पुढच्या वर्षी एल निनोचा धोका;
जुलै २०२७ पर्यंत पाणी नियोजन

Top 15 News : महाराष्ट्रातील २६५ तालुक्यांमध्ये दुष्काळी परिस्थिती जाहीर झाल्यानंतर पुढील वर्षाच्या पावसाबाबतही चिंता वाढली आहे. एल निनोचा प्रभाव वाढल्यास २०२७ मधील पावसावर परिणाम होण्याची शक्यता आहे. त्यामुळे राज्य सरकारने जुलै २०२७ पर्यंत पिण्याच्या पाण्याचे नियोजन करण्याच्या सूचना दिल्या आहेत. उपलब्ध पाणीसाठा आणि भविष्यातील गरज लक्षात घेऊन प्रत्येक जिल्ह्याने आराखडा तयार करायचा आहे. मोठ्या धरणांतील पाणी पिण्यासाठी राखीव ठेवून उर्वरित पाणी उद्योग आणि रब्बी पिकांसाठी वापरण्याचा विचार आहे. मुख्यमंत्री देवेंद्र फडणवीस यांनी दुष्काळाच्या पार्श्वभूमीवर नागरिकांनीही खर्च कमी करून बचतीवर भर देण्याचे आवाहन केले.

मृत्यू दाखल्याबाबत मोठा बदल;
१ ऑक्टोबरपासून नवे नियम लागू

मृत्यू दाखला काढण्याच्या प्रक्रियेत १ ऑक्टोबरपासून महत्त्वाचे बदल होणार आहेत. जन्म आणि मृत्यू नोंदणी सुधारणा कायदा, २०२६ अंतर्गत उशिरा मृत्यू नोंदणीसाठी कडक नियम लागू केले जाणार आहेत. मृत्यूनंतर एक ते दोन वर्षांच्या आत नोंदणी केल्यास जिल्हा दंडाधिकारी, एसडीएम किंवा कार्यकारी दंडाधिकाऱ्यांचा लेखी आदेश आवश्यक असेल. दोन वर्षांनंतर नोंदणीसाठी प्रथम श्रेणी न्यायालयीन दंडाधिकाऱ्यांचा आदेश घ्यावा लागेल. मृत्यूची नोंदणी संबंधित महानगरपालिका, नगरपरिषद किंवा ग्रामपंचायतीत करता येते. यासाठी वैद्यकीय दाखला, मृत व्यक्तीचा पुरावा आणि अर्जदाराचे ओळखपत्र यांसह आवश्यक कागदपत्रे द्यावी लागतील.

सीजेपीला मोठा धक्का;
शिवाजी पार्कवरील आंदोलनाला पोलिसांचा नकार

अभिजीत दिपके यांच्या नेतृत्वाखालील कॉक्रोच जनता पक्षाला (सीजेपी) मोठा धक्का बसला आहे. निवडणूक आयोगाच्या विरोधात २ ऑक्टोबर रोजी मुंबईतील शिवाजी पार्कवर आंदोलन करण्यासाठी पक्षाने पोलिसांकडे परवानगी मागितली होती. मात्र, मुंबई पोलिसांनी ही परवानगी नाकारली आहे. शिवाजी पार्कऐवजी मुंबईतील अन्य मैदानासाठी परवानगी मागण्याची सूचना पोलिसांनी केली आहे. शिवाजी पार्क हे क्रीडांगण असल्याने तेथे राजकीय किंवा सामाजिक आंदोलनांना परवानगी देता येत नसल्याचा मुंबई उच्च न्यायालयाच्या आदेशाचा हवाला पोलिसांनी दिला. तसेच दादर परिसरातील वाहतूक कोंडी, ध्वनी प्रदूषण आणि नागरिकांच्या गैरसोयीची शक्यताही पोलिसांनी नमूद केली आहे.

राज्यात पुन्हा पावसाचा जोर;
अनेक जिल्ह्यांना यलो अलर्ट

गेल्या काही दिवसांपासून दडी मारलेल्या पावसाने राज्यात पुन्हा जोर धरला आहे. कोकण, मध्य महाराष्ट्र आणि मराठवाड्यात विजांच्या कडकडाटासह पावसासाठी पोषक वातावरण तयार झाले आहे. आज पश्चिम महाराष्ट्र आणि मराठवाड्यात काही ठिकाणी वादळी वाऱ्यांसह पावसाची शक्यता हवामान विभागाने वर्तवली आहे. पुणे आणि सातारा घाटमाथा, कोल्हापूर, सांगली, बीड आणि धाराशिवला यलो अलर्ट देण्यात आला आहे. या भागात विजांच्या कडकडाटासह पाऊस पडण्याची शक्यता आहे. दरम्यान, बंगालच्या उपसागरासह मध्य प्रदेश परिसरात कमी दाबाचे क्षेत्र सक्रिय असल्याने महाराष्ट्रातील पावसाचा जोर आणखी वाढण्याची शक्यता आहे.

पितृपक्ष सुरू होताच राजकीय पक्ष सावध;
मोठ्या घडामोडींना ब्रेक? Top 15 News :

पितृपक्ष सुरू होताच राज्यातील राजकीय पक्षांनी सावध भूमिका घेतल्याचे चित्र आहे. विशेषतः सत्ताधारी पक्षांकडून या काळात पक्षप्रवेश, मोठ्या सभा आणि महत्त्वाच्या राजकीय कार्यक्रमांना स्थगिती देण्याच्या सूचना पदाधिकाऱ्यांना देण्यात आल्याची माहिती सूत्रांनी दिली आहे. यंदा पितृपक्षाचा कालावधी २७ सप्टेंबर ते १० ऑक्टोबर असा आहे. धार्मिक आणि सांस्कृतिक परंपरांमुळे या काळात मोठे निर्णय आणि कार्यक्रम टाळण्याकडे पक्षांचा कल असल्याचे सांगितले जात आहे. त्यामुळे पितृपक्ष संपल्यानंतर राज्याच्या राजकारणात पुन्हा मोठ्या राजकीय हालचालींना वेग येण्याची शक्यता व्यक्त होत आहे.

दुष्काळग्रस्त शेतकऱ्यांना तत्काळ मदत द्या;
हर्षवर्धन जाधवांची मागणी

राज्यात दुष्काळाची गंभीर परिस्थिती असताना सरकार आणि विरोधक केवळ फोटोसेशन करत असल्याचा आरोप हर्षवर्धन जाधव यांनी केला. सरकारने दुष्काळाबाबत जाहीर केलेल्या जीआरनुसार संबंधित विभागांना अधिकृत लेखी आदेश दिले आहेत का, असा सवाल त्यांनी उपस्थित केला. जिल्हा नियोजन समितीच्या निधीतून शेतकऱ्यांना तत्काळ मदत देता येऊ शकते, असेही ते म्हणाले. छत्रपती संभाजीनगरच्या जिल्हाधिकाऱ्यांची भेट घेऊन मदतीची मागणी करणार असल्याचे त्यांनी सांगितले. शेतकरी आर्थिक संकटात असून आत्महत्यांच्या घटना घडत आहेत. त्यामुळे जिल्हाधिकाऱ्यांनी अधिकारांचा वापर करून आजच मदत देण्याची मागणी जाधव यांनी केली. सरकारने केवळ घोषणा न करता प्रत्यक्ष मदत पोहोचवावी, असेही त्यांनी म्हटले.

कोणत्याही तालुक्यावर अन्याय होऊ देणार नाही
अशोक चव्हाण यांचं आश्वासन

मराठवाड्यातील कोणत्याही तालुक्यावर अन्याय होऊ देणार नाही, असा शब्द मंत्री अशोक चव्हाण यांनी दिला. दुष्काळ जाहीर करण्याच्या ट्रिगर-१ निकषात मराठवाड्यातील दोन तालुके बसले नसले, तरी ऑक्टोबरमधील ट्रिगर-२ मध्ये जमिनीतील ओलावा आणि पिकांची परिस्थिती तपासली जाईल, असे त्यांनी सांगितले. त्यात हे तालुके निश्चितपणे समाविष्ट केले जातील, असा दावा चव्हाण यांनी केला. सध्या दुष्काळी परिस्थितीचे असेसमेंट सुरू असून जिल्हाधिकाऱ्यांचे अहवाल आल्यानंतर मदतीची व्याप्ती आणि निधी निश्चित केला जाईल. शेतकऱ्यांच्या अडचणी सरकारच्या लक्षात असून त्यांच्या पाठीशी सरकार असल्याचेही त्यांनी स्पष्ट केले.

