Shikrapur : तेरा महिन्यांनी विशाखापट्टणममध्ये सरपंचांची फॉर्च्युनर सापडली
Shikrapur : संदीप पांडुरंग ढेरंगे (वय 40, रा. कोरेगाव भीमा, ता. शिरूर) यांची फॉर्च्युनर कार (एमएच 12 टीएच 9955) 16 ऑक्टोबर 2025 रोजी रात्री कार्यालयासमोर उभी केली होती; मात्र दुसर्या दिवशी पहाटेच्या सुमारास कार चोरीला गेल्याचे निदर्शनास आले.

शिक्रापूर : कोरेगाव भीमा (ता. शिरूर) येथील सरपंच संदीप ढेरंगे यांची चोरीला गेलेली फॉर्च्युनर कार तब्बल 13 महिन्यांनंतर आंध्र प्रदेशातील विशाखापट्टणम येथे सापडली. बड्या नेत्याच्या कारचा बनावट क्रमांक लावून ही गाडी वापरली जात असल्याचे तपासात समोर आले. कार सापडल्याची माहिती मिळताच सरपंच संदीप ढेरंगे आणि शिक्रापूर पोलिसांनी विमानाने विशाखापट्टणम गाठून कार ताब्यात घेतली.
संदीप पांडुरंग ढेरंगे (वय 40, रा. कोरेगाव भीमा, ता. शिरूर) यांची फॉर्च्युनर कार (एमएच 12 टीएच 9955) 16 ऑक्टोबर 2025 रोजी रात्री कार्यालयासमोर उभी केली होती; मात्र दुसर्या दिवशी पहाटेच्या सुमारास कार चोरीला गेल्याचे निदर्शनास आले. याप्रकरणी त्यांनी शिक्रापूर पोलीस ठाण्यात फिर्याद दिल्यानंतर अज्ञात चोरट्यांविरुद्ध गुन्हा दाखल करण्यात आला.
तपासादरम्यान एका संशयिताला ताब्यात घेण्यात आले; मात्र कारचा शोध लागत नव्हता. दरम्यान, नुकताच सरपंच ढेरंगे यांना परराज्यातील मोबाईल क्रमांकावरून फोन आला. विशाखापट्टणम येथे तुमची कार असल्याचे तेथील पोलिसांनी सांगितले. सुरुवातीला त्यांचा विश्वास बसला नाही. मात्र, व्हिडिओ कॉलवर कार दाखविल्यानंतर आतील आसनांवरील आवरणावरून त्यांनी ती आपलीच असल्याचे ओळखले.
पोलीस निरीक्षक चंद्रशेखर यादव यांच्या सूचनेनुसार सरपंच संदीप ढेरंगे, पोलीस हवालदार विश्वंभर वाघमारे आणि अजित इंगवले यांनी विमानाने विशाखापट्टणम गाठले. संबंधित पोलीस ठाण्यात जाऊन कारची खात्री केली. तब्बल 13 महिन्यांनंतर आपली कार सुस्थितीत पाहून ढेरंगे यांच्या डोळ्यांत आनंदाश्रू तरळले. तेथील कायदेशीर प्रक्रिया पूर्ण केल्यानंतर त्यांनी त्याच कारने शिक्रापूरपर्यंत प्रवास केला आणि कार पोलीस ठाण्यात आणली.
बड्या नेत्याच्या कारच्या क्रमांकाने चोरीचा भांडाफोड
चोरीची फॉर्च्युनर आंध्र प्रदेशात नेल्यानंतर तिच्यावर एका बड्या नेत्याच्या कारचा बनावट क्रमांक लावण्यात आला होता. बनावट कागदपत्रांच्या आधारे कारचा वापर सुरू होता. मात्र, तेथील पोलिसांनी कारची तपासणी केली असता तिच्या कागदपत्रांमध्ये आणि क्रमांकात तफावत आढळली. त्यानंतर चासी क्रमांकाच्या आधारे मूळ मालकाची माहिती मिळविण्यात आली आणि संदीप ढेरंगे यांच्याशी संपर्क साधण्यात आला. या तपासामुळे 13 महिन्यांपूर्वी चोरीला गेलेली कार पुन्हा मिळाली.





