मनोज जरांगेंना मोठा झटका
सहकाऱ्यांच्या आर्थिक व्यवहारांची चौकशी?

Top 15 News : मराठा आरक्षणासाठी २० दिवस उपोषण करणारे मनोज जरांगे पाटील सध्या चर्चेत आले आहेत. त्यांच्या सहकाऱ्यांशी संबंधित आर्थिक व्यवहारांची आयकर विभागाकडून छाननी होणार असल्याची माहिती समोर आली आहे. यात आयकर रिटर्न, मालमत्ता, मोठे आर्थिक व्यवहार तसेच व्यावसायिक संबंध तपासले जाण्याची शक्यता आहे. आंदोलनाशी संबंधित व्यक्ती किंवा नातेवाईकांशी जोडलेल्या कंपन्यांना मिळालेल्या सरकारी कंत्राटांचीही चौकशी होणार असल्याचे सांगितले जात आहे. छत्रपती संभाजीनगरमधील एका कंपनीला मिळालेल्या सुमारे ७६४.७ कोटी रुपयांच्या कामांचाही तपास होण्याची माहिती आहे. दरम्यान, राधाकृष्ण विखे पाटील यांनी रुग्णालयात जरांगे यांची भेट घेतली होती.

परतीचा पाऊस जोरात;
राज्यातील २४ जिल्ह्यांना येलो अलर्ट

राज्यात परतीचा मान्सून सक्रिय झाला असून अनेक भागांत विजांच्या कडकडाटासह मुसळधार पाऊस पडत आहे. हवामान विभागाने आज राज्यातील २४ जिल्ह्यांना येलो अलर्ट जारी केला आहे. कोकणातील पालघर, ठाणे, मुंबई, रायगड, रत्नागिरी आणि सिंधुदुर्ग, तर नाशिक, अहिल्यानगर, पुणे, कोल्हापूर, सातारा, सांगली आणि सोलापूरमध्ये मुसळधार ते अतिमुसळधार पावसाचा अंदाज आहे. मराठवाड्यात जालना, परभणी, बीड, हिंगोली, नांदेड, लातूर आणि धाराशिवमध्येही पावसाची शक्यता आहे. विदर्भातील काही जिल्ह्यांतही मुसळधार पाऊस पडण्याचा अंदाज असून नागरिक आणि शेतकऱ्यांना सतर्क राहण्याचा इशारा देण्यात आला आहे.

दिवाळीला साखर हवी असेल तर मागण्या मान्य करा;
राजू शेट्टींचा केंद्राला इशारा

साखर गाळप हंगाम सुरू करण्यावरून स्वाभिमानी शेतकरी संघटनेचे अध्यक्ष राजू शेट्टी यांनी केंद्र सरकारला इशारा दिला आहे. साखरेचा हमीभाव प्रतिकिलो ५० रुपये करावा, शेतकऱ्यांना प्रतिटन ५०० रुपये अनुदान द्यावे आणि इथेनॉलचा दर प्रतिलिटर ७० रुपये करावा, या तीन प्रमुख मागण्या त्यांनी केल्या आहेत. या मागण्यांसाठी २९ सप्टेंबरला हुबळी येथे केंद्रीय मंत्री प्रल्हाद जोशी यांच्या निवासस्थानासमोर आंदोलन करण्यात येणार आहे. मागण्या मान्य न झाल्यास साखर कारखाने सुरू करू दिले जाणार नाहीत, असा इशाराही शेट्टी यांनी दिला.

मराठवाड्यात पाणीटंचाईची शक्यता;
गावनिहाय नियोजनाचे सरकारचे निर्देश

मराठवाड्यात यंदा सरासरीच्या तुलनेत कमी पाऊस झाल्याने संभाव्य पाणीटंचाईचा सामना करण्यासाठी गावनिहाय नियोजन करण्याचे निर्देश राज्यमंत्री मेघना बोर्डीकर यांनी दिले. जिल्हाधिकारी कार्यालयात झालेल्या आढावा बैठकीत पर्जन्यमान, पाणीसाठा आणि पाणीपुरवठा योजनांचा आढावा घेण्यात आला. जून ते सप्टेंबर २०२६ दरम्यान मराठवाड्यात सरासरी ६७९.५० मिलिमीटर पावसाच्या तुलनेत आतापर्यंत ४३०.८० मिलिमीटर पाऊस झाला आहे. पिण्याच्या पाण्याला सर्वोच्च प्राधान्य देत उपलब्ध जलस्रोतांचे योग्य व्यवस्थापन आणि पर्यायी स्रोत सज्ज ठेवण्याच्या सूचना देण्यात आल्या. प्रलंबित पाणीपुरवठा योजनांची कामे गतीने पूर्ण करून नागरिकांच्या तक्रारींचे तातडीने निराकरण करण्याचे निर्देशही देण्यात आले.

