Top 10 News : 1) ‘ज्ञानोबा-तुकाराम’च्या जयघोषात पालख्या पुण्यात दाखल; वारकऱ्यांच्या स्वागतासाठी शहर भक्तिमय

संतश्रेष्ठ ज्ञानेश्वर महाराज आणि जगद्गुरू संत तुकाराम महाराज यांच्या पालख्या गुरुवारी भक्तिमय वातावरणात पुण्यात दाखल झाल्या. शहरात वारकऱ्यांच्या उत्स्फूर्त स्वागतासाठी विविध ठिकाणी आकर्षक तयारी करण्यात आली होती. महापौर मंजुषा नागपुरे यांनी कळस आणि बोपोडी येथे पारंपरिक पद्धतीने पालख्यांचे औक्षण करून पादुकांचे दर्शन घेतले. ‘पुणे प्रथम-सेवावारी 2026’ उपक्रमांतर्गत पालख्यांवर पुष्पवृष्टी करण्यात आली. यावेळी महापौरांनी वारकरी महिलांसमवेत फुगडी खेळत समता, भक्ती आणि सेवाभावाचा संदेश दिला. संत ज्ञानेश्वर महाराजांच्या पालखीचा मुक्काम भवानी पेठेतील श्री पालखी विठ्ठल मंदिरात, तर संत तुकाराम महाराजांच्या पालखीचा मुक्काम नाना पेठेतील श्री निवडुंगा विठोबा मंदिरात असणार आहे. सायंकाळी अभिषेक, पादुकापूजन आणि आरतीनंतर भाविकांना पादुकांचे दर्शन घेण्याची संधी उपलब्ध होणार आहे. (Top 10 News)

२) महाराष्ट्रात समान नागरी कायद्याची तयारी; ७ सदस्यीय समिती गठीत

महाराष्ट्रात समान नागरी कायदा लागू करण्याच्या दिशेने राज्य सरकारने महत्त्वाचे पाऊल उचलले आहे. मुख्यमंत्री देवेंद्र फडणवीस यांनी विधानसभेत याबाबत घोषणा करत सात सदस्यीय अभ्यास समिती गठीत करण्यात आल्याची माहिती दिली. सर्वोच्च न्यायालयाच्या माजी न्यायमूर्ती रंजना देसाई यांच्या अध्यक्षतेखाली ही समिती पुढील सहा महिन्यांत अभ्यास करून अहवाल सादर करणार आहे. या अहवालाच्या आधारे नागपूर येथील हिवाळी अधिवेशनात समान नागरी कायद्याचा मसुदा दोन्ही सभागृहात मांडला जाण्याची शक्यता आहे. समितीत माजी न्यायमूर्ती, प्रशासकीय अधिकारी, कायदेतज्ज्ञ आणि सामाजिक क्षेत्रातील प्रतिनिधींचा समावेश करण्यात आलाय. उत्तराखंडनंतर समान नागरी कायदा लागू करणारे महाराष्ट्र दुसरे राज्य ठरू शकते. विधेयक मंजूर झाल्यानंतर त्याच्या अंमलबजावणीची प्रक्रिया सुरू होणार आहे. (Top 10 News)

३ ) ठाकरेंनंतर आता शरद पवारांनाही धक्का? पृथ्वीराज चव्हाणांचा मोठा दावा

महाराष्ट्राच्या राजकारणात पुन्हा एकदा मोठ्या घडामोडींची चर्चा रंगलीय. उद्धव ठाकरे गटातील खासदारांच्या फुटीनंतर आता शरद पवार यांच्या राष्ट्रवादी काँग्रेस पक्षातही फूट पडण्याची शक्यता असल्याचा दावा काँग्रेसचे ज्येष्ठ नेते आणि माजी मुख्यमंत्री पृथ्वीराज चव्हाण यांनी केलाय. त्यांच्या म्हणण्यानुसार, शरद पवार गटातील 5 ते 6 खासदार सध्या कमालीचे अस्वस्थ असून त्यांच्याशी संपर्क सुरू असल्याचा आरोप त्यांनी केलाय. यापुढे पंतप्रधान नरेंद्र मोदी आणि केंद्रीय गृहमंत्री अमित शाह हे या खासदारांच्या मागे लागल्याचाही गंभीर आरोप चव्हाण यांनी केलाय. या दाव्यामुळे राज्याच्या राजकीय वर्तुळात चर्चांना उधाण आले असून राष्ट्रवादी काँग्रेसमध्ये संभाव्य घडामोडींकडे सर्वांचे लक्ष लागलेय. (Top 10 News)

४ ) चिमुकले हात, आभाळाएवढं दुःख! 11 वर्षांच्या तन्वीने आईच्या पार्थिवाला दिला अग्नी

सिंधुदुर्ग जिल्ह्यातील कणकवली तालुक्यातील तळेरे येथे मन हेलावून टाकणारी घटना घडलीय. अवघ्या 11 वर्षांच्या तन्वी संदीप चव्हाण हिने आपल्या आईच्या शेवटच्या इच्छेचा मान राखत तिच्या पार्थिवाला अग्नी दिला. गेल्या तीन-चार वर्षांपासून आजाराने ग्रस्त असलेल्या आई प्रियंका चव्हाण यांची तन्वी सावलीसारखी सेवा करत होती. घरकाम, स्वयंपाक आणि शिक्षण यांचा समतोल साधत तिने आईला आधार दिला. मात्र आईच्या निधनानंतर शेवटचा निरोप देण्याची वेळ तिच्यावर आली. थरथरणारे हात, डोळ्यांत अश्रू आणि मनात अथांग दुःख घेऊन तिने आईच्या पार्थिवाला अग्नी दिला. या धाडसी निर्णयामुळे मुलीही मुलांप्रमाणे सर्व जबाबदाऱ्या समर्थपणे पार पाडू शकतात, असा समाजासमोर प्रेरणादायी संदेश गेला असून तन्वीच्या धैर्याला सर्वत्र सलाम केला जात आहे. (Top 10 News)

५ ) धावत्या ट्रेनमध्ये ‘हनिमून’ची सजावट महागात! रेल्वेची मोठी कारवाई

नांदेड-मुंबई नंदिग्राम एक्सप्रेसच्या फर्स्ट एसी डब्यात हनिमूनसाठी करण्यात आलेली फुलांची भव्य सजावट आता संबंधितांना चांगलीच महागात पडलीय. सोशल मीडियावर व्हायरल झालेल्या या व्हिडिओची रेल्वे प्रशासनाने गंभीर दखल घेत एका रेल्वे कर्मचाऱ्याला तात्काळ निलंबित केलेय. तसेच डब्यात अनधिकृत प्रवेश करून सजावट करणाऱ्या डेकोरेटरविरुद्ध रेल्वे कायद्यानुसार गुन्हा दाखल करण्यात आलाय. जालना स्थानकावर गाडी थांबली असताना फुगे, फुले, गुलाबाच्या पाकळ्या आणि ‘I Love You’ असा संदेश लावून एसी कूपे सजवण्यात आल्याचे समोर आले. या घटनेमुळे रेल्वे सुरक्षेवर प्रश्नचिन्ह निर्माण झालेय. संपूर्ण प्रकरणाची विभागीय चौकशी सुरू असून दोषी आढळणाऱ्यांवर नियमानुसार कठोर कारवाई करण्यात येणार असल्याचे रेल्वे प्रशासनाने स्पष्ट केलेय. (Top 10 News)