प्रभात वृत्तसेवा
पुणे – दिवाळीत मूळ गावी गेलेले शहरवासीय शहरात परतण्यास सुरूवात झाली आहे. या प्रवाशांच्या मोटारी, खासगी बसमुळे महामार्गांवर वाहतूक कोंडी होण्याची शक्यता आहे. या पार्श्वभूमीवर महामार्ग पोलीस, पुणे पोलीस तसेच पिंपरी-चिंचवड पोलिसांच्या वाहतूक विभागाने वाहनचालकांना महामार्गालगतच्या पर्यायी मार्गांचा वापर करावा आणि सार्वजनिक वाहतूक व्यवस्थेचा अवलंब करण्याच्या सूचना केल्या आहेत.

दिवाळीनंतर शुक्रवारपासून (दि.२४) महामार्गावरील वर्दळ वाढली आहे, ती सोमवारपर्यंत (दि. २७) कायम राहण्याची शक्यता आहे. परगावांहून तसेच परराज्यांतून अनेक जण शहराकडे परतीचा प्रवास करीत असल्याने पुणे विभागाचे पोलीस अधीक्षक विक्रांत देशमुख, पोलीस उपायुक्त हिंमत जाधव, पिंपरी-चिंचवड वाहतूक शाखेचे पोलीस उपायुक्त विवेक पाटील यांनी वाहनचालकांना आवाहन केले आहे.

कोंडी होणारे मार्ग..
मुंबई-बंगळुरू राष्ट्रीय महामार्ग तसेच कोल्हापूरहून मुंबई, नवी मुंबई, ठाणे, मीरा भाईंदरकडे जाणाऱ्या वाहनांची संख्या जास्त असणार आहे. नाशिक-पुणे महामार्गावर चाकणमध्ये कोंडीची शक्यता आहे. सोलापूरहून पुण्याकडे मोठ्या संख्येने वाहने येत आहेत. या पार्श्वभूमीवर महामार्गावरील गर्दी आणि कोंडी विचारात घेऊन प्रवासाचे नियोजन करावे. २७ ऑक्टोबरपर्यंत सकाळी सात ते अकरा आणि सायंकाळी पाच ते रात्री नऊ या वेळेत प्रवास टाळावा. पर्यायी मार्गांचा वापर करावा. नियमांचे आणि सूचनांचे पालन करावे, असे आवाहन पोलिसांकडून करण्यात आले आहे.