सरकारच्या २६ योजनांचा आता रिअल टाइम आढावा;
‘महा-टॅक’ची स्थापना

Top 15 News : राज्य सरकारच्या विविध योजना आणि धोरणांच्या अंमलबजावणीचा आता रिअल टाइम पद्धतीने आढावा घेतला जाणार आहे. मुख्यमंत्री कार्यालयाच्या अंतर्गत IIM मुंबईच्या माध्यमातून २४ सदस्यांचा महाराष्ट्र तांत्रिक सहाय्यता कक्ष म्हणजेच ‘महा-टॅक’ स्थापन करण्यात येणार आहे. या कक्षाकडून लाडकी बहीण योजनेसह राज्यातील २६ प्रमुख योजनांचे दर तिमाही मूल्यमापन केले जाणार आहे. तसेच उद्योग, IT, GCC, इलेक्ट्रिक वाहन, हरित हायड्रोजन, पर्यटन, गृहनिर्माण आणि महिला धोरणासह २५ प्रमुख धोरणांचे विश्लेषण केले जाणार आहे. योजनांवरील खर्च, अंमलबजावणी आणि अपेक्षित परिणामांचा आढावा घेण्यात येईल. मुख्य सचिवांच्या अध्यक्षतेखालील समिती दर सहा महिन्यांनी आढावा घेणार आहे.

राज्यात ऊन-पावसाचा खेळ;
कोकण, पश्चिम महाराष्ट्रात आज पावसाचा अंदाज

राज्यात सध्या ऊन-पावसाचा खेळ सुरू असून, काही भागांत परतीचा पाऊस सक्रिय झाला आहे. हवामान खात्यानुसार, आज रायगड, रत्नागिरी आणि सिंधुदुर्ग जिल्ह्यांत विजांच्या कडकडाटासह पावसाची शक्यता आहे. पुणे, सातारा, सांगली आणि सोलापूर जिल्ह्यांतही तुरळक ठिकाणी विजांसह हलका पाऊस पडण्याचा अंदाज आहे. विदर्भ, मराठवाड्यासह उर्वरित राज्यात ढगाळ वातावरणासह ऊन-सावल्यांचा खेळ सुरू राहण्याची शक्यता आहे. दरम्यान, ऑक्टोबरच्या सुरुवातीलाच उकाडा वाढला असून, तापमान सरासरीपेक्षा एक-दोन अंशांनी अधिक राहण्याचा अंदाज आहे. पुण्यात कमाल तापमान ३३ ते ३४ अंशांवर पोहोचले आहे.

मनोज जरांगे यांच्या समर्थकांवर गुन्हा;
महिला आंदोलकाची पोलिसांत तक्रार

मराठा आंदोलक मनोज जरांगे यांच्या काही समर्थकांवर अंबड पोलीस ठाण्यात गुन्हा दाखल करण्यात आला आहे. अंतरवाली सराटी येथील महिला आंदोलक ललिता तारख यांच्या तक्रारीवरून १० ते ११ जणांविरोधात धमकी आणि बदनामी केल्याप्रकरणी कारवाई करण्यात आली. सोशल मीडियावर अश्लील भाषेत टीका, धमक्या तसेच AI तंत्रज्ञानाचा गैरवापर करून अश्लील फोटो आणि व्हिडिओ तयार करून प्रसारित केल्याचा आरोप तक्रारीत करण्यात आला आहे. ललिता तारख यांनी संशयित सोशल मीडिया अकाउंट्सचे स्क्रीनशॉट आणि फोन कॉल्सचे पुरावे पोलिसांकडे दिले असून, संबंधितांवर कठोर कारवाईची मागणी केली आहे.

शिवाजी पार्क आंदोलनाला पोलिसांचा नकार;
वसईतील वकिलांचा आंदोलकांना कायदेशीर मदतीचा हात

मुंबईतील शिवाजी पार्क येथे ‘कॉकरोच जनता पार्टी’तर्फे आयोजित आंदोलनाला मुंबई पोलिसांनी परवानगी नाकारली आहे. शिवाजी पार्क सायलेंस झोन असल्याचे सांगत पोलिसांनी २०१३ मधील मुंबई उच्च न्यायालयाच्या आदेशाचा हवाला दिला. तसेच वाहतूक कोंडी आणि ध्वनिप्रदूषणाचा मुद्दा उपस्थित करण्यात आला. मात्र, CJPचे संस्थापक अभिजीत दिपके यांनी आंदोलन नियोजित वेळेनुसार होणार असल्याचे सांगत गरज पडल्यास ‘जेल भरो’चा इशारा दिला आहे. दरम्यान, वसईतील वकील संघटनेने आंदोलकांना कायदेशीर मदतीची घोषणा केली असून, गुन्हे दाखल झाल्यास मुंबईत जाऊन विनामूल्य न्यायालयीन लढा देण्याचे म्हटले आहे.

