाळी फिरण्यासाठी बाहेर पडल्या होत्या. त्या व्हिजन केअर हॉस्पिटलसमोरून जात असताना दुचाकीवरून आलेल्या दोघांपैकी मागे बसलेल्या युवकाने त्यांच्या गळ्यातील सोन्याचे दागिने हिसकावले.

शिरूर : शिरूर शहरात चोरट्यांनी पुन्हा डोके वर काढले असून, नागरिकांच्या सुरक्षिततेचा प्रश्न ऐरणीवर आला आहे. सकाळी मॉर्निंग वॉकसाठी घराबाहेर पडलेल्या 62 वर्षीय महिलेच्या गळ्यातील सोन्याचे दागिने दुचाकीवरून आलेल्या दोघांनी हिसकावून नेल्याची घटना सुशीला पार्क परिसरात घडली. व्हिजन केअर हॉस्पिटलसमोर घडलेल्या या प्रकारामुळे महिला आणि ज्येष्ठ नागरिकांमध्ये भीतीचे वातावरण निर्माण झाले आहे.
पिरुकुटे मोनीकुटम पिल्लई (वय 62, रा. सुशीला पार्क, शिरूर) या नेहमीप्रमाणे सकाळी फिरण्यासाठी बाहेर पडल्या होत्या. त्या व्हिजन केअर हॉस्पिटलसमोरून जात असताना दुचाकीवरून आलेल्या दोघांपैकी मागे बसलेल्या युवकाने त्यांच्या गळ्यातील सोन्याचे दागिने हिसकावले. त्यानंतर दोघेही दुचाकीवरून वेगाने पसार झाले. याप्रकरणी पिल्लई यांनी शिरूर पोलीस ठाण्यात फिर्याद दिली असून, अज्ञात दोघांविरुद्ध गुन्हा दाखल करण्यात आला आहे.
शहरातील ही घटना केवळ दागिने हिसकावण्यापुरती मर्यादित नाही. यापूर्वी घडलेल्या जबरी चोरीच्या घटना, टाकळी हाजी येथील मळगंगा देवीच्या दागिन्यांची चोरी, तसेच जांबुत आणि शिरूर-नगर महामार्गावर आढळलेले बेवारस मृतदेह या प्रकरणांचा तपास आणि त्यातील प्रगती याबाबत नागरिकांमध्ये प्रश्न उपस्थित होत आहेत. चोरीच्या घटनांमध्ये पिस्तुलातून गोळीबार झाल्याच्या प्रकारातील आरोपींचा शोध अद्याप लागलेला नसल्याचा आरोपही करण्यात येत आहे. गंभीर घटनांचा तपास रखडल्याची भावना नागरिकांमध्ये निर्माण होत असल्याने पोलिसांनी या प्रकरणांची सद्यस्थिती स्पष्ट करण्याची गरज आहे.
दुसरीकडे, शिरूर तालुक्याच्या ग्रामीण आणि बेट भागात अवैध दारूधंदे, तर पंचतळे येथे चक्री आणि जुगार सुरू असल्याच्या तक्रारी वारंवार समोर येत आहेत. टाकळी हाजी पोलीस चौकीतील अधिकारी बदलले, पदभार बदलला; मात्र अवैध धंद्यांचे चित्र बदलत नसल्याची नागरिकांची नाराजी आहे. या धंद्यांवर प्रभावी कारवाई का होत नाही, संबंधित यंत्रणांचे दुर्लक्ष आहे की या धंदेचालकांना कोणाचे अभय आहे, असे प्रश्न उपस्थित केले जात आहेत.





