विधानभवनात शरद पवारांची पक्षाच्या आमदारांसोबत बैठक;
रोहित पवार गैरहजर, सत्तेत सहभागी होण्यावरुन नाराजी?

Top 10 News:  राज्यात राष्ट्रवादी काँग्रेस (शरदचंद्र पवार) पक्ष महायुतीत सहभागी होणार असल्याच्या चर्चेदरम्यान पक्षप्रमुख शरद पवार यांनी आमदारांची बैठक घेतली. मात्र, या बैठकीला आमदार रोहित पवार हे गैरहजर राहिल्यानं जोरदार चर्चा रंगलीय. भाजपसोबत जाण्यास विरोध असल्यानेच ते बैठकीला गैरहजर राहिल्याची माहिती समोर आलीय. यापूर्वीच्या बैठकीतही त्यांनी भाजपसोबत जाण्यास तीव्र विरोध दर्शवत बैठक सोडल्याचे सांगितले जाते. दरम्यान, पक्षाच्या वरिष्ठांकडून कोणताही घाईचा निर्णय घेऊ नका आणि सत्तेत सहभागी होण्याची योग्य वेळ आल्याचे संकेत आमदारांना देण्यात आल्याची माहिती आहे. बैठकीऐवजी रोहित पवार यांनी शिक्षकांच्या आंदोलनाला उपस्थिती लावली.

शिंदेंचे मारहाण करणारे नगरसेवक रमेश म्हात्रेंना अटक
तब्येत बिघडल्याने लागोलाग रुग्णालयात दाखल!

कल्याण-डोंबिवली महापालिकेच्या शास्त्रीनगर रुग्णालयातील डॉक्टर मारहाण प्रकरणात मुख्य आरोपी आणि शिवसेनेचे नगरसेवक रमेश म्हात्रे यांना विष्णूनगर पोलिसांनी अटक केली. अटकेनंतर वैद्यकीय तपासणीदरम्यान त्यांची प्रकृती बिघडल्याने त्यांना ठाणे सिव्हिल रुग्णालयाच्या आयसीयूमध्ये दाखल करण्यात आले. गर्भवती महिलेवर उपचार न करता दुसरीकडे हलवण्याचा सल्ला दिल्याने संतप्त झालेल्या म्हात्रे यांनी ‘फोन का उचलला नाही?’ या कारणावरून समर्थकांसह रुग्णालयात जाऊन डॉक्टर व नर्सला मारहाण केल्याचा आरोप आहे. महिला डॉक्टरलाही धक्काबुक्की व दमदाटी करण्यात आल्याचे समोर आले. घटनेचा व्हिडिओ व्हायरल झाल्यानंतर वैद्यकीय क्षेत्रातून तीव्र संताप व्यक्त झाला. या प्रकरणात रमेश पवार, प्रमोद निकम आणि अक्षय कारंडे यांनाही अटक करण्यात आली आहे.

भूकंपाच्या धक्क्याने मराठवाडा हादरला,
मध्यरात्री सलग ४ वेळा बसले धक्के

मराठवाड्यात हिंगोली, परभणी आणि नांदेड जिल्ह्यांना मध्यरात्रीपासून सकाळपर्यंत सलग चार भूकंपाचे धक्के बसल्याने नागरिकांमध्ये भीतीचे वातावरण पसरले. पहिला धक्का 4.6 रिश्टर स्केलचा, तर त्यानंतर 3.6 आणि 3.9 तीव्रतेचे धक्के नोंदवले गेले. पहिल्या भूकंपाचा केंद्रबिंदू हिंगोली जिल्ह्यातील वास्मत तालुक्यात, तर पुढील धक्क्यांचा केंद्रबिंदू काकडबा परिसरात होता. धक्क्यांमुळे अनेक नागरिक घराबाहेर धावले, तर काही घरांच्या भिंतींना तडे जाऊन प्लास्टर कोसळल्याचे समोर आले. जिल्हा प्रशासनाने परिस्थितीवर लक्ष ठेवले असून नागरिकांनी अफवांवर विश्वास न ठेवता घाबरून जाऊ नये, असे आवाहन केले आहे. सीसीटीव्ही फुटेजही समोर आले असून नुकसानाचा पंचनामा सुरू आहे.

