राज्यात SIR विरोधातील आंदोलनांची धग वाढली;
१० दिवसांत ८८ आंदोलने

Top 15 News : मुख्य निवडणूक आयुक्त ज्ञानेश कुमार आणि SIR मोहिमेविरोधात महाराष्ट्रात आंदोलनांची तीव्रता वाढली आहे. पोलिसांच्या गुप्तचर विभागाच्या अहवालानुसार, २५ सप्टेंबर ते ४ ऑक्टोबरदरम्यान राज्यात ८८ आंदोलने झाली. यामध्ये काँग्रेसची ५७, डाव्या पक्षांची १६, राष्ट्रवादीची सात, ठाकरे गटाची पाच आणि CJPची दोन आंदोलने होती. ४ ऑक्टोबरला राज ठाकरे आणि उद्धव ठाकरे यांनी मुंबईत संयुक्त मोर्चा काढला. पुण्यात MPSC आंदोलनात विद्यार्थ्यांचा सहभाग वाढत असून आठ विद्यार्थी उपोषणाला बसले आहेत. दरम्यान, १० ऑक्टोबरला दिल्लीतील जंतरमंतरवरील CJPच्या आंदोलनावर पोलिसांचे लक्ष राहणार आहे.

शेतकऱ्यांसाठी सरकारचा मोठा निर्णय!
प्रत्येक जिल्ह्याला २० कोटींचा निधी

महाराष्ट्रातील दुष्काळसदृश परिस्थितीच्या पार्श्वभूमीवर शेतकऱ्यांना दिलासा देण्यासाठी राज्य सरकारने महत्त्वाचा निर्णय घेतला आहे. मुख्यमंत्री देवेंद्र फडणवीस यांच्या नेतृत्वाखाली वितरण रोहित्र, स्पेशल डिझाईन ट्रान्सफॉर्मर आणि कॅपॅसिटर बँक खरेदीसाठी प्रत्येक जिल्ह्याला २० कोटी रुपयांपर्यंत निधी मंजूर करण्यात आला आहे. यंदा राज्यातील ३५८ पैकी २६५ तालुक्यांमध्ये दुष्काळसदृश परिस्थिती जाहीर करण्यात आली आहे. या निधीतून नादुरुस्त व ओव्हरलोड रोहित्र बदलणे, कमी दाबाची समस्या दूर करणे आणि ग्रामीण भागातील वीजपुरवठा सुरळीत करणे यावर भर दिला जाणार आहे. जिल्हाधिकाऱ्यांना कामांना प्रशासकीय मान्यता देण्याचे अधिकार देण्यात आले आहेत. त्यामुळे सिंचनासाठी वीजपुरवठा अधिक सक्षम होण्याची अपेक्षा आहे.

राज्यात ऑक्टोबर हीटचा तडाखा;
तीन जिल्ह्यांना पावसाचा यलो अलर्ट

महाराष्ट्रात मॉन्सूनच्या परतीच्या प्रवासादरम्यान हवामानात बदल होत असून अनेक भागांत उष्णता आणि उकाडा वाढला आहे. दरम्यान, हवामान विभागाने आज गडचिरोली, सिंधुदुर्ग आणि कोल्हापूर जिल्ह्यांत विजांच्या कडकडाटासह पावसाची शक्यता वर्तवली आहे. गडचिरोली जिल्ह्याला यलो अलर्ट देण्यात आला आहे. काही ठिकाणी हलक्या ते मध्यम सरी कोसळण्याचा अंदाज आहे. राज्यातील इतर भागांत आकाश निरभ्र राहण्याची शक्यता असून तापमानात वाढ होऊ शकते. त्यामुळे एका बाजूला पावसाची शक्यता, तर दुसरीकडे ऑक्टोबर हीटचा तडाखा, असे दुहेरी चित्र राज्यात पाहायला मिळत आहे.

