राज्यात ‘ऑक्टोबर हीट’चा तडाखा;
कोकणाला येलो अलर्ट, तापमान ३८° पार!

Top 15 News : राज्यात मान्सूनच्या परतीचा प्रवास सुरू असतानाच आता ‘ऑक्टोबर हीट’चा तडाखा जाणवत आहे. मुंबई, ठाणे, पालघर, रायगड आणि रत्नागिरीत उष्ण व दमट हवामानाचा येलो अलर्ट देण्यात आला आहे. पाऊस थांबल्याने अनेक भागांत तापमान ३५ अंशांच्या पुढे गेले आहे. मालेगावमध्ये सर्वाधिक ३८.४, अमरावती ३८, डहाणू ३७.९, रत्नागिरी ३७.७, जळगाव ३७.५, सांताक्रूझ ३७.४ आणि अकोला ३७.१ अंश तापमान नोंदले गेले. पुण्यात दुपारी कडक ऊन, ढगाळ वातावरण आणि रात्री गारवा अशी स्थिती आहे. नागपुरातही तापमान ३५ अंशांवर पोहोचले आहे.

आंदोलनात ओमराजेंविरोधात घोषणाबाजी;
विद्यार्थ्यांना विवेकानंद पाटलांनी सुनावलं

एमपीएससी विद्यार्थ्यांच्या आंदोलनाला शिंदे गटाचे खासदार ओमराजे निंबाळकर यांनी भेट देत पाठिंबा दिला. मात्र, त्यांच्या उपस्थितीत काही विद्यार्थ्यांनी घोषणाबाजी करत गोंधळ घातला. यावेळी विद्यार्थी विवेकानंद पाटील यांनी आंदोलकांना समज देत, ओमराजे समर्थन देण्यासाठी आले असून त्यांचा मान राखावा, असे आवाहन केले. तसेच आंदोलनाला गालबोट लागेल असे काही करू नका, असेही त्यांनी सांगितले. ओमराजेंनी विद्यार्थ्यांची माफी मागण्याची गरज नसल्याचे स्पष्ट केले. दरम्यान, पक्षांतराच्या मुद्द्यावर ओमराजेंनी, मतदारसंघातील जनतेची कामे करत असून परिस्थितीमुळे पक्षांतराचा निर्णय घेतल्याचे सांगितले. त्यानंतर पोलिस बंदोबस्तात त्यांना आंदोलनस्थळाबाहेर नेण्यात आले.

मराठवाडा पदवीधरसाठी सतीश चव्हाण पुन्हा मैदानात;
राष्ट्रवादीकडून उमेदवारी जाहीर

सुनेत्रा पवार यांच्या नेतृत्वाखालील राष्ट्रवादी काँग्रेसने मराठवाडा पदवीधर मतदारसंघासाठी सतीश चव्हाण यांना पुन्हा उमेदवारी दिली आहे. चव्हाण उद्या उमेदवारी अर्ज दाखल करणार आहेत. महायुतीच्या जागावाटपात ही जागा राष्ट्रवादीच्या वाट्याला आली आहे. सतीश चव्हाण यांनी २००८, २०१४ आणि २०२० अशा सलग तीन निवडणुकांमध्ये विजय मिळवला आहे. उमेदवारी जाहीर झाल्यानंतर पदवीधरांचे प्रश्न ठामपणे मांडणार असल्याचे त्यांनी सांगितले. महायुतीच्या नेत्यांनी दाखवलेला विश्वास सार्थ ठरवेन, अशी ग्वाहीही त्यांनी दिली. दरम्यान, २३ ऑक्टोबरला मतदान, तर २७ ऑक्टोबरला मतमोजणी होणार आहे.

नागपूर पदवीधर मतदारसंघात भाजपमध्ये बंडखोरी;
अनिल सोले अपक्ष लढणार

महाराष्ट्र विधानपरिषदेच्या पदवीधर आणि शिक्षक मतदारसंघातील निवडणुकीसाठी भाजपने नागपूर पदवीधरमधून सुधाकर कोहळे यांना उमेदवारी दिली. मात्र, भाजपचे इच्छुक उमेदवार अनिल सोले यांनी अपक्ष निवडणूक लढवण्याची घोषणा केली आहे. कार्यकर्त्यांच्या आग्रहास्तव उमेदवारी अर्ज दाखल करणार असल्याचे सोले यांनी सांगितले. सोले हे केंद्रीय मंत्री नितीन गडकरी यांचे निकटवर्तीय असून, त्यांनी नागपूरचे महापौरपदही भूषवले आहे. काँग्रेसने या मतदारसंघातून अभिजीत वंजारी यांना उमेदवारी दिली आहे. दरम्यान, मतदान 23 ऑक्टोबरला, तर मतमोजणी 27 ऑक्टोबरला होणार आहे.

