दुष्काळी भागांसाठी सरकारचा मोठा निर्णय;
शेतकऱ्यांसाठी कर्जवसुलीवरही विचार

Top 15 News :  महाराष्ट्रातील दुष्काळी परिस्थितीच्या पार्श्वभूमीवर सरकारने ३०५ तालुक्यांत ट्रिगर-वन उपाययोजना लागू केल्या आहेत. दुष्काळी भागात शहरी क्षेत्रात १० टक्के पाणी कपात करण्याचा निर्णय घेण्यात आला असून, पिण्याचे पाणी आणि जनावरांच्या चाऱ्याला प्राधान्य दिले जाणार आहे. गावतलाव व पाझर तलाव पिण्याच्या पाण्यासाठी राखीव ठेवले जाणार आहेत. महसूलमंत्री चंद्रशेखर बावनकुळे यांनी दुष्काळात शेतकऱ्यांच्या दारी कर्जवसुलीसाठी कर्मचारी पाठवू नयेत, अशा सूचना दिल्या. कर्जवसुली थांबवण्याबाबत आरबीआयकडे विचारणा करण्याचे निर्देशही देण्यात आले. रोजगारासाठी ६,७२८ कोटींचा निधी उपलब्ध करण्यात आला आहे.

संजय राऊतांच्या अडचणी वाढणार?
न्यायव्यवस्थेवरील वक्तव्यांप्रकरणी अवमान याचिका

शिवसेना ठाकरे गटाचे खासदार संजय राऊत यांच्याविरोधात न्यायव्यवस्थेवर कथित आक्षेपार्ह टिप्पणी केल्याप्रकरणी मुंबई उच्च न्यायालयाच्या औरंगाबाद खंडपीठात फौजदारी अवमान याचिका दाखल करण्यात आली आहे. याचिकेवर सुनावणी करताना न्यायमूर्ती संदीपकुमार मोरे आणि न्यायमूर्ती वैशाली पाटील-जाधव यांच्या खंडपीठाने प्रतिवादींना नोटीस बजावण्याचे आदेश दिले. अमित श्रीकांत देशपांडे यांनी अॅड. शैलेंद्र गंगाखेडकर यांच्यामार्फत याचिका दाखल केली आहे. राऊत यांनी न्यायव्यवस्थेवर केलेल्या कथित अवमानकारक वक्तव्यांचा याचिकेत उल्लेख करण्यात आला आहे. प्रकरणाची पुढील सुनावणी २२ ऑक्टोबरला होणार आहे.

दुष्काळग्रस्त तालुक्यांतील १०,१२वी विद्यार्थ्यांची परीक्षा फी माफ;
बोर्डाचा मोठा निर्णय

महाराष्ट्रातील दुष्काळग्रस्त २६५ तालुक्यांतील दहावी आणि बारावीच्या विद्यार्थ्यांना मोठा दिलासा मिळाला आहे. फेब्रुवारी-मार्च २०२७ मध्ये होणाऱ्या परीक्षांसाठी या विद्यार्थ्यांकडून परीक्षा शुल्क न घेता ऑनलाइन अर्ज भरून घेण्याच्या सूचना महाराष्ट्र राज्य माध्यमिक व उच्च माध्यमिक शिक्षण मंडळाने दिल्या आहेत. शासनाच्या २५ सप्टेंबर २०२६च्या निर्णयानुसार ही सवलत लागू करण्यात आली आहे. पुढील आदेश येईपर्यंत परीक्षा शुल्क न घेण्याची कार्यवाही करण्याचे निर्देश देण्यात आले आहेत. संबंधित शाळा आणि कनिष्ठ महाविद्यालयांना तातडीने सूचना देऊन कार्यवाहीचा अहवाल मंडळाला सादर करण्याचेही सांगण्यात आले आहे.

दुष्काळानंतर रब्बीवरही संकट;
एल निनोमुळे पिकांना पाण्याचा ताण वाढण्याची शक्यता

राज्यात दुष्काळी परिस्थिती असताना आता रब्बी हंगामावरही संकटाचे सावट आहे. एल निनोच्या प्रभावामुळे विशेषतः कोरडवाहू भागातील पिकांवर परिणाम होण्याची शक्यता केंद्र सरकारने व्यक्त केली आहे. रब्बी हंगामाच्या तयारीसाठी झालेल्या राष्ट्रीय परिषदेत हवामान बदलामुळे पीक पद्धतीत बदल करण्यावर भर देण्यात आला. कमी पावसाच्या भागात पिकांना दीर्घकाळ पाण्याच्या ताणाला सामोरे जावे लागू शकते. देशात रब्बी पिकांसाठी सुमारे ६३८ लाख हेक्टर क्षेत्र प्रस्तावित आहे. यामध्ये गहू ३००, कडधान्ये १४०, तेलबिया ८७ आणि भरडधान्यांसाठी ५५ लाख हेक्टर क्षेत्राचा समावेश आहे.

SIR प्रक्रियेत मोठा बदल;
WhatsApp-ई-मेलवरील कागदपत्रे ग्राह्य धरण्याचे आदेश Top 15 News : 

SIR नोंदणी प्रक्रियेत नागरिकांना दिलासा देत मुख्य निवडणूक अधिकारी एस. चोक्कलिंगम यांनी WhatsApp आणि ई-मेलवरून पाठवलेली कागदपत्रे ग्राह्य धरण्याचे आदेश दिले आहेत. नागरिकांना सुनावणीसाठी बोलावण्याची किंवा घरी जाण्याची गरज नसल्याचेही त्यांनी स्पष्ट केले. ERO आणि AERO यांच्या ऑनलाइन बैठकीत राज्यातील 288 ERO आणि 7 हजारांहून अधिक AERO सहभागी झाले. ज्येष्ठ नागरिक व दिव्यांगांना प्रत्यक्ष सुनावणीतून सूट, वंचित घटकांसाठी अतिरिक्त कागदपत्रे, EROना स्थानिक निर्णयाचे अधिकार आणि स्पष्ट लेखी मार्गदर्शक सूचना देण्याची मागणीही चोक्कलिंगम यांनी निवडणूक आयोगाकडे केली आहे.

दुष्काळाशी लढण्यासाठी सरकारचे नियोजन;
८ दिवसांत जिल्हानिहाय बैठका – भरत गोगावले

महाराष्ट्रातील दुष्काळजन्य परिस्थितीवर मात करण्यासाठी सरकारकडून नियोजन सुरू असल्याची माहिती मंत्री भरत गोगावले यांनी दिली. २६५ तालुक्यांत दुष्काळ जाहीर झाला असून शेतकरी अडचणीत असल्याचे त्यांनी सांगितले. केंद्र आणि राज्याच्या माध्यमातून ६०:४० प्रमाणात शेतकऱ्यांना सक्षम करण्याचा प्रयत्न केला जाणार आहे. रोजगारनिर्मितीसाठी गाळ काढणे, विहिरींची दुरुस्ती, शाळा, इमारती आणि स्मशानभूमींची कामे हाती घेतली जातील. केंद्राकडून ४ हजार ४०० कोटी, तर राज्याकडून ३ हजार ३०० कोटी रुपये उपलब्ध झाले आहेत. पुढील आठ दिवसांत जिल्हानिहाय बैठका घेऊन अडचणींचा आढावा घेतला जाणार असल्याचे गोगावले यांनी सांगितले.

अघोरी पूजेच्या नावाखाली मजुराची दीडलाखांची फसवणूक;
तरुणीच्या साखरपुड्याचाही आरोप

धुळ्यातील एका मजूर कुटुंबाची आजारपण आणि कौटुंबिक अडचणी दूर करण्याचे आमिष दाखवून अघोरी पूजा व जादूटोण्याच्या नावाखाली 1 लाख 51 हजार रुपयांची फसवणूक झाल्याचा आरोप आहे. नाशिकच्या केवडीबन येथे पीडित महिलेला अघोरी स्नान घालून डोळ्यात लिंबाचा रस पिळल्याचे तिने सांगितले. तसेच जादूटोण्याची भीती दाखवून 21 वर्षीय तरुणीचा मांत्रिक महिलेच्या मुलासोबत जबरदस्तीने साखरपुडा केल्याचाही आरोप आहे. तक्रारीनंतर धुळे शहर पोलिसांनी मांत्रिक महिला सरिता जाधव आणि तिच्या साथीदारांना ताब्यात घेतले. 27 सप्टेंबरला अघोरी प्रथा व जादूटोणाविरोधी कायद्यानुसार गुन्हा दाखल करण्यात आला असून, पोलिसांकडून पुढील तपास सुरू आहे.

दुष्काळग्रस्तांसाठी तुळजाभवानी मंदिर संस्थान मदतीला;
मुख्यमंत्री सहाय्यता निधीला देणार हातभार

धाराशिव जिल्ह्यातील दुष्काळाच्या पार्श्वभूमीवर शेतकरी आणि पशुधनाला दिलासा देण्यासाठी तुळजाभवानी मंदिर संस्थान मदतीचा हात पुढे करणार आहे. मुख्यमंत्री सहाय्यता निधीसाठी आर्थिक मदत देण्याबाबत लवकरच निर्णय घेतला जाणार आहे. मंदिर संस्थानच्या सर्व विश्वस्तांशी चर्चा करून मदतीची रक्कम आणि स्वरूप निश्चित करण्यात येणार असल्याची माहिती जिल्हाधिकारी तथा मंदिर संस्थानचे अध्यक्ष कीर्ती किरण पुजार यांनी दिली. यापूर्वी पूरस्थितीच्या काळातही संस्थानकडून मदत करण्यात आली होती. आता दुष्काळग्रस्तांसाठी मदत करण्याची तयारी सुरू झाल्याने अंतिम निर्णयाकडे लक्ष लागले आहे.