विधान परिषद निवडणुकीसाठी चंद्रकांत पाटील प्रभारीपदी
राजेश पांडे निवडणूकप्रमुख नियुक्त

पुणे पदवीधर आणि शिक्षक मतदारसंघाच्या विधान परिषद निवडणुकीची रणधुमाळी सुरू झाली आहे. या पार्श्वभूमीवर चंद्रकांत पाटील यांची निवडणूक प्रभारीपदी, तर राजेश पांडे यांची निवडणूकप्रमुखपदी नियुक्ती करण्यात आली आहे. निवडणुकीच्या तयारीला वेग आला असतानाच महायुतीसमोर बंडखोरी रोखण्याचे मोठे आव्हान उभे राहिले आहे. इच्छुक उमेदवारांची संख्या आणि उमेदवारीवरून निर्माण होणारे मतभेद यामुळे राजकीय समीकरणे महत्त्वाची ठरणार आहेत. त्यामुळे निवडणुकीत समन्वय राखणे, कार्यकर्त्यांना एकत्र ठेवणे आणि मतदारांपर्यंत पोहोचणे, यावर भाजपचा भर राहणार आहे. या नियुक्त्यांमुळे निवडणूक व्यवस्थापनाला अधिक गती मिळण्याची अपेक्षा आहे.

पोलीस कोठडीतील मृत्यू झाल्यास ५ लाखांची भरपाई;
दोषी कर्मचाऱ्यांच्या वेतनातून वसुली Top 15 News :

पोलीस कोठडीतील मृत्यू आणि अत्याचारांच्या घटनांना आळा घालण्यासाठी महाराष्ट्र सरकारने महत्त्वाचा निर्णय घेतला आहे. मुख्यमंत्री देवेंद्र फडणवीस यांच्या अध्यक्षतेखाली झालेल्या मंत्रिमंडळ बैठकीत नुकसानभरपाई धोरणाला मंजुरी देण्यात आली. यानुसार, पोलिसांच्या मारहाण किंवा अत्याचारामुळे कोठडीत मृत्यू झाल्यास वारसदारांना ५ लाख रुपये, ५० टक्क्यांपेक्षा अधिक कायमस्वरूपी अपंगत्व आल्यास ४ लाख रुपये, तर त्यापेक्षा कमी अपंगत्वासाठी २ लाख रुपये दिले जातील. दोषी अधिकारी-कर्मचाऱ्यांवर फौजदारी गुन्हे दाखल करून भरपाईची रक्कम त्यांच्या वेतन, निवृत्तीवेतन किंवा मालमत्तेतून वसूल केली जाईल. संबंधित एसपी किंवा पोलीस आयुक्तांना ३० दिवसांत चौकशीचा प्रस्ताव सादर करावा लागेल.

  दिवाळीपूर्वी शेतकऱ्यांना मदतीबाबत निर्णय
चंद्रशेखर बावनकुळे यांचे आश्वासन

दुष्काळी परिस्थितीच्या पार्श्वभूमीवर मुख्यमंत्री यांच्या अध्यक्षतेखाली महत्त्वाची बैठक झाली. दिवाळीपूर्वी शेतकऱ्यांना कोणती मदत देता येईल, यावर चर्चा करण्यात आल्याची माहिती मंत्री चंद्रशेखर बावनकुळे यांनी दिली. अचूक पंचनामे, पीक सर्व्हेमधील अडचणी दूर करणे आणि चारा साठवणुकीला प्राधान्य देण्यात येत आहे. यापूर्वी दुष्काळाच्या यादीतून वगळलेल्या तालुक्यांचाही विचार केला जाणार असून, आणखी २० तालुके दुष्काळग्रस्त म्हणून समाविष्ट करण्याबाबत समिती निर्णय घेईल, असं त्यांनी सांगितलं. DPCचा निधी दुष्काळासाठी राखीव ठेवण्यात येणार आहे. पीक कर्ज न मिळालेल्या शेतकऱ्यांसाठी ई-केवायसीद्वारे प्रक्रिया पूर्ण केली जाईल. शेतकरी आणि दुष्काळी उपाययोजनांना सरकारचं सर्वोच्च प्राधान्य असल्याचं बावनकुळे म्हणाले.