पुण्यात वाहतुकीत मोठे बदल;
अंतर्गत हलक्या वाहनांसाठी निर्बंध

संत ज्ञानेश्वर आणि संत तुकाराम यांच्या पालख्यांचे आज पुण्यात आगमन होत असल्याने शहरात विशेष वाहतूक व्यवस्था लागू करण्यात आलीय. पालखी मार्गावरील अनेक रस्ते पहाटे 3 ते सायंकाळी 8 वाजेपर्यंत टप्प्याटप्प्याने वाहतुकीसाठी बंद राहणार आहेत. ज्ञानेश्वर महाराजांची पालखी आळंदीहून वडमुखवाडी, दिघी, विश्रांतवाडी, फुलेनगर, संगमवाडी, एफ.सी. रोड, लक्ष्मी रोड, नाना पेठ मार्गे भवानी पेठेतील पालखी विठोबा मंदिरात मुक्कामी पोहोचेल. वाहनचालकांनी धानोरी रोडसह पर्यायी मार्गांचा वापर करावा, असे आवाहन वाहतूक पोलिसांनी केलंय. होळकर पूल, चंद्रमा चौक, शादलबाबा दर्गा, पाटील इस्टेट, इंजिनिअरिंग कॉलेज चौक आणि आरटीओ परिसरातही आवश्यकतेनुसार वाहतूक निर्बंध लागू राहतील असंही सांगण्यात आलंय.

पातळगंगा नदीतून 3000 सिलेंडर वाहून गेले,
टाक्या घेण्यासाठी नागरिकांची झुंबड  Top 10 News:  

मुंबई, कोकणासह राज्यात झालेल्या मुसळधार पावसामुळे रायगड जिल्ह्यातील खालापूर येथे मोठी घटना घडली. HPCLच्या एलपीजी बॉटलिंग प्लांटमधील सुमारे 3,000 सिलेंडर पाताळगंगा नदीच्या पुरात वाहून गेले. नदीत वाहून आलेले काही सिलेंडर नागरिकांनी गोळा केल्याचेही समोर आले आहे. या पार्श्वभूमीवर जिल्हाधिकाऱ्यांनी नागरिकांना सापडलेले सिलेंडर तातडीने तहसीलदार किंवा संबंधित डीलरकडे जमा करण्याचे आवाहन केले आहे. प्राथमिक माहितीनुसार, खालापूरमधील चावणे येथील गोडाऊनमध्ये अतिवृष्टीमुळे पाणी शिरल्याने ही घटना घडली. पुरवठा विभागाकडून घटनेचा तपास सुरू आहे.

तुकाराम मुंढेंचा दणका!
मुंबईतील प्रसिद्ध रुस्तम आईस्क्रीमचा परवाना रद्द 

अन्न व औषध प्रशासनाचे आयुक्त तुकाराम मुंढे यांनी पदभार स्वीकारताच अन्न भेसळ आणि अस्वच्छतेविरोधात धडक मोहीम सुरू केली. एफडीएने एका दिवसात 16 हॉटेल्स, रेस्टॉरंट्स आणि ढाब्यांवर छापे टाकले. या कारवाईत मुंबईतील नरिमन पॉईंट येथील प्रसिद्ध रुस्तम अँड कंपनी आईस्क्रीम दुकानात गंभीर अनियमितता आढळल्याने त्यांचा परवाना तात्काळ निलंबित करण्यात आला. तपासणीत अस्वच्छ परिसर, उंदीर व माशांचा वावर, कोल्ड चेनमध्ये त्रुटी, मुदतबाह्य अन्नपदार्थांचा साठा आणि आवश्यक नोंदींचा अभाव आढळला. त्यामुळे Food Safety and Standards Act, 2006 च्या कलम 32(3) अंतर्गत प्रशासनाने कठोर कारवाई केली.

