TOP १५ News: राज्यातील तीन वरिष्ठ IAS अधिकाऱ्यांची बदली ते ट्रम्प यांच्याकडून पुन्हा मोदींचे कौतुक; जाणून घ्या Top 15 News
TOP 15 News : राज्य, देश-विदेश, क्रीडा आणि मनोरंजन क्षेत्रातील राजकीय घडामोडी...

TOP 15 News: १. राज्यातील तीन वरिष्ठ IAS अधिकाऱ्यांच्या बदलीचे आदेश
महाराष्ट्र शासनाच्या प्रशासकीय यंत्रणेत महत्त्वाचे फेरबदल करण्यात आले आहेत. राज्य शासनाने तीन वरिष्ठ IAS अधिकाऱ्यांच्या बदलीचे आदेश जारी केले आहेत. सामान्य प्रशासन विभागात प्रशासकीय नावीन्य, उत्कृष्टता आणि सुशासन विभागाचे प्रधान सचिव म्हणून कार्यरत असलेल्या अतुल पाटणे यांची बदली करण्यात आली आहे.
त्यांची आता वस्त्रोद्योग विभागाचे प्रधान सचिव मंत्रालय, मुंबई या पदावर नियुक्ती करण्यात आली आहे. तर सहकार, पणन व वस्त्रोद्योग विभागात सचिव म्हणून कार्यरत असलेल्या शैला ए. यांची बदली करण्यात आली असून, त्यांना आता महिला व बालविकास विभागाच्या सचिव मंत्रालय, मुंबई या पदाची जबाबदारी देण्यात आली आहे. याशिवाय स्वाती योगेश म्हसे-पाटील यांची आता सामान्य प्रशासन विभागात सचिव मंत्रालय, मुंबई या पदावर नियुक्ती करण्यात आली आहे.
२. “…मग खरा मोठा थापाडा कोण?” उद्धव ठाकरेंनी टीका करताच शिंदेंचे प्रत्युत्तर
केंद्रीय गृहमंत्री अमित शाह यांच्यावर उद्धव ठाकरे यांनी टीका करताच यास उपमुख्यमंत्री एकनाथ शिंदे यांनी प्रत्युत्तर दिले आहे. एकनाथ शिंदे म्हणाले, “ज्यांनी २०१९ मध्ये महाराष्ट्राच्या १४ कोटी जनतेशी खोटं बोलले, त्यांच्या पाठीत खंजीर खुपसला. मुख्यमंत्रिपदासाठी खोटे बोलले. भाजपाच्या पाठीत देखील खंजीर खुपसला. मग खरा मोठा थापाडा कोण आहे?”, असा सवाल शिंदेंनी केला.
तसेच “पंतप्रधान मोदी आणि अमित शाह यांच्यावर टीका केली की मोठं होता येतं. मुघलांच्या घोड्यांना देखील संताजी-धनाजी दिसत होते. तसा यांना देखील मोदी फोबिया झाला आहे. तुम्ही दाखवता म्हणून ते बोलत आहेत. शेतकऱ्यांच्या बांधावर जा. दुष्काळामुळे शेतकरी संकटात आहे, राजकारण करायला खूप जागा आहे. महाराष्ट्रातील जनतेला त्यांचा खोटारडेपणा आणि थापाडेपणा कळला आहे”, अशी टीका शिंदे यांनी ठाकरेंवर केली.
३. आमदार महेंद्र दळवी यांच्या आरोपांना ऍड. संतोष बैलमारे यांचे प्रत्युत्तर
शिवसेना शिंदे गटाचे अलिबाग मतदारसंघाचे आमदार महेंद्र दळवी हे राष्ट्रवादी काँग्रेस अजित पवार गटाचे प्रदेशाध्यक्ष सुनील तटकरे यांच्यावर वारंवार आरोप करत आहेत. या आरोपांना आता रायगड जिल्हा परिषदेचे सदस्य तथा गटनेते ऍड. संतोष बैलमारे यांनी प्रत्युत्तर दिले आहे. यासंदर्भात त्यांनी पत्रकार परिषद घेत आमदार महेंद्र दळवी यांच्या आरोपांवर आपली भूमिका मांडली. यावेळी त्यांनी महेंद्र दळवी यांच्यावर निशाणा साधला.
४. भिवंडीत गादीच्या कारखान्याला भीषण आग; लाखो रुपयांचे नुकसान
भिवंडी शहरातील इदगाह रोड येथील फकी कंपाउंड परिसरात गादीच्या कारखान्याला भीषण आग लागल्याची घटना घडली आहे. या कारखान्यात मोठ्या प्रमाणात कापूस आणि गाद्यांचा साठा असल्याने आगीने काही वेळातच संपूर्ण कारखान्याला आपल्या कवेत घेतले. घटनेची माहिती मिळताच भिवंडी अग्निशमन दलाच्या दोन अग्निशमन गाड्या घटनास्थळी दाखल झाल्या असून आग नियंत्रणात आणण्याचे प्रयत्न सुरू आहेत. आगीचे नेमके कारण अद्याप स्पष्ट झालेले नाही. मात्र, शॉर्टसर्किटमुळे आग लागल्याचा प्राथमिक अंदाज व्यक्त केला जात आहे. या आगीत कारखान्याचे लाखो रुपयांचे नुकसान झाले असून सुदैवाने कोणतीही जीवितहानी झालेली नाही.
