Politics News : कर्नाटकमधील काँग्रेस सरकारमध्ये नेतृत्वबदलाच्या चर्चांना पुन्हा एकदा वेग आला असून मुख्यमंत्री सिद्धरामय्या यांच्या दिल्ली दौऱ्याच्या पार्श्वभूमीवर पुढील दोन ते तीन दिवसांत याबाबत अंतिम निर्णय होण्याची शक्यता काँग्रेस सूत्रांनी व्यक्त केली आहे. पक्षश्रेष्ठी, मुख्यमंत्री आणि उपमुख्यमंत्री यांच्यातील बैठकीनंतर चित्र स्पष्ट होईल, असे सांगण्यात येत आहे.

सूत्रांच्या माहितीनुसार, या बैठकीत राज्यसभा निवडणूक, मंत्रिमंडळ फेरबदल तसेच विधान परिषदेच्या निवडणुकांबाबतही महत्त्वाचे निर्णय होण्याची शक्यता आहे.

दिल्लीमध्ये काँग्रेस नेतृत्वाची भेट  – (Politics News )

मुख्यमंत्री सिद्धरामय्या (Siddaramaiah)  मंगळवारी सकाळी ११ वाजता दिल्लीमध्ये काँग्रेस नेतृत्वाची भेट घेणार आहेत. मात्र, बैठकीचा अजेंडा नेमका काय आहे, याची माहिती नसल्याचे त्यांनी पत्रकारांशी बोलताना सांगितले. “मला दिल्लीला बोलावण्यात आले आहे. उद्या सकाळी ११ वाजता बैठक आहे. मात्र बैठकीचा विषय काय आहे, हे मला माहिती नाही. के. सी. वेणुगोपाल यांनी फोन करून वेळ आणि तारीख कळवली,” असे सिद्धरामय्या म्हणाले.

राज्यातील नेतृत्वबदलाच्या चर्चांवर प्रतिक्रिया देताना त्यांनी, “अशा प्रकारच्या चर्चा सुरूच असतात,” असे सूचक वक्तव्य केले. दरम्यान, उपमुख्यमंत्री डी.के. शिवकुमार यांनी आपणास बोलावण्यात आल्यासच दिल्लीला जाणार असल्याचे सांगितले. “पक्षाने बोलावले तर मी जाईन,” असे त्यांनी स्पष्ट केले.

चर्चांना पूर्णविराम देण्याचा प्रयत्न –  (Politics News )

कर्नाटक काँग्रेसचे प्रभारी रणदीप सिंग सुरजेवाला यांनी मात्र दिल्ली बैठकीचा संबंध राज्यसभा निवडणुकीशी असल्याचे सांगत नेतृत्वबदलाच्या चर्चांना पूर्णविराम देण्याचा प्रयत्न केला. “राज्यसभा निवडणुकीची अधिसूचना जारी झाली आहे. पक्षामध्ये त्यासंदर्भात चर्चा सुरू आहेत. त्यामुळे अनावश्यक तर्कवितर्क करू नयेत,” असे ते म्हणाले.

गेल्या दीड वर्षांपासून डी. के. शिवकुमार समर्थकांकडून त्यांना मुख्यमंत्रीपदाची संधी मिळणार असल्याचे दावे सातत्याने केले जात आहेत. मात्र अद्याप त्याबाबत कोणतीही ठोस हालचाल झालेली नाही. “गेल्या तीन वर्षांपासून हेच सूर ऐकायला मिळत आहेत,” अशी प्रतिक्रिया काँग्रेसमधील एका वरिष्ठ नेत्याने दिल्याचे सूत्रांनी सांगितले.

राज्य काँग्रेसमधील काही नेत्यांमध्ये वाढत्या संभ्रमाबद्दल नाराजी असल्याचेही समोर आले आहे. नेतृत्वबदलाबाबतचा प्रदीर्घ अनिश्चिततेचा काळ पक्षाच्या प्रतिमेला धक्का पोहोचवत असल्याने पक्षश्रेष्ठींनी लवकर निर्णय घ्यावा, अशी मागणी राज्यातील काही नेत्यांकडून होत आहे.

मुख्यमंत्री बदलाची चर्चा का होते ?

कर्नाटकमध्ये काँग्रेसने २०२३ विधानसभा निवडणुकीत विजय मिळवल्यानंतर मुख्यमंत्रीपदासाठी सिद्धरामय्या आणि डी. के. शिवकुमार  (D.K Shivkumar) यांच्यात तीव्र स्पर्धा होती. पक्षश्रेष्ठींनी तडजोडीचा मार्ग स्वीकारत सिद्धरामय्या यांना मुख्यमंत्री, तर शिवकुमार यांना उपमुख्यमंत्री केले. त्यावेळी ‘अडीच-अडीच वर्षांचा फॉर्म्युला’ ठरल्याची चर्चा राजकीय वर्तुळात झाली होती, जरी काँग्रेसने अधिकृतपणे त्याला दुजोरा दिला नव्हता. आता सरकारला जवळपास अडीच वर्षे पूर्ण होत आल्याने शिवकुमार समर्थकांकडून नेतृत्वबदलाची मागणी पुन्हा जोर धरत आहे. दुसरीकडे सिद्धरामय्या समर्थक स्थैर्याचा मुद्दा पुढे करत असल्याने पक्षात संभ्रमाचे वातावरण निर्माण झाले आहे.