शरद कोळींवर MPDAची कारवाई;
येरवडा कारागृहात रवानगी

शिवसेना ठाकरे गटाचे उपनेते शरद कोळी यांच्यावर सोलापूर ग्रामीण पोलिसांनी MPDA कायद्यानुसार प्रतिबंधात्मक कारवाई केली आहे. पोलिसांनी त्यांना सांगलीतून ताब्यात घेतल्यानंतर एक वर्षासाठी येरवडा मध्यवर्ती कारागृहात स्थानबद्ध केले. कोळी यांच्यावर खंडणी, वाळू तस्करी आणि प्रक्षोभक भाषणांसह विविध गुन्हे दाखल असल्याची पोलिसांची माहिती आहे. MPDA अंतर्गत सार्वजनिक सुव्यवस्थेला धोका निर्माण होऊ नये, यासाठी प्रतिबंधात्मक स्थानबद्धतेची तरतूद आहे. जिल्हाधिकाऱ्यांच्या आदेशानुसार ही कारवाई करण्यात आली.

 ‘त्यांचा’  मोर्चा म्हणजे हरवलेली जमीन शोधण्याचा प्रयत्न’;
देवेंद्र फडणवीसांचा ठाकरे बंधूंवर हल्लाबोल Top 15 News :

मुख्यमंत्री देवेंद्र फडणवीस यांनी ठाकरे बंधूंच्या मोर्चावर टीका केली. हा मोर्चा म्हणजे हरवलेली जमीन शोधण्याचा प्रयत्न असल्याचे ते म्हणाले. मोर्चासाठी मोठी हाइप निर्माण करूनही अपेक्षित गर्दी झाली नसल्याचा दावा त्यांनी केला. महाराष्ट्र विधानसभा निवडणुकीत गडबड झाल्याच्या आरोपांवरही फडणवीसांनी निशाणा साधला. मुख्य निवडणूक आयुक्त ज्ञानेश कुमार यांना हटवण्याच्या मागणीवर बोलताना, महाराष्ट्राची विधानसभा निवडणूक २०२४ मध्ये झाली, तर ज्ञानेश कुमार २०२५ मध्ये मुख्य निवडणूक आयुक्त झाले, असे त्यांनी सांगितले. त्यामुळे २०२४च्या निवडणुकीवर त्यांचा प्रभाव कसा असू शकतो, असा सवाल फडणवीसांनी उपस्थित केला.

दुष्काळग्रस्तांना सरसकट कर्जमाफीची अपेक्षा;
सुप्रिया सुळेंची सरकारला सहकार्याची भूमिका

सातारा दौऱ्यावर असलेल्या खासदार सुप्रिया सुळे यांनी दुष्काळ, विद्यार्थ्यांचे प्रश्न आणि रोजगार हमी योजनेवरून सरकारकडे मागण्या केल्या. दुष्काळग्रस्त भागाचा दौरा केल्यानंतर सरसकट कर्जमाफीची अपेक्षा होती; मात्र अद्याप ठोस निर्णय झालेला नसल्याचे त्यांनी सांगितले. दुष्काळाच्या प्रश्नावर राजकारण करायचे नसून, मदत आणि सहकार्याची भूमिका असल्याचे सुळे यांनी स्पष्ट केले. पवार साहेबांनी मुख्यमंत्री देवेंद्र फडणवीस यांना यासंदर्भात दोन पत्रे दिल्याचे त्यांनी सांगितले. विद्यार्थ्यांचे शैक्षणिक नुकसान टाळण्यासाठी लवकर तोडगा काढावा, तसेच रोजगार हमी योजनेच्या नियमांतून गरजूंना दिलासा द्यावा, अशी मागणी त्यांनी केली.

MPSC आंदोलनाला नितेश राणेंचा पाठिंबा;
राजकारण बाजूला ठेवण्याचा दिला सल्ला

MPSC विद्यार्थ्यांच्या आंदोलनाला मंत्री नितेश राणे यांनी पाठिंबा दिला. विद्यार्थ्यांना मित्र आणि भाऊ म्हणून भेटायला आलो असून, राजकारण करण्याचा हेतू नसल्याचे त्यांनी स्पष्ट केले. मुख्यमंत्री देवेंद्र फडणवीस यांनी विद्यार्थ्यांसोबत जवळपास पावणेतीन तास चर्चा केली असून, १३ पैकी १२ मागण्या पूर्ण झाल्याचा दावा राणेंनी केला. विद्यार्थ्यांनी राजकीय नेत्यांना बाजूला ठेवून सरकारशी संवाद साधावा, असे आवाहन त्यांनी केले. रोहित पवार हे आपले मित्र असून राजकीय शत्रू नसल्याचेही राणेंनी सांगितले. MPSC व्यवस्थेतील त्रुटी दूर करण्यासाठी सरकार काम करत असून, विद्यार्थ्यांना पुन्हा आंदोलन करण्याची वेळ येऊ नये, असा अहवाल तयार होत असल्याचे त्यांनी नमूद केले.