सफाईचे बिल मंजूर करण्यासाठी ३.५० लाखांची लाच;
पालिकेच्या दोन अधिकाऱ्यांसह तिघांवर गुन्हा Top 15 News : 

गोवंडीतील सार्वजनिक शौचालयाच्या सफाईचे प्रलंबित बिल मंजूर करण्यासाठी ३ लाख ५० हजार रुपयांची लाच मागितल्याचा प्रकार समोर आला आहे. या प्रकरणी लाचलुचपत प्रतिबंधक विभागाने महापालिकेचे सहाय्यक अभियंता गणेश चांडोलकर, उपअभियंता अविनाश दुधमाते आणि खासगी व्यक्ती विनीत खाडे यांच्याविरोधात गुन्हा दाखल केला आहे. तक्रारदाराने लाच देण्यास नकार देत एसीबीकडे तक्रार केली होती. पडताळणीदरम्यान सहाय्यक अभियंत्याने स्वतःसाठी २ लाख रुपयांची मागणी केल्याचे निष्पन्न झाले. उर्वरित रकमेबाबत इतर दोघांमध्ये चर्चा झाल्याचेही तपासात समोर आले. तिन्ही आरोपींना चौकशीसाठी नोटीस बजावण्यात आली असून पुढील तपास सुरू आहे

शेतकऱ्यांच्या कर्जमाफीची घोषणा होणार?
रामदास आठवलेंचा दावा

महाराष्ट्रातील दुष्काळाच्या पार्श्वभूमीवर शेतकऱ्यांच्या कर्जमाफीचा मुद्दा चर्चेत आला आहे. केंद्रीय मंत्री रामदास आठवले यांनी महाराष्ट्रातील सर्व तालुक्यांत दुष्काळ जाहीर झाल्याचे सांगितले. शेतकऱ्यांची कर्जमाफी केली जाणार असल्याचा दावा त्यांनी केला. तसेच शेतमजुरांचाही दुष्काळी मदतीत विचार करावा, अशी मागणी मुख्यमंत्री देवेंद्र फडणवीस यांच्याकडे करणार असल्याचे आठवले यांनी स्पष्ट केले. दुष्काळामुळे रिपब्लिकन पक्षाची नियोजित रॅली रद्द करण्यात आली असून, कार्यकर्त्यांना शेतकऱ्यांना मदत करण्याच्या सूचना दिल्याचे त्यांनी सांगितले. केंद्र सरकारने दुष्काळाच्या पार्श्वभूमीवर काही निर्णय घेतले असून त्याचा राज्यातील शेतकऱ्यांना फायदा होईल, असेही आठवले म्हणाले. दरम्यान, कर्जमाफीच्या घोषणेची शक्यता असल्याचे त्यांच्या वक्तव्यामुळे स्पष्ट झाले.

 दुष्काळात  मुंबईत ५६ लाखांच्या गाड्यांचा प्रस्ताव;
मनसेचा सवाल

राज्यात दुष्काळाची परिस्थिती असताना नवी मुंबई महापालिकेतील पदाधिकाऱ्यांसाठी ५६ लाख रुपये खर्चून स्कॉर्पिओ गाड्या खरेदी करण्याच्या प्रस्तावावरून वाद निर्माण झाला आहे. आरोग्य सभापती आणि प्रभाग समिती सभापतींसाठी या गाड्या खरेदी केल्या जाणार असल्याचा दावा मनसेने केला आहे. मनसे प्रवक्ते गजानन काळे यांनी या प्रस्तावावरून सत्ताधाऱ्यांवर टीका केली आहे. याआधी नवी मुंबईच्या महापौरांच्या अमेरिका दौऱ्यावर २८ लाख रुपये खर्च झाल्याचा दावाही त्यांनी केला. दुष्काळी परिस्थितीत नागरिकांना मदतीची गरज असताना पदाधिकाऱ्यांच्या गाड्यांवर एवढा खर्च कशासाठी, असा सवाल काळे यांनी उपस्थित केला आहे.

शेतकऱ्यांना दिवसा वीज द्या;
रात्रीचे लोडशेडिंग बंद करा

धुळे जिल्ह्यातील शेतकऱ्यांना दिवसा वीजपुरवठा करून रात्रीचे लोडशेडिंग बंद करण्याची मागणी शिवसेना ठाकरे गटाने केली आहे. कृषीपंपांसाठी रात्री वीज मिळत असल्याने शेतकऱ्यांना जीव धोक्यात घालून शेतात पाणी द्यावे लागत असल्याचे त्यांनी म्हटले. साक्री तालुक्यातील घोडदे येथील ४३ वर्षीय शेतकरी ज्ञानेश्वर सुरेश क्षीरसागर यांचा शेतात पाणी देताना सर्पदंश झाल्यानंतर उपचारादरम्यान मृत्यू झाला. या घटनेचा दाखला देत दिवसा वीज देण्याची मागणी करण्यात आली. कृषीपंपांच्या रोहित्रांची क्षमता वाढवावी, जुन्या वीजतारा बदलून पायाभूत सुविधा मजबूत कराव्यात, अशी मागणीही निवेदनातून करण्यात आली आहे.