५. अकोल्यात रुग्णाला चक्क एक्सपायर झालेलं सलाईन लावल्याचा आरोप
अकोल्याच्या शासकीय रुग्णालयात ब्रेन स्ट्रोकच्या उपचारासाठी दाखल असलेल्या 55 वर्षीय रुग्णाला वर्षभरापूर्वीच एक्सपायर झालेलं सलाईन लावल्याचा आरोप नातेवाईकांनी केला आहे. रुग्णाला एक्सपायर झालेलं सलाईन लावण्याचा हा प्रकार गंभीर असल्याचं सांगत नातेवाईकांनी संताप व्यक्त केला आहे. या प्रकरणाची सखोल चौकशी करून संबंधितांवर कठोर कारवाई करावी, अशी मागणी करत रुग्णाचे नातेवाईक डीन यांना निवेदन देणार आहेत. दरम्यान, रुग्णालयात उपचारासाठी येणाऱ्या रुग्णांचा जीव डॉक्टर आणि आरोग्य यंत्रणेच्या भरवशावर असतो. मात्र, अकोल्याच्या शासकीय वैद्यकीय महाविद्यालय आणि रुग्णालयात समोर आलेल्या या प्रकारामुळं रुग्णांच्या सुरक्षिततेचा प्रश्न ऐरणीवर आला आहे.
६. रायगडच्या हापूस आंब्याची वाशी मार्केटमध्ये दमदार एन्ट्री; ९ पेट्या विक्रीसाठी रवाना
रत्नागिरी आणि सिंधुदुर्गच्या हापूस आंब्याप्रमाणेच आता रायगडचा हापूस आंबाही मोठ्या बाजारपेठेत आपली ओळख निर्माण करण्याच्या दिशेने वाटचाल करत आहे. रायगडमधील आंबा उत्पादक डॉ. संदेश पाटील यांच्या बागेतील हापूस आंब्याच्या ९ पेट्या आज १७ नोव्हेंबर रोजी वाशी येथील आंबा मार्केटमध्ये विक्रीसाठी रवाना करण्यात आल्या. प्रत्येक पेटीत दोन डझन आंब्यांचा समावेश आहे. रायगडच्या हापूसची गुणवत्ता आणि चव कोणत्याही बाबतीत रत्नागिरी आणि सिंधुदुर्गच्या हापूसपेक्षा कमी नाही, असा विश्वास डॉ. संदेश पाटील यांनी व्यक्त केला. आधुनिक पद्धतींचा अवलंब आणि गुणवत्तेवर भर दिल्यास रायगडचा हापूस राज्यासह देशभरात स्वतःची वेगळी ओळख निर्माण करेल, अशी अपेक्षा त्यांनी व्यक्त केली आहे.
७. महाराष्ट्र-कर्नाटक सीमाप्रश्न: नेत्यांच्या कोरड्या सहानुभूतीविरोधात ‘चलो कोल्हापूर’
20 नोव्हेंबरला ऐतिहासिक दसरा चौकात एल्गार
गेल्या सात दशकापासून प्रलंबित असणारा महाराष्ट्र – कर्नाटक सीमा प्रश्न पुन्हा एकदा ऐरणीवर आला आहे..सीमा लढ्यात मराठी भाषिकांच्या तीन पिढ्या गेल्या असून कर्नाटक सरकारची सीमा भागातील नागरिकांवर दडपशाही सुरूचं आहे.. त्यामुळे पुन्हा एकदा महाराष्ट्र एकीकरण समिती आक्रमक झाली आहे. सीमा प्रश्न सर्वोच्च न्यायालयात असून कर्नाटक सरकार आणि तेथील नेते आक्रमक भूमिका घेतात. मात्र महाराष्ट्रातील नेते आणि सरकार आक्रमक भूमिका घेत नाही. या प्रश्नी महाराष्ट्रातील नेते फक्त कोरडे सहानुभूती दाखवत असल्याचं महाराष्ट्र एकीकरण समितीच्या पदाधिकाऱ्यांनी म्हटलंय. त्यामुळे सीमा प्रश्नांसाठी महाराष्ट्र आणि केंद्र सरकारला जाग आणण्यासाठी कोल्हापुरातील ऐतिहासिक दसरा चौकात 20 नोव्हेंबर ला आंदोलन पुकारले आहे.