महायुतीत अंतर्गत वाद चव्हाट्यावर;
राजू कारेमोरे यांना भाजपचा इशारा Top 15 News : 

भंडारा जिल्ह्यात महायुतीतील अंतर्गत मतभेद चव्हाट्यावर आले आहेत. मोहाडी येथे भाजपच्या कार्यकर्ता-पदाधिकाऱ्यांच्या बैठकीत तुमसर विधानसभा प्रमुख प्रदीप पडोळे यांनी राष्ट्रवादी काँग्रेसचे आमदार राजू कारेमोरे यांच्यावर टीका केली. कारेमोरे भाजपच्या मदतीने आमदार झाले, मात्र आता ते भाजप कार्यकर्त्यांना डावलत असल्याचा आरोप पडोळे यांनी केला. भूमिका बदलली नाही तर २०२९ मध्ये त्यांची गाठ भाजपशी असेल, असा इशाराही त्यांनी दिला. भाजप नेते परिणय फुके यांनी आमच्यात मतभेद आहेत, मनभेद नाहीत, असं सांगितलं. तसेच कारेमोरे आणि उपमुख्यमंत्री एकनाथ शिंदे यांच्याशी याबाबत चर्चा करणार असल्याचे फुके यांनी स्पष्ट केले. ही अपेक्षा स्वाभाविक असल्याचे फुके म्हणाले.

गोकुळ निवडणुकीसाठी भाजपकडून २५ जागांवर अर्ज;
शौमिका महाडिकांची माहिती

कोल्हापूर जिल्हा दूध उत्पादक संघ अर्थात गोकुळच्या निवडणुकीसाठी भाजपकडून सर्व २५ जागांवर उमेदवारी अर्ज दाखल करण्यात येत असल्याची माहिती शौमिका महाडिक यांनी दिली. महायुतीतील जागावाटपाचा अंतिम निर्णय अद्याप झालेला नसल्याने प्रत्येक पक्षाकडून उमेदवारी अर्ज दाखल केले जात आहेत. जागावाटप निश्चित झाल्यानंतर अतिरिक्त अर्ज मागे घेतले जातील, असे महाडिक यांनी स्पष्ट केले. प्रत्येक पक्ष आपल्या ताकदीनुसार जागांची मागणी करत असून सर्व घटक पक्षांना सन्मानजनक जागा मिळतील, असा विश्वास त्यांनी व्यक्त केला. निवडणूक बिनविरोध झाल्यास स्वागतच, मात्र गरज पडल्यास निवडणूक लढवण्याची भाजपची तयारी असल्याचेही त्यांनी सांगितले.

सोलापुरात ८० टक्के पिकांचे नुकसान;
१५ दिवसांत पाऊस न झाल्यास परिस्थिती गंभीर

सोलापूर जिल्ह्यात सध्या ८० टक्के पिकांचे नुकसान झाले असून, पुढील १५ दिवसांत पाऊस न झाल्यास १०० टक्के नुकसान होण्याची शक्यता पालकमंत्री जयकुमार गोरे यांनी व्यक्त केली. दुष्काळी परिस्थितीचा प्रशासनाकडून आढावा घेऊन अहवाल तयार करण्याच्या सूचना देण्यात आल्या आहेत. उजनी धरण भरले असले तरी जिल्ह्यातील ६८ गावांना सध्या टँकरने पाणीपुरवठा सुरू आहे. वर्षभरासाठी आवश्यक पाणी आरक्षित करून उर्वरित पाणी शेतीसाठी देण्याबाबत अहवाल मागवण्यात आला आहे. चारा उपलब्धतेचाही आढावा घेण्याच्या सूचना देण्यात आल्या असून, दुष्काळी परिस्थितीला सामोरे जाण्यासाठी पूर्वतयारी सुरू असल्याचे गोरे यांनी सांगितले.

दुष्काळ जाहीर करण्याबाबत सरकार सकारात्मक;
गुलाबराव पाटलांचा शेतकऱ्यांना दिलासा

राज्यात दुष्काळ जाहीर करण्याच्या मागणीवर सरकार सकारात्मक असल्याचे मंत्री गुलाबराव पाटील यांनी सांगितले. उद्याच्या मंत्रिमंडळ बैठकीत दुष्काळी परिस्थितीवर चर्चा होणार असून, शेतकऱ्यांना जास्तीत जास्त मदत देण्याचा सरकारचा प्रयत्न राहील, असे त्यांनी स्पष्ट केले. दुष्काळी मदतीसाठी पंचनामे महत्त्वाचे असून, नुकसानीचे क्षेत्र, पिके आणि नुकसानीचे प्रमाण निश्चित झाल्यानंतर मदतीबाबत निर्णय घेता येईल, असे पाटील म्हणाले. दरम्यान, दुष्काळी आढावा बैठकीतील काजू-बदामाच्या अल्पोपाहारावरून सुरू असलेल्या चर्चेवरही त्यांनी प्रतिक्रिया दिली. शेतकरी आपल्यासाठी देव असून, त्यांच्या मदतीसाठी सरकार कटिबद्ध असल्याचे त्यांनी स्पष्ट केले.

शिवकालीन दरबाराचा भव्य देखावा;
ओधवनगर मंडळाचा अनोखा उपक्रम

मुंबईतील बोरिवली पूर्व परिसरातील ओधवनगर सार्वजनिक गणेशोत्सव मंडळाने यंदा छत्रपती शिवाजी महाराजांच्या शिवकालीन दरबाराचा भव्य देखावा साकारला आहे. मंडळाच्या २५व्या वर्षानिमित्त शिवकालीन दरबारासोबत ऐतिहासिक शस्त्र प्रदर्शनही आयोजित करण्यात आले आहे. नवीन पिढीला छत्रपती शिवाजी महाराजांचा इतिहास आणि पराक्रम समजावा, हा देखाव्यामागचा उद्देश असल्याचे मंडळाने सांगितले. विशेष म्हणजे, गणेशमूर्ती कागदाच्या लगद्यापासून पर्यावरणपूरक पद्धतीने तयार करण्यात आली आहे. संपूर्ण देखाव्यातही पर्यावरणपूरक साहित्याचा वापर करण्यात आला आहे. इतिहासाची माहिती आणि पर्यावरण संवर्धनाचा संदेश एकाच माध्यमातून देण्याचा प्रयत्न मंडळाने केला आहे.

नाशिकमध्ये पावसाअभावी पिकांचे नुकसान;
परिस्थितीचा अहवाल मुख्यमंत्र्यांकडे देणार Top 15 News : 

नाशिक जिल्ह्यात पावसाअभावी अनेक पिकांचे नुकसान झाले असून, परिस्थितीचा मंत्री दादा भुसे यांनी आढावा घेतला. जिल्हाधिकारी आणि कृषी विभागाच्या अधिकाऱ्यांसोबत तालुका व मंडळनिहाय परिस्थितीवर चर्चा करण्यात आली. अनेक पिके हातची गेली असून, उर्वरित पिकांच्या नुकसानीनुसार शेतकऱ्यांना भरपाई देण्याची प्रक्रिया केली जाईल, असे भुसे यांनी सांगितले. जिल्ह्यातील सविस्तर अहवाल मुख्यमंत्री आणि उपमुख्यमंत्र्यांसमोर मांडणार असल्याचे त्यांनी स्पष्ट केले. सुमारे ३० ते ४० टक्के शेतकऱ्यांनी पीक विमा घेतला असून, काही गावांत टँकरने पाणीपुरवठा सुरू आहे. पाऊस न झाल्यास टँकरची संख्या वाढण्याची शक्यता आहे.

राम मंदिर दान प्रकरणात मोठी माहिती;
सीसीटीव्हीत १०५ घटनांचा खुलासा

अयोध्येतील राम मंदिरातील दान रक्कम आणि मौल्यवान वस्तूंमधील कथित अनियमिततेप्रकरणी एसआयटीने सर्वोच्च न्यायालयात तपासाची माहिती दिली आहे. सीसीटीव्ही फुटेजच्या तपासात दान मोजण्याच्या खोलीतून परवानगीशिवाय पैसे काढणे किंवा लपविण्याच्या १०५ घटना आढळल्याचे एसआयटीने सांगितले. या प्रकरणात आतापर्यंत १७३ साक्षीदारांचे जबाब नोंदवण्यात आले आहेत. तसेच पावतीशिवाय दान केलेल्या ८६ मौल्यवान वस्तूंची माहिती समोर आली आहे. दरम्यान, चांदीच्या विटा, चांदी, चरण पादुका आणि रामचरितमानस यांसारख्या देणग्यांमध्ये अनियमितता आढळली नसल्याचे एसआयटीने स्पष्ट केले. या प्रकरणातील आरोपपत्र २५ सप्टेंबरपर्यंत दाखल होणार आहे.

ट्रोल पंपचालकांचा UPI शुल्काला विरोध;
पेट्रोल-डिझेल-CNG वगळण्याची मागणी

२ हजार रुपयांपेक्षा जास्त UPI व्यवहारांवर ०.४ टक्के शुल्क आकारण्याच्या निर्णयाला पेट्रोल पंपचालकांनी विरोध केला आहे. पेट्रोल, डिझेल आणि CNGच्या व्यवहारांना या शुल्कातून वगळण्याची मागणी त्यांनी केली आहे. अतिरिक्त शुल्कामुळे राज्यातील सुमारे ७,५०० पेट्रोल पंपांना दररोज आर्थिक नुकसान होण्याची शक्यता आहे. पंपचालकांनी यापूर्वीच कमिशन वाढवण्याची मागणी केली होती. मात्र, अपेक्षित वाढ न झाल्याने अतिरिक्त शुल्क स्वतःच्या खिशातून भरण्यास त्यांनी नकार दिला आहे. त्यामुळे काही पंपांवर UPIऐवजी रोख व्यवहार करण्याचा पर्याय स्वीकारला जात असल्याने ग्राहक आणि पंपचालकांमध्ये वाद होण्याची शक्यता आहे.

ट्रम्प यांचा मीडिया बंदीचा निर्णय;
प्रमुख टीव्ही नेटवर्कचा कव्हरेजला ब्रेक

अमेरिकेचे राष्ट्राध्यक्ष डोनाल्ड ट्रम्प यांनी CNN, MS NOW आणि Politico या वृत्तसंस्थांना व्हाईट हाऊसमध्ये प्रवेशबंदी केली. या माध्यमांवर ट्रम्प यांनी ‘फेक न्यूज’ पसरवल्याचा आरोप केला. यानंतर अमेरिकेतील प्रमुख टीव्ही नेटवर्कनी राष्ट्राध्यक्षांच्या कार्यक्रमांचे संयुक्त कव्हरेज थांबवले. दरम्यान, CNN, MS NOW आणि Politico यांनी ट्रम्प प्रशासनाविरोधात न्यायालयात धाव घेतली आहे. त्यांनी व्हाईट हाऊसची बंदी अमेरिकेच्या संविधानातील माध्यम स्वातंत्र्याच्या अधिकारांचे उल्लंघन असल्याचे म्हटले आहे. या निर्णयामुळे ट्रम्प प्रशासन आणि अमेरिकेतील माध्यमांमधील वाद आणखी वाढला आहे.

CSKमध्ये झहीर खानची एन्ट्री;
2027 साठी मोठी जबाबदारी 

आयपीएलमधील यशस्वी संघ चेन्नई सुपर किंग्जने 2027च्या हंगामासाठी भारताचा माजी वेगवान गोलंदाज झहीर खान याची निवड केली आहे. स्टीफन फ्लेमिंग यांनी मुख्य प्रशिक्षकपद सोडल्यानंतर त्यांच्या जागी झहीर खानची नियुक्ती करण्यात आली आहे. CSKने सोशल मीडिया प्लॅटफॉर्म ‘एक्स’वरून ही माहिती दिली. झहीरने 2017 मध्ये क्रिकेटमधून निवृत्ती घेतल्यानंतर मुंबई इंडियन्स आणि लखनौ सुपर जायंट्ससोबत विविध जबाबदाऱ्या सांभाळल्या आहेत. आयपीएलमध्ये त्याने 100 सामने खेळत 102 विकेट घेतल्या आहेत. 2011च्या विश्वचषक विजेत्या भारतीय संघाचाही तो सदस्य होता. नव्या भूमिकेबाबत झहीरने उत्साह व्यक्त केला आहे.

“किमान सलमान खानचं तरी ऐका”
ट्रोलर्सना स्मृती इराणींचं आवाहन Top 15 News : 

‘क्योंकि सास भी बहू थी’ मालिकेतील अभिनेत्री आणि माजी केंद्रीय मंत्री स्मृती इराणी यांनी सोशल मीडियावरील ट्रोलिंगवर भाष्य केलं आहे. त्यांनी सहकलाकारांसोबतचा एक व्हिडीओ इन्स्टाग्रामवर शेअर केला. “कुणाबद्दल चांगलं बोलता येत नसेल, तर निदान वाईट बोलू नका. आमचं नाहीतर किमान सलमान खानचं तरी ऐका,” असं आवाहन त्यांनी केलं. सार्वजनिक जीवनातील व्यक्तींनी ट्रोलिंग सहन करावं किंवा गप्प राहावं, ही मानसिकता चुकीची असल्याचं त्यांनी म्हटलं. मतभेद आणि टीका चर्चेचा भाग असू शकतात; मात्र त्याच्या नावाखाली अपमान आणि मानहानी योग्य नसल्याचं स्मृती इराणी यांनी स्पष्ट केलं. असंही त्यांनी आपल्या पोस्टमधून ठामपणे सांगितलं आहे.