बिबट्याच्या हल्ल्यात चिमुरड्याचा मृत्यू;
उदयनराजेंनी बोलावली तातडीची बैठक

सातारा जिल्ह्यात बिबट्याच्या हल्ल्यात दोन वर्षांच्या जयचा मृत्यू झाल्याने हळहळ व्यक्त होत आहे. वीज गेल्यानंतर घराबाहेर गेलेल्या जयवर बिबट्याने हल्ला करून त्याला ओढ्याच्या दिशेने नेले. आवाज ऐकून वडील बाहेर आले. कुटुंबीय आणि ग्रामस्थांनी शोध घेतल्यानंतर सुमारे ३०० ते ४०० मीटर अंतरावर जय आढळला. टॉर्चचा प्रकाश पडताच बिबट्या पळून गेल्याचे वडिलांनी सांगितले. परिसरात गेल्या एक-दोन महिन्यांपासून बिबट्याचा वावर असल्याचा दावा त्यांनी केला. घटनेनंतर उदयनराजे भोसले यांनी दुःख व्यक्त करत उद्या सकाळी ११ वाजता संबंधित अधिकाऱ्यांची तातडीची बैठक बोलावली आहे.

पंकजा मुंडे थेट शेतकऱ्यांच्या बांधावर;
दुष्काळग्रस्त भागाची पाहणी

बीड जिल्ह्यातील अकराही तालुके दुष्काळाच्या छायेत असून, पावसाअभावी शेतकऱ्यांचे उभे पीक करपले आहे. या पार्श्वभूमीवर मंत्री पंकजा मुंडे यांनी काकडहिरा येथे शेतकऱ्यांच्या बांधावर जाऊन दुष्काळग्रस्त पिकांची पाहणी केली. त्यांनी शेतकऱ्यांशी संवाद साधत सरकार त्यांच्या पाठीशी असल्याचा विश्वास दिला. केंद्र आणि राज्य सरकारच्या निकषांचा विचार न करता इतिहासात पहिल्यांदाच सरकारने दुष्काळ जाहीर केल्याचा दावा मुंडे यांनी केला. सरकार शेतकऱ्यांबाबत संवेदनशील असून, येणारी दिवाळी शेतकऱ्यांसाठी गोड करण्याचा शब्द त्यांनी दिला. त्यामुळे आता मदतीच्या अपेक्षेने शेतकऱ्यांच्या नजरा सरकारकडे लागल्या आहेत.

सुप्रीम कोर्टात पोहोचला मुख्य निवडणूक आयुक्तांचा वाद;
ज्ञानेश कुमारांच्या विरोधातील याचिकेवर होणार सुनावणी Top 15 News :

मुख्य निवडणूक आयुक्त ज्ञानेश कुमार यांच्या कार्यपद्धतीवर प्रश्न उपस्थित करणाऱ्या दोन याचिकांवर सर्वोच्च न्यायालयात आज सुनावणी होणार आहे. सरन्यायाधीश सूर्यकांत यांच्या अध्यक्षतेखालील खंडपीठ या प्रकरणाची सुनावणी करणार आहे. याचिकांमध्ये SIR प्रक्रियेशी संबंधित कथित एकतर्फी घेतलेले १४ निर्णय रद्द करण्याची मागणी करण्यात आली आहे. तसेच ज्ञानेश कुमार यांना अंतरिम काळात निलंबित करण्याची मागणीही करण्यात आली आहे. SIR दरम्यान ECINet आणि ERONet डेटाबेसचे फॉरेन्सिक ऑडिट तसेच कथित १३ कोटी मतदारांची नावे वगळल्याच्या आरोपांची स्वतंत्र चौकशी करण्याची मागणी याचिकेत आहे