आशियाई गेम्सची कांस्यपदकाची कामगिरी
सोनम मस्करचे कोल्हापुरात जल्लोषात स्वागत

आशियाई गेम्समध्ये कांस्यपदक पटकावणाऱ्या नेमबाज सोनम मस्करचे कोल्हापुरात जल्लोषात स्वागत करण्यात आले. कोल्हापूर जिल्हाधिकारी कार्यालयात पालकमंत्री प्रकाश आबिटकर यांच्या हस्ते सोनमचा सत्कार करण्यात आला. यावेळी क्रीडा क्षेत्रातील मान्यवर मोठ्या संख्येने उपस्थित होते. सोनमच्या उल्लेखनीय कामगिरीचा संपूर्ण कोल्हापूरला अभिमान असल्याचे पालकमंत्री आबिटकर यांनी सांगितले. तसेच गरजू खेळाडूंना शासनाकडून मदत मिळवताना येणाऱ्या अडचणी दूर करण्यासाठी प्रयत्न करणार असल्याची ग्वाही त्यांनी दिली. सोनमच्या यशामुळे कोल्हापूरच्या शिरपेचात आणखी एक मानाचा तुरा रोवला गेला आहे.

 पालीत अनेकांचा रिपाइंमध्ये प्रवेश
रामदास आठवले यांच्या उपस्थितीत पक्ष प्रवेश

केंद्रीय सामाजिक न्याय राज्यमंत्री आणि रिपब्लिकन पार्टी ऑफ इंडिया (आठवले)चे राष्ट्रीय अध्यक्ष डॉ. रामदास आठवले यांच्या उपस्थितीत पाली येथे अनेक तरुण आणि ज्येष्ठ कार्यकर्त्यांनी रिपाइंमध्ये प्रवेश केला. त्यांच्या मंत्रिपदाच्या १० वर्षांच्या कार्यकाळानिमित्त लिमये हॉलमध्ये सत्कार सोहळ्याचे आयोजन करण्यात आले होते. यानिमित्त पाली शहरातून ढोल-ताशांच्या गजरात भव्य मिरवणूक काढण्यात आली. आठवले यांनी छत्रपती शिवाजी महाराजांच्या पुतळ्यास पुष्पहार अर्पण करून डॉ. बाबासाहेब आंबेडकर स्मारकात अभिवादन केले. यावेळी त्यांनी रायगड जिल्ह्यातील पक्षाच्या संघटनात्मक कामाचे कौतुक केले. कार्यक्रमाला पक्षाचे पदाधिकारी, कार्यकर्ते तसेच विविध राजकीय आणि सामाजिक क्षेत्रातील मान्यवर उपस्थित होते.

बावनकुळेंकडून दुष्काळी भागाची पाहणी;
पंचनामे युद्धपातळीवर करण्याचे निर्देश Top 15 News : 

महसूल मंत्री चंद्रशेखर बावनकुळे यांनी यवतमाळच्या कळंब तालुक्यातील नरसापूर येथे दुष्काळग्रस्त शेतपिकांची पाहणी केली. यावेळी त्यांनी शेतकऱ्यांशी संवाद साधत पीक परिस्थिती, वीज आणि पाण्याच्या उपलब्धतेबाबत माहिती घेतली. पीक पाहणी आणि पंचनामे युद्धपातळीवर पूर्ण करण्याचे निर्देश त्यांनी प्रशासनाला दिले. राज्य सरकारने २६५ तालुक्यांमध्ये दुष्काळ जाहीर केला असून शेतकऱ्यांना म   दत करण्यात कोणतीही कमतरता पडणार नाही, असे बावनकुळे यांनी सांगितले. शेतकऱ्यांना जास्तीत जास्त मदत देण्याची सरकारची भूमिका असल्याचेही त्यांनी स्पष्ट केले. यावेळी आदिवासी विकास मंत्री अशोक उईके आणि खासदार संजय देशमुख उपस्थित होते.

बँक कर्मचाऱ्यांचा तीन दिवसांचा संप स्थगित
रात्रीच्या उशिरा झालेल्या बैठकीत निर्णय

देशभरातील बँक कर्मचाऱ्यांनी २८ ते ३० सप्टेंबरदरम्यान पुकारलेला तीन दिवसांचा संप स्थगित करण्यात आला आहे. संपाच्या आदल्या दिवशी आयबीए आणि युनायटेड फोरम ऑफ बँक युनियन्सची (यूएफबीयू) रात्री उशिरा बैठक झाली. या बैठकीत विविध मागण्यांवर चर्चा करून संप स्थगित करण्याचा निर्णय घेण्यात आला. पाच दिवसांचा कामाचा आठवडा, पेन्शनमधील सुधारणा, समान महागाई भत्ता आणि एनपीएस कर्मचाऱ्यांना जुन्या पेन्शन योजनेचा पर्याय या प्रमुख मागण्या आहेत. मात्र, चर्चेतून नेमका तोडगा निघाला की नाही, याबाबत अद्याप स्पष्ट माहिती समोर आलेली नाही.

भारतीय रेल्वेत नवा अध्याय;
देशातील पहिली LNG ट्रेन धावली

भारतीय रेल्वेच्या इतिहासात नवा अध्याय लिहिला गेला असून गुजरातमधून देशातील पहिली एलएनजीवर धावणारी ट्रेन सुरू झाली. केंद्रीय गृहमंत्री अमित शाह यांनी साबरमती रेल्वे स्थानकावरून या ट्रेनला हिरवा झेंडा दाखवला. एलएनजी आणि डिझेल अशा दोन्ही इंधनांवर हे इंजिन चालू शकते. एलएनजीमुळे डिझेलमध्ये सुमारे ४० टक्क्यांपर्यंत बचत होण्याचा दावा करण्यात आला आहे. ट्रेनमध्ये २,२०० लिटर क्षमतेची एलएनजी टाकी असून, पूर्ण भरल्यानंतर ती सुमारे ४४४ किलोमीटर धावू शकते. या तंत्रज्ञानामुळे प्रदूषण कमी होण्यास मदत होणार आहे. २०३० पर्यंत रेल्वेचा डिझेल वापर शून्यावर आणण्याचे उद्दिष्ट असल्याचे अमित शाह यांनी सांगितले.

अमेरिकेची मनुष्यविरहित पाणबुडी आमच्या ताब्यात
इराणचा मोठा दावा

इराणच्या इस्लामिक रिव्होल्युशनरी गार्ड कॉर्प्सच्या नौदलाने होर्मुझच्या सामुद्रधुनीत अमेरिकेची अत्याधुनिक मनुष्यविरहित पाणबुडी रेमस 600 ताब्यात घेतल्याचा दावा केला आहे. या कारवाईचा व्हिडिओही जारी करण्यात आला आहे. इराणच्या सरकारी माध्यमानुसार, गोपनीय माहिती, इलेक्ट्रॉनिक वॉरफेअर आणि तांत्रिक क्षमतेचा वापर करून ही कारवाई करण्यात आली. या पाणबुडीद्वारे होर्मुझच्या सामुद्रधुनीत गस्त आणि हेरगिरी केली जात असल्याचा दावा आयआरजीसीने केला आहे. पाणबुडीवर ताबा मिळवण्यासाठी समन्वयित आणि गुंतागुंतीची मोहीम राबवण्यात आल्याचेही इराणकडून सांगण्यात आले. मात्र, या दाव्याची स्वतंत्र पुष्टी अद्याप झालेली नाही.

कोहली-गिलचा धडाका;
वेस्ट इंडिजवर भारताचा ८ विकेट्सने विजय

भारताने वेस्ट इंडिजविरुद्धच्या पहिल्या वनडेत ८ विकेट्सने दणदणीत विजय मिळवत मालिकेत १-० अशी आघाडी घेतली. प्रथम फलंदाजी करताना वेस्ट इंडिजने २९५ धावा केल्या. जस्टिन ग्रीव्हजने १०१ धावांची शतकी खेळी केली. भारताकडून कुलदीप यादवने चार, तर प्रसिद्ध कृष्णाने दोन विकेट्स घेतल्या. लक्ष्याचा पाठलाग करताना शुभमन गिलने ११० धावांची शानदार खेळी केली. विराट कोहलीने १३९ धावांची नाबाद तुफानी खेळी करत वनडेतील ५५वे शतक झळकावले. गिल आणि कोहलीच्या शतकांच्या जोरावर भारताने लक्ष्य सहज पार केले.

बिग बॉस २० मध्ये मोठा धक्का;
ईशा रिखी घराबाहेर Top 15 News : 

‘बिग बॉस २०’च्या वीकेंड का वारमध्ये मोठा ट्विस्ट पाहायला मिळाला. सलमान खानने अभिनेत्री ईशा रिखी हिच्या एलिमिनेशनची घोषणा केली. कमी मते मिळाल्याने ईशाचा बिग बॉसच्या घरातील तीन आठवड्यांचा प्रवास संपला. तिच्यासोबत यंग डीएसए देखील एलिमिनेशनसाठी नॉमिनेट झाला होता. मात्र, यंगला प्रेक्षकांची अधिक मते मिळाल्याने ईशाला घराबाहेर पडावे लागले. याआधी मागील आठवड्यात रोहेद खान एलिमिनेट झाला होता. दरम्यान, काझीसोबत झालेल्या वादावरून सलमान खानने रीति तिवारीलाही तिच्या भाषेबद्दल सुनावले. त्यामुळे वीकेंड का वारमध्ये ड्रामासोबतच एलिमिनेशननेही प्रेक्षकांचे लक्ष वेधले.