विद्यार्थ्यांवर दबाव होता, असं जाणवतंय’;
रोहित पवारांचा दावा

एमपीएससी विद्यार्थ्यांच्या आंदोलनावरून आमदार रोहित पवार यांनी विद्यार्थ्यांवर दबाव टाकण्यात आल्याचा दावा केला आहे. विद्यार्थ्यांची भूमिका समजून घेण्यासाठी त्यांची प्रत्यक्ष भेट घेणे आवश्यक असल्याचे पवार यांनी सांगितले. पुण्यात जाऊन विद्यार्थ्यांशी चर्चा होईपर्यंत आंदोलन स्थगित ठेवणार असल्याचे त्यांनी स्पष्ट केले. मात्र, विद्यार्थ्यांनी पुन्हा आंदोलन करण्याचा निर्णय घेतल्यास आपण त्यांच्यासोबत सहभागी होणार असल्याचे पवार यांनी म्हटले आहे. विद्यार्थ्यांसोबत झालेल्या बैठकीदरम्यान त्यांच्याकडे दूरध्वनीही नव्हते, असा दावाही त्यांनी केला. तसेच मुख्यमंत्री देवेंद्र फडणवीस यांची भेट घेण्याची इच्छा व्यक्त करत, एमपीएससी विद्यार्थ्यांचे आंदोलन महत्त्वाचे असल्याचे पवार यांनी सांगितले.

मेळघाटातील आदिवासी ग्रामस्थांचे जिल्हा परिषदेसमोर ठिय्या
अधिकाऱ्यांचे आवश्यक कार्यवाही करण्याचे आश्वासन

मेळघाटातील शासकीय कार्यालयांमध्ये स्थानिक बोलीभाषा जाणणाऱ्या कर्मचाऱ्यांची नियुक्ती करावी, या मागणीसाठी आदिवासी ग्रामस्थांनी अमरावती जिल्हा परिषदेसमोर ठिय्या आंदोलन केले. स्थानिक भाषा न समजणाऱ्या कर्मचाऱ्यांमुळे शासकीय योजना, आरोग्य सेवा आणि विविध कामांसाठी संवाद साधताना अडचणी येत असल्याचे ग्रामस्थांनी सांगितले. आंदोलनाची दखल घेत मुख्य कार्यकारी अधिकारी तुषार गांधी यांनी ग्रामस्थांची भेट घेऊन समस्या जाणून घेतल्या. स्थानिक भाषिक प्रतिनिधींच्या नियुक्तीसह मागण्यांवर आवश्यक कार्यवाही करण्याचे आश्वासन त्यांनी दिले. आश्वासनानंतर ग्रामस्थांनी आंदोलन स्थगित केले.

MDR शुल्काविरोधात ‘नो यूपीआय डे’;
व्यापारी संघटनांचा विरोध

यूपीआय व्यवहारांवर १५ ऑक्टोबरपासून २ हजार रुपयांपेक्षा जास्त रकमेच्या निवडक व्यापारी व्यवहारांवर ०.४ टक्के एमडीआर लागू होणार आहे. या शुल्काला विरोध करत काही व्यापारी संघटनांनी २ ऑक्टोबरला ‘नो यूपीआय डे’ पाळण्याचे जाहीर केले आहे. व्यापाऱ्यांचा यूपीआयला विरोध नसून, व्यवहार स्वीकारण्यासाठी अतिरिक्त शुल्क आकारू नये, अशी त्यांची भूमिका आहे. निषेध म्हणून काही व्यापारी यूपीआय स्वीकारणार नसून काळे कपडे परिधान करण्याचे आवाहन करण्यात आले आहे. मात्र, सर्व व्यापारी संघटना या आंदोलनात सहभागी नाहीत. दोन प्रमुख संघटनांनी अर्थमंत्र्यांसोबत चर्चेनंतर आंदोलनातून माघार घेतली आहे. यूपीआय सेवा मात्र सुरूच राहणार आहे.

साखर व्यापाऱ्यांसाठी केंद्राचे नवे नियम;
साठा मर्यादा १,००० क्विंटलवर

सणासुदीच्या काळात साखरेचा सुरळीत पुरवठा राहावा आणि साठेबाजीला आळा बसावा, यासाठी केंद्र सरकारने व्यापाऱ्यांच्या साखर साठवणुकीच्या नियमांत बदल केला आहे. १ ऑक्टोबरपासून सुरू झालेल्या नव्या साखर हंगामाच्या पार्श्वभूमीवर व्यापाऱ्यांना साखर मिळाल्यापासून ती १५ दिवसांपेक्षा जास्त काळ साठवता येणार नाही. १५ ऑक्टोबर ते ३० नोव्हेंबर २०२६ या कालावधीत कमाल साठा मर्यादा १,००० क्विंटल असेल. कोलकाता, महानगर परिसर आणि आसामसाठी ही मर्यादा २,००० क्विंटल निश्चित करण्यात आली आहे. सरकारच्या उपाययोजनांमुळे साखरेच्या किरकोळ दरात १५ टक्क्यांची, तर एक्स-मिल दरात सुमारे २८ टक्क्यांची घट झाल्याचे सांगण्यात आले आहे.

कॅलिफोर्नियात बालविवाहावर बंदी;
२०२७ पासून १८ वर्षे किमान वय

अमेरिकेतील कॅलिफोर्निया राज्याने बालविवाहावर अधिकृतपणे बंदी घातली आहे. राज्यपाल गॅव्हिन न्यूसम यांनी संबंधित विधेयकावर स्वाक्षरी केली असून, १ जानेवारी २०२७ पासून विवाहासाठी किमान वय १८ वर्षे असेल. यापूर्वी पालकांची संमती आणि न्यायालयाची मंजुरी असल्यास अल्पवयीन व्यक्तीला विवाह करता येत होता. नव्या कायद्यामुळे ही तरतूद रद्द करण्यात आली आहे. कॅलिफोर्निया हे बालविवाहावर पूर्ण बंदी घालणारे अमेरिकेतील १८ वे राज्य ठरले आहे. मात्र, ३२ राज्यांमध्ये अजूनही काही परिस्थितींमध्ये अल्पवयीन विवाहाला कायदेशीर परवानगी आहे. नव्या कायद्याचे बालविवाहविरोधी कार्यकर्त्यांनी स्वागत केले आहे.

२०२७ वनडे विश्वचषकाचे वेळापत्रक जाहीर;
१० ऑक्टोबरला भारत-पाकिस्तान सामना

दक्षिण आफ्रिका, झिम्बाब्वे आणि नामिबिया यांच्या संयुक्त यजमानपदाखाली होणाऱ्या २०२७ वनडे विश्वचषकाचे वेळापत्रक जाहीर झाले आहे. भारताचा पहिला सामना ७ ऑक्टोबरला ऑस्ट्रेलियाविरुद्ध केपटाऊनमध्ये होणार आहे. त्यानंतर १० ऑक्टोबरला जोहान्सबर्ग येथे भारत-पाकिस्तान सामना रंगणार आहे. भारताचा अफगाणिस्तानविरुद्ध १४ ऑक्टोबरला, क्वालिफायरविरुद्ध १७ ऑक्टोबरला आणि झिम्बाब्वेविरुद्ध २४ ऑक्टोबरला सामना होईल. स्पर्धेतील अंतिम सामना २१ नोव्हेंबरला जोहान्सबर्ग येथे होणार आहे. मुख्य फेरीतील १२ संघ दोन गटांत विभागले जातील. दोन्ही गटांतील अव्वल तीन संघ आणि चौथ्या स्थानावरील सर्वोत्तम संघ ‘सुपर ७’मध्ये पोहोचतील.

‘मृत्यूचक्र’चा थरार २३ ऑक्टोबरला;
रहस्यमय ट्रेलर लाँच  Top 15 News : 

मानवी अस्तित्व, कर्म आणि मृत्यूभोवतीचे गूढ उलगडणारा ‘मृत्यूचक्र’ हा सस्पेन्स-थ्रिलर २३ ऑक्टोबरला महाराष्ट्रातील चित्रपटगृहांत प्रदर्शित होणार आहे. श्री महादेव फिल्म प्रॉडक्शन प्रस्तुत आणि अध्यांश मोशन पिक्चर निर्मित या चित्रपटाचा ट्रेलर नुकताच लाँच झाला. प्रणाली उन्मेश वाघमोडे निर्मात्या असून विलास वाघमोडे आणि अनुप्रिता कडू-गंगावणे यांनी दिग्दर्शन केले आहे. ट्रेलरमध्ये सिरीयल किलर, गूढ वास्तू, हॉस्पिटलमधील घटना आणि अनाकलनीय शक्तींचा संघर्ष पाहायला मिळतो. शशांक शेंडे, अक्षया गुरव, पुष्कराज चिरपुटकर, आस्ताद काळे यांच्यासह अनेक कलाकार चित्रपटात भूमिका साकारत आहेत. चित्रपटाची कथा डॉ. सुधीर निकम यांची आहे.