 आदिवासी विद्यार्थ्यांच्या मागण्यांवर सरकारसोबत चर्चा;
लेखी आश्वासनानंतर आंदोलनाची दिशा ठरणार

आदिवासी विद्यार्थ्यांच्या विविध मागण्यांवर मुख्यमंत्री आणि सरकारसोबत चर्चा झाल्याची माहिती प्रशांत गावंडे यांनी दिली. चर्चेतील मुद्दे विद्यार्थ्यांसमोर मांडल्यानंतर आंदोलनाबाबत निर्णय घेतला जाणार असल्याचे त्यांनी सांगितले. आदिवासी कल्याण मंत्र्यांनी राजीनामा द्यावा, आदिवासी शाळांमध्ये सर्पदंशामुळे झालेल्या विद्यार्थ्यांच्या मृत्यूच्या प्रकरणात गुन्हा दाखल करावा आणि विद्यार्थ्यांची होणारी कथित लूट थांबवावी, अशा मागण्या करण्यात आल्या आहेत. सरकारकडून मागण्यांबाबत लेखी पत्र मिळाल्यानंतर विद्यार्थ्यांशी चर्चा करून आंदोलनाची पुढील दिशा ठरवणार असल्याचे गावंडे यांनी स्पष्ट केले.

 जन्मानंतर महिनाभरातच बाळाची विक्री;
आई-वडिलांसह ७ जणांना अटक  Top 15 News : 

छत्रपती संभाजीनगरमध्ये जन्मानंतर अवघ्या महिनाभरात बाळाची पैशांसाठी विक्री केल्याचा धक्कादायक प्रकार समोर आला आहे. मुकुंदवाडी पोलिसांच्या तपासात आई-वडिलांसह सात जणांना अटक करण्यात आली आहे. पोलिसांच्या माहितीनुसार, ५ जुलैला घाटी रुग्णालयात मुलाचा जन्म झाला. त्यानंतर आई-वडिलांनी १ लाख २० हजार रुपयांना बाळ एका महिलेकडे दिल्याचा आरोप आहे. पुढे वेगवेगळ्या व्यक्तींमध्ये पैशांच्या व्यवहारातून बाळाची विक्री होत गेली आणि व्यवहार ३ लाख ५० हजार रुपयांपर्यंत पोहोचला. २७ सप्टेंबरला बाळाला पोलिसांच्या ताब्यात देण्यात आले. बालकल्याण समितीच्या आदेशाने बाळाला ‘साकार’ संस्थेकडे सोपवण्यात आले असून, तपास सुरू आहे.

‘राम श्रीमंतांचे, महादेव गरिबांचे’;
रेवंत रेड्डींच्या वक्तव्याने वाद

तेलंगणाचे मुख्यमंत्री रेवंत रेड्डी यांच्या भगवान राम आणि महादेव यांच्याबाबतच्या वक्तव्यावरून राजकीय वाद निर्माण झाला आहे. एका मुलाखतीत बोलताना राम हे श्रीमंतांचे, तर महादेव गरिबांचे देव असल्याचे रेड्डी यांनी म्हटले. तसेच दक्षिण भारतातील लोक द्रविड आणि उत्तर भारतातील लोक आर्य असल्याचा संदर्भही त्यांनी दिला. भाजप नेत्यांनी या वक्तव्यावर आक्षेप घेत रेड्डी यांच्यावर टीका केली. शहानवाज हुसेन यांनी रेड्डी लोकांमध्ये संभ्रम निर्माण करण्याचा प्रयत्न करत असल्याचा आरोप केला. केंद्रीय मंत्री बंदी संजय कुमार यांनी राम आणि महादेव यांच्यात राजकीय फूट पाडण्याचा प्रयत्न केल्याचा आरोप केला. त्यामुळे या वक्तव्यावरून नव्या राजकीय वादाला तोंड फुटले आहे.

ई-चलन थकवणाऱ्यांना दणका!
सुप्रीम कोर्टाने सुचवले १० कठोर पर्याय

देशभरात सुमारे ४५ हजार कोटी रुपयांची ई-चलाने जारी झाली असून, त्यापैकी २० हजार कोटींची रक्कम अद्याप थकीत असल्याची माहिती सर्वोच्च न्यायालयात देण्यात आली. ई-चलानची वसुली करण्यासाठी न्यायालयाने केंद्र आणि राज्य सरकारांना विविध पर्याय सुचवले. यामध्ये थकीत चलन असलेल्या वाहनांचे आरसी नूतनीकरण, मालकी हस्तांतरण, फिटनेस प्रमाणपत्र आणि पीयूसी रोखणे, वाहनांना परिवहन पोर्टलवर ब्लॅकलिस्ट करणे, नवीन ड्रायव्हिंग लायसन्स न देणे तसेच विद्यमान परवाना निलंबित करण्याचा विचार करण्याचा समावेश आहे. थकीत चलन असलेली वाहने तपासणीदरम्यान जप्त करण्याचाही पर्याय सुचवण्यात आला आहे.

चीनला अमेरिकेची शस्त्रं विकणार?
ट्रम्प यांनी राजदूताचा दावा फेटाळला

चीनचे अध्यक्ष शी जिनपिंग यांच्या अमेरिका दौऱ्यानंतर चीनमधील अमेरिकेचे राजदूत डेव्हिड परड्यू यांच्या एका दाव्यावरून चर्चा सुरू झाली. ट्रम्प यांनी चीनला अमेरिकन शस्त्रास्त्रे विकण्याची तयारी दर्शवल्याचे परड्यू यांनी म्हटले होते. मात्र, ट्रम्प यांनी असा कोणताही संवाद झाल्याचे आपल्याला माहिती नसल्याचे स्पष्ट केले. “कदाचित ते तैवानबद्दल बोलत असावेत,” असे त्यांनी सांगितले. मात्र, अमेरिकन शस्त्रे दर्जेदार असल्याने चीनने ती खरेदी करण्याची इच्छा व्यक्त केली तर ही वाईट कल्पना नसल्याचेही ट्रम्प म्हणाले. दरम्यान, जिनपिंग यांनी अमेरिका-चीनमध्ये निरोगी स्पर्धेचे आवाहन केले.

दीपक चाहरच्या ३ महागड्या बॅट चोरीला;
क्रिकेटपटूने चोराला केली भावनिक विनंती

भारतीय क्रिकेटपटू दीपक चाहरच्या सरावादरम्यान तीन महागड्या बॅट चोरीला गेल्याचा प्रकार समोर आला आहे. चाहरने सोशल मीडियावर व्हिडीओ शेअर करत या घटनेची माहिती दिली. त्याच्या तिन्ही बॅटची किंमत जवळपास दीड लाख रुपये असल्याचे त्याने सांगितले. बॅट चोरी करणाऱ्याला त्यांची खरी किंमत माहीत नसावी, असेही चाहर म्हणाला. चोरी केलेल्या बॅट परत आणून दिल्यास पैसे देण्याची तयारी असल्याचे त्याने सांगितले. या घटनेचा व्हिडीओ सध्या सोशल मीडियावर व्हायरल होत आहे. दीपक चाहर २०२६च्या आयपीएलमध्ये मुंबई इंडियन्सकडून खेळला होता. भारतीय संघाकडून त्याने अखेरचा सामना डिसेंबर २०२२ मध्ये खेळला होता.

जुबिन नौटियाल झाला बाबा;
लग्नाच्या ५ महिन्यानंतरच चिमुकल्या पाहुण्याचे आगमन Top 15 News : 

बॉलिवूडचा प्रसिद्ध गायक जुबिन नौटियाल बाबा झाला आहे. गणेश चतुर्थीच्या दिवशी, १४ सप्टेंबरला त्याच्या पहिल्या मुलाचा जन्म झाला. ही आनंदाची बातमी जुबिनने स्वतः ही माहिती दिली. आई आणि बाळ दोघेही सुखरूप असून घरी परतल्याचे त्याने सांगितले. मुलाचे नाव अद्याप ठरवले नसल्याचेही जुबिनने स्पष्ट केले. एप्रिल २०२६ मध्ये जुबिनने गुपचूप लग्न केले होते. आता काही महिन्यांतच त्याच्या आयुष्यात नव्या पर्वाची सुरुवात झाली आहे. ‘रातां लंबियां’, ‘तुझे कितना चाहें और’, ‘काबिल हूँ’ आणि ‘लो सफर’ यांसारख्या गाण्यांसाठी जुबिन लोकप्रिय आहे. बाबा झाल्याची बातमी समोर येताच चाहत्यांनी आणि कलाकारांनी त्याच्यावर शुभेच्छांचा वर्षाव केला.