हरियाणाच्या ४८ आमदारांना मोदींचं नवं मिशन;
पंजाब निवडणुकीसाठी भाजपची रणनीती

पंजाब विधानसभा निवडणुकीच्या पार्श्वभूमीवर भाजपने तयारीला वेग दिला आहे. पंतप्रधान नरेंद्र मोदी यांनी हरियाणातील भाजप आमदारांची बैठक घेतली. सूत्रांच्या माहितीनुसार, हरियाणातील बहुतांश आमदार आणि नेत्यांना पंजाबमध्ये प्रचाराची जबाबदारी दिली जाण्याची शक्यता आहे. त्यांच्यावर विधानसभा मतदारसंघ आणि बूथस्तरावरील कामांची जबाबदारी सोपवली जाऊ शकते. तसेच पंजाबमध्ये हरियाणाचे ‘गव्हर्नन्स मॉडेल’ मांडण्याची भाजपची तयारी आहे. मुख्यमंत्री नायब सिंह सैनी यांनी गेल्या वर्षभरात पंजाबमध्ये सुमारे ९० कार्यक्रमांना हजेरी लावली आहे. २०२७च्या निवडणुकीपूर्वी भाजपचा जनसंपर्क वाढवण्यावर भर दिला जात आहे.

AI नंतर ट्रम्प यांचा मोठा निर्णय;
अमेरिकेत ‘सुपर इंटेलिजन्स फोर्स’ची स्थापना

अमेरिकेचे राष्ट्राध्यक्ष डोनाल्ड ट्रम्प यांनी ‘सुपर इंटेलिजन्स फोर्स’ स्थापन करण्याची घोषणा केली आहे. कृत्रिम बुद्धिमत्तेच्या क्षेत्रात अमेरिकेचे जागतिक नेतृत्व कायम ठेवणे हा या फोर्सचा उद्देश असल्याचे ट्रम्प यांनी सांगितले. ‘सुपर इंटेलिजन्स’ची क्रांती औद्योगिक आणि इंटरनेट क्रांतीपेक्षाही मोठी ठरू शकते, असा दावा त्यांनी केला. SIF फेडरल सरकार, ग्राहक, धार्मिक संस्था, महत्त्वपूर्ण पायाभूत सुविधा आणि तंत्रज्ञान कंपन्यांमधील समन्वय साधणार आहे. फोर्सकडून राष्ट्राध्यक्ष आणि चीफ ऑफ स्टाफ यांना अहवाल सादर केला जाणार आहे. ट्रम्प यांनी AI ला ‘SI’ म्हणजेच ‘सुपर इंटेलिजन्स’ असे नाव देण्याची घोषणाही केली आहे.

ऋतुराजच्या अनुपस्थितीत पृथ्वी शॉच्या खांद्यावर धुरा!
महाराष्ट्राच्या संघाच्या कर्णधारपदाची जबाबदारी

2026-27 रणजी ट्रॉफी हंगामातील पहिल्या सामन्यासाठी महाराष्ट्राच्या संघाच्या कर्णधारपदाची जबाबदारी पृथ्वी शॉवर सोपवण्यात आली आहे. नियमित कर्णधार ऋतुराज गायकवाड भारत ‘अ’ संघासोबत असल्याने तो उपलब्ध नसणार आहे. महाराष्ट्राचा पहिला सामना 11 ऑक्टोबरला दिल्लीतील पालम ए स्टेडियमवर सर्व्हिसेसविरुद्ध होणार आहे. शॉने यापूर्वी 2018 मध्ये भारताच्या अंडर-19 संघाचे नेतृत्व केले आहे. महाराष्ट्राच्या संघात सौरभ नवले, सचिन दास, ऋषिकेश सोनावणे यांसारख्या युवा खेळाडूंनाही संधी मिळाली आहे. त्यामुळे शॉच्या नेतृत्वाकडे सर्वांचे लक्ष लागले आहे.

अविनाश मिश्रा ठरला ‘खतरों के खिलाडी १५’चा विजेता;
जिंकली ट्रॉफीसह लाखोंची बक्षिसे Top 15 News :

अनेक आव्हानात्मक स्टंट्सनंतर अभिनेता अविनाश मिश्रा ‘खतरों के खिलाडी १५’चा विजेता ठरला आहे. अंतिम फेरीत त्याने ऋत्विक धनजानी आणि ओरी यांना मागे टाकत ट्रॉफीवर नाव कोरले. विजेतेपदासोबत अविनाशला २० लाख रुपये रोख, युरोप टूर आणि कार बक्षीस म्हणून मिळाली. संपूर्ण सीझनमध्ये दमदार कामगिरी करत त्याने एकही टास्क गमावला नाही. त्याला ‘स्विफ्ट इम्युनिटी जॅकेट’ही मिळाले होते. विजयानंतर अविनाशने हा प्रवास स्वतःला सिद्ध करण्यासाठी महत्त्वाचा ठरल्याचे सांगितले. जवळपास दशकभराच्या टीव्ही कारकिर्दीत ‘खतरों के खिलाडी’चे विजेतेपद हा त्याच्यासाठी महत्त्वाचा टप्पा ठरला आहे.