ममता बॅनर्जींनी TMC कार्यकर्त्याला कानशिलात लगावली;
व्हिडिओ व्हायरल होताच राजकारण तापलं

ममता बॅनर्जी यांच्या बारुईपूर प्रकरणावरील आंदोलनादरम्यान तृणमूल काँग्रेसच्या एका कार्यकर्त्याला त्यांनी चापट मारल्याचा व्हिडिओ सोशल मीडियावर व्हायरल झाला आहे. व्हिडिओमध्ये संबंधित कार्यकर्ता गर्दी नियंत्रणात ठेवत आणि ममता बॅनर्जी यांच्यासाठी मार्ग मोकळा करत असल्याचे दिसते. मात्र, काही क्षणांत ममता बॅनर्जी यांनी संतापून त्याला चापट मारल्याचे व्हिडिओत दिसत आहे. हा व्हिडिओ भाजप खासदार राजू बिस्ता यांनी सोशल मीडियावर शेअर करत ममता बॅनर्जी यांच्यावर टीका केली. या घटनेनंतर राजकीय वर्तुळात चर्चेला उधाण आले असून तृणमूल काँग्रेसकडून अद्याप अधिकृत प्रतिक्रिया आलेली नाही.

इराणवर अमेरिकेचे नवे हल्ले;
ट्रम्प म्हणाले,”हा फक्त बदला, अजून कारवाई बाकी”

अमेरिकेने इराणवरील लष्करी कारवाई आणखी तीव्र करत रेल्वे पूल आणि अनेक लष्करी ठिकाणांवर हल्ले केले. ही कारवाई होर्मुझ सामुद्रधुनीत व्यापारी जहाजांवरील हल्ल्यांच्या प्रत्युत्तरात करण्यात आल्याचे अमेरिकन लष्कराने सांगितले.डोनाल्ड ट्रम्प यांनी सोशल मीडियावर हल्ल्याचा व्हिडिओ शेअर करत, “हा बदला आहे, अजून कठोर कारवाई होईल,” असा इशारा दिला. अमेरिकेच्या सेंट्रल कमांडनुसार, इराणची आंतरराष्ट्रीय नौवहनाला धोका निर्माण करण्याची क्षमता कमी करणे हा या मोहिमेचा उद्देश आहे. हल्ल्यानंतर इराणच्या दक्षिणेकडील अनेक भागांत स्फोटांचे आवाज ऐकू आले असून काही ठिकाणी वीजपुरवठाही खंडित झाला आहे.

भारतासमोर मालिका वाचवण्याचे आव्हान
आजच्या सामन्याकडे सर्वांचे लक्ष

श्रेयश अय्यर यांच्या नेतृत्वाखालील भारतीय टी-20 संघ इंग्लंडविरुद्धच्या मालिकेत अद्याप विजयाच्या प्रतीक्षेत आहे. पहिला सामना पावसामुळे रद्द झाला, तर पुढील दोन सामने भारताने गमावले. तिसऱ्या सामन्यात भारताला तब्बल 125 धावांनी पराभव पत्करावा लागला. संजू सॅमसन यांना वगळून वैभव सूर्यवंशी यांना संधी देण्यात आली, मात्र त्याचाही अपेक्षित परिणाम दिसला नाही. आता मालिकेत टिकून राहण्यासाठी भारताला चौथा सामना जिंकणे अनिवार्य आहे. हा सामना ब्रिस्टोलच्या काऊंटी ग्राऊंडवर भारतीय वेळेनुसार रात्री 10 वाजता सुरू होणार असून पावसाची शक्यता अत्यल्प असल्याने पूर्ण सामना होण्याची अपेक्षा आहे.

ज्येष्ठ अभिनेते राजेश शर्मा यांची प्रकृती बिकट
विषारी किडा चावल्याने शरीरात संसर्ग Top 10 News:  

मनोरंजन विश्वातून धक्कादायक बातमी समोर आली आहे. ज्येष्ठ अभिनेते राजेश शर्मा यांना प्रभासच्या आगामी स्पिरिट चित्रपटाच्या चित्रीकरणादरम्यान किडा चावल्याचा संशय असून त्यांना कोलकात्यातील खासगी रुग्णालयात दाखल करण्यात आले आहे. सुरुवातीला दुखापत किरकोळ वाटल्याने त्यांनी चित्रीकरण सुरू ठेवले, मात्र नंतर उजव्या पायात तीव्र वेदना, सूज आणि संसर्ग वाढल्याने त्यांना तातडीने उपचारासाठी हलवण्यात आले. डॉक्टरांच्या मते संसर्ग पायाच्या बोटापासून गुडघ्यापर्यंत पसरला असून रक्ताच्या गुठळ्या होण्याचा धोका आहे. सध्या त्यांच्यावर उपचार सुरू असून प्रकृतीवर डॉक्टरांचे बारकाईने लक्ष आहे.