 MPSC आंदोलनापासून महायुतीच्या जागावाटपापर्यंत;
उदय सामंतांचा मोठा खुलासा

मंत्री उदय सामंत यांनी MPSC विद्यार्थ्यांच्या आंदोलनासह महायुतीच्या जागावाटपावर भाष्य केलं. विद्यार्थ्यांना न्याय देणं ही सरकारची जबाबदारी असून, मुख्यमंत्री आणि उपमुख्यमंत्र्यांनी त्यांच्या मागण्यांवर ठोस पावले उचलली आहेत, असं त्यांनी सांगितलं. आंदोलन करणाऱ्या विद्यार्थ्यांनी सरकारसोबत चर्चा करावी, असं आवाहनही त्यांनी केलं. रोहित पवारांच्या दाव्यावर बोलताना आंदोलनाचा राजकीय वापर करू नये, असं सामंत म्हणाले. सोलापूर विद्यापीठात परीक्षा फी मागितल्यास चंद्रकांत पाटील यांच्याशी चर्चा करून कारवाई केली जाईल, असं त्यांनी स्पष्ट केलं. महायुतीच्या पाचपैकी चार जागांवर एकमत झालं असून, पुणे मतदारसंघाबाबत एकनाथ शिंदे आणि देवेंद्र फडणवीस योग्य निर्णय घेतील, असं सामंत यांनी सांगितलं.

  महायुती म्हणूनच निवडणूक लढवली पाहिजे;
सुनील तटकरेंचं मोठं विधान

राष्ट्रवादी काँग्रेसचे नेते सुनील तटकरे यांनी पुणे मतदारसंघातील महायुतीच्या जागावाटपावर भाष्य केलं. पुण्याची जागा राष्ट्रवादीची असल्याने आमचा आग्रह होता, मात्र अंतिम निर्णय वरिष्ठ नेते घेतात, असं त्यांनी सांगितलं. उमेदवारी अर्ज मागे घेण्याची मुदत बाकी असून, महायुती म्हणून निवडणूक लढवण्याबाबत तिन्ही नेते एकत्र बसून मार्ग काढतील, असा विश्वास त्यांनी व्यक्त केला. जागावाटपात राष्ट्रवादीची बार्गेनिंग पॉवर कमी झालेली नाही, असंही तटकरे म्हणाले. विद्यार्थ्यांच्या प्रश्नांवर राजकारण बाजूला ठेवून त्यांच्या भावना समजून घेत सरकारने योग्य पावले उचलली असल्याचं त्यांनी स्पष्ट केलं. कोकणातील दुष्काळी परिस्थितीबाबत अधिकाऱ्यांशी चर्चा केल्याचंही त्यांनी सांगितलं.

 महायुतीपाठोपाठ महाविकास आघाडीतही बंडखोरी;
पदवीधर मतदारसंघात पेच वाढला

मराठवाडा पदवीधर मतदारसंघाच्या निवडणुकीत महाविकास आघाडीसाठी उमेदवारीवरून पेच निर्माण झाला आहे. राष्ट्रवादी काँग्रेस (शरदचंद्र पवार) पक्षाचे धाराशिव जिल्हाध्यक्ष प्रतापसिंह पाटील यांनी उमेदवारी अर्ज दाखल केला. यावेळी पक्षाचे नेते राजेश टोपे उपस्थित होते. विशेष म्हणजे, ठाकरेसेनेचे उमेदवार दिलीप घुगे यांनी यापूर्वीच अर्ज दाखल केला आहे. त्यामुळे महाविकास आघाडीतही उमेदवारीवरून चुरस निर्माण झाली आहे. दरम्यान, दिलीप घुगे अर्ज मागे घेतील, असा विश्वास प्रतापसिंह पाटील यांनी व्यक्त केला. ठाकरे गटाशी चर्चा सुरू असून, त्यांचा उमेदवार अर्ज मागे घेईल, अशी प्रतिक्रिया राजेश टोपे यांनी दिली. अंतिम उमेदवार कोण, याकडे आता लक्ष लागलं आहे.

 बीड जिल्ह्यावर दुष्काळाचे सावट;
शेती, पशुधन आणि पाणीप्रश्न गंभीर Top 15 News :

बीड जिल्ह्यात पावसाअभावी दुष्काळाची परिस्थिती गंभीर होत असून, शेती, पशुधन आणि पिण्याच्या पाण्याचा प्रश्न निर्माण झाला आहे. अनियमित पावसामुळे सोयाबीन, कापूस, तूर यासह खरीप पिकांना फटका बसला असून, शेतकरी आर्थिक संकटात सापडले आहेत. काही भागांत पाणीटंचाई वाढल्याने टँकरने पाणीपुरवठ्याची गरज निर्माण झाली आहे. जनावरांसाठी चाऱ्याचा प्रश्नही गंभीर झाला आहे. दरम्यान, दुष्काळावर कायमस्वरूपी उपायांसाठी नदी-नाल्यांचे खोलीकरण, गाळ काढणे, जलसंधारण आणि पावसाचे पाणी अडवण्याची कामे करण्याची मागणी होत आहे. रोजगार हमीच्या माध्यमातून ही कामे हाती घेण्याची मागणीही करण्यात येत आहे.

‘एकाही देशद्रोहीला सोडलं जाणार नाही’,
सुटकेनंतरची राहुल गांधींची पहिली पोस्ट चर्चेत

मुख्य निवडणूक आयुक्त ज्ञानेश कुमार यांच्या राजीनाम्यासह SIR प्रक्रिया रद्द करण्याच्या मागणीसाठी दिल्लीतील आकाशवाणी भवन परिसरात विरोधकांनी आंदोलन केले. आठ ते नऊ तास चाललेल्या आंदोलनानंतर राहुल गांधी, प्रियांका गांधी यांच्यासह अनेक नेत्यांना पोलिसांनी ताब्यात घेतले. सुमारे दोन तासांनी सुटका झाल्यानंतर राहुल गांधींनी सोशल मीडियावर पोस्ट करत, ‘एकाही देशद्रोहीला सोडलं जाणार नाही,’ असा इशारा दिला. या कारवाईत काँग्रेस खासदार प्रणिती शिंदे आणि वर्षा गायकवाड यांनाही ताब्यात घेण्यात आले होते. दरम्यान, भाजप प्रवक्ते सुधांशू त्रिवेदी यांनी आंदोलनावर टीका करत विरोधकांचे आरोप फेटाळले.

राहुल गांधींच्या आंदोलनावर किरेन रिजिजूंची टीका;
म्हणाले, ‘देश बदलला आहे’

मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी इंडिया आघाडीच्या खासदारांनी दिल्लीत निवडणूक आयोगाच्या कार्यालयाकडे मोर्चा काढला. पोलिसांनी मोर्चा रोखल्यानंतर राहुल गांधी आणि प्रियांका गांधी यांनी आकाशवाणी भवन परिसरात आंदोलन सुरू ठेवले. यावर केंद्रीय मंत्री किरेन रिजिजू यांनी राहुल गांधींवर टीका केली. केवळ एका कुटुंबात जन्म घेतल्याने पंतप्रधान होता येत नाही, असे ते म्हणाले. काँग्रेसने घटनात्मक संस्थांवर प्रश्न उपस्थित करण्याऐवजी जनसेवेवर भर द्यावा, असेही रिजिजूंनी सांगितले. दरम्यान, राहुल गांधी बॅरिकेडवर चढून तिरंगा फडकावताना दिसले. विरोधकांनी SIR प्रक्रिया रद्द करण्याचीही मागणी केली असून, भाजपने त्यांचे आरोप फेटाळले आहेत.

फ्रान्समधील आंदोलनावर ट्रम्प यांचा मोठा दावा;
म्हणाले, ‘हा प्रश्न शाळांचा नाही, इस्लामशी संबंधित’

फ्रान्समध्ये शाळांमधील अपुऱ्या सुविधा, शिक्षकांची कमतरता आणि खराब पायाभूत सुविधांविरोधात मोठे आंदोलन सुरू आहे. या पार्श्वभूमीवर अमेरिकेचे अध्यक्ष डोनाल्ड ट्रम्प यांनी आंदोलनामागे अनियंत्रित स्थलांतर आणि इस्लामचा मुद्दा असल्याचा दावा केला. मात्र, आंदोलक विद्यार्थी, शिक्षक आणि पालक शिक्षण व्यवस्थेतील समस्यांविरोधात आंदोलन करत असल्याचे सांगत आहेत. मंगळवारी झालेल्या आंदोलनात अडीच लाखांहून अधिक लोक सहभागी झाल्याचा दावा आहे. काही शहरांमध्ये आंदोलक आणि पोलिसांमध्ये संघर्षही झाला. दरम्यान, आंदोलनामुळे बंद झालेल्या शाळांच्या संख्येवर सरकार आणि कामगार संघटनांमध्ये मतभेद आहेत. ट्रम्प यांच्या वक्तव्याचा संबंध अमेरिकेतील स्थलांतराच्या राजकारणाशी जोडला जात आहे.

स्मृती मानधना भारतीय महिला संघाची नवी कर्णधार;
हरमनप्रीत कौरचा अचानक राजीनामा

भारतीय महिला क्रिकेट संघाच्या नेतृत्वात मोठा बदल झाल्याची घोषणा करण्यात आली आहे. हरमनप्रीत कौरने तिन्ही फॉरमॅटमधील कर्णधारपदाचा राजीनामा दिल्यानंतर स्मृती मानधनाची नव्या कर्णधारपदी नियुक्ती करण्यात आली आहे. एकदिवसीय मालिकेत दीप्ती शर्मा, तर टी-२० मालिकेत शेफाली वर्मा उपकर्णधारपदाची जबाबदारी सांभाळणार असल्याचे सांगण्यात आले आहे. २०१३ पासून भारतीय संघाचा भाग असलेल्या स्मृतीने यापूर्वी १८ टी-२० आणि चार एकदिवसीय सामन्यांत भारताचे नेतृत्व केले आहे. आगामी झिम्बाब्वे मालिकेपासून तिच्या नेतृत्वाखाली भारतीय संघाच्या नव्या पर्वाला सुरुवात होणार आहे. या मालिकेत तीन टी-२० आणि तीन एकदिवसीय सामने खेळवले जाणार आहेत.

‘बिग बॉस २०’मधून काजी तौकीर घेणार ब्रेक?;
प्रकृती बिघडल्याने चाहत्यांना धक्का Top 15 News :

‘बिग बॉस २०’मधून काजी तौकीर प्रकृती बिघडल्यामुळे काही काळासाठी बाहेर पडणार असल्याची चर्चा आहे. सोशल मीडियावरील दाव्यांनुसार, त्याला डेंग्यू झाल्याचे सांगितले जात आहे. मात्र, याबाबत अधिकृत वैद्यकीय माहिती समोर आलेली नाही. काजीच्या टीमने इन्स्टाग्राम स्टोरीद्वारे त्याची प्रकृती गेल्या काही दिवसांपासून ठीक नसल्याचे सांगितले. अशक्तपणामुळे त्याला वारंवार मेडिकल रूममध्ये नेले जात असून डॉक्टरांकडून तपासणी केली जात आहे. प्रकृती सुधारल्यानंतर काजी पुन्हा शोमध्ये सहभागी होईल, असेही टीमने म्हटले आहे. दरम्यान, काजी लवकर बरा व्हावा, यासाठी त्याचे चाहते सोशल मीडियावर शुभेच्छा देत आहेत.