८. हवामानात पुन्हा बदल! १० राज्यांना मुसळधार पावसाचा इशारा
हवामानात पुन्हा एकदा मोठा बदल होण्याची शक्यता आहे. एकीकडे राज्यात थंडीची चाहुल लागली असून दुसरीकडे देशातील १० राज्यांना भारतीय हवामान विभागाने १८ नोव्हेंबर रोजी मुसळधार पावसाचा इशारा दिला आहे. हवामान विभागाच्या अंदाजानुसार, आंध्र प्रदेश, कर्नाटक, छत्तीसगड, तमिळनाडू, ओडिशा, झारखंड, पश्चिम बंगाल, तेलंगणा, बिहार आणि अंदमान-निकोबार या दहा राज्यांमध्ये पावसाचा जोर वाढू शकतो. या राज्यांमधील काही ठिकाणी मुसळधार पाऊस आणि वादळी वाऱ्यांचा सामना करावा लागू शकतो. तर पश्चिम महाराष्ट्रात थंडीचा प्रभाव वाढू लागला आहे. दिवसा उन्हाचा चटका, तर रात्री आणि पहाटे थंड वारे वाहत असल्याने नागरिकांना बदलत्या वातावरणाचा सामना करावा लागत आहे.
९. सोलापूर जिल्हा मध्यवर्ती बँकेच्या निवडणुकीत १९ पैकी १० जागा बिनविरोध
भाजप पुरस्कृत सहकार विकास पॅनलची आघाडी
सोलापूर जिल्हा मध्यवर्ती सहकारी बँकेच्या निवडणुकीत भाजप पुरस्कृत ‘सहकार विकास पॅनल’ने सुरुवातीलाच मोठी आघाडी घेतली आहे. संचालक पदाच्या १९ पैकी १० जागा बिनविरोध निवडून आल्या आहेत. उर्वरित जागांसाठी निवडणूक लढवली जाणार असून, मोहिते-पाटील कुटुंबीयांनी अवास्तव जागांची मागणी केल्यामुळेच ही निवडणूक बिनविरोध होऊ शकली नाही, असा दावा माजी आमदार प्रशांत परिचारक आणि माजी आमदार राजन पाटील यांनी केला आहे. तसेच सर्व नेत्यांच्या समन्वयातून जशी उमेदवारांची नावे निश्चित करण्यात आली, त्याच पद्धतीने आगामी काळात बँकेचा चेअरमनही निश्चित केला जाईल, असेही परिचारक यांनी स्पष्ट केले.
१०. गोकुळ गाजवणाऱ्या बंटी पाटलांवर काँग्रेसने सोपवली मोठी जबाबदारी
गोकुळ गाजवणाऱ्या काँग्रेस नेते सतेज उर्फ बंटी पाटलांना आता पक्षाने आगामी गोवा विधानसभा निवडणुकांसाठी मोठी जबाबदारी दिली आहे. आगामी गोवा विधानसभा निवडणुकीच्या पार्श्वभूमीवर अखिल भारतीय काँग्रेस कमिटीने (AICC) स्थापन केलेल्या स्क्रीनिंग कमिटीमध्ये सतेज पाटील यांना स्थान देण्यात आले आहे. काँग्रेसचे राष्ट्रीय अध्यक्ष मल्लिकार्जुन खरगे यांच्या निर्देशाने पक्षाचे सरचिटणीस के. सी. वेणुगोपाल यांनी 16 नोव्हेंबर रोजी यासंदर्भात अधिकृत प्रसिद्धीपत्रक जारी केले. गोवा विधानसभा निवडणुकीसाठी स्थापन करण्यात आलेल्या या स्क्रीनिंग कमिटीच्या अध्यक्षपदी के. जे. जॉर्ज यांची नियुक्ती करण्यात आली असून, सतेज पाटील आणि खासदार शफी प रंबिल यांना सदस्य म्हणून स्थान देण्यात आलं आहे.
११. उत्तर प्रदेशात मतदार यादीत बदल; किती मतदार वाढले?
येत्या २०२७ मध्ये उत्तर प्रदेशसह पाच राज्यात विधानसभा निवडणुका होणार आहेत. या निवडणुकीपूर्वी उत्तर प्रदेशमध्ये नवीन मतदारयादी तयार झाली असून, याची सगळी आकडेवारी समोर आली आहे. उत्तर प्रदेश निवडणूक आयोगाने SSR अंतर्गत मतदार यादीचा मसुदा प्रसिद्ध केला आहे. या नवीन मतदार यादीमुळे राज्यात अंदाजे १९ लाख मतदारांची भर पडली आहे. एकूण मतदार संख्या १३.३९ कोटींवरून १३.५८ कोटींवर पोहोचली आहे. उत्तर प्रदेशचे मुख्य निवडणूक अधिकारी नवदीप रिनवा यांनी एका पत्रकार परिषदेत यासंदर्भात घोषणा केली. १८ ते १९ वर्षाच्या मतदारांच्या संख्येत वाढ होण्याऐवजी मोठी घट झाली आहे. तर पुरूषांच्या तुलनेत महिला मतदारांची संख्या वाढली आहे.
१२. मुलीवर जबाबदारी पडू नये, म्हणून ८० वर्षीय वृद्धाने जिवंतपणीच केला तेराव्याचे विधी
उत्तर प्रदेशातील बागपत जिल्ह्यातील एका ८० वर्षीय ज्येष्ठ नागरिकानं चक्क जिवंतपणीच स्वतःचा तेराव्याचा विधी केला. जोहडी गावातील चौधरी बलजोर सिंह यांच्या पत्नीचे निधन झाले असून, त्यांना एकच मुलगी आहे आणि तिला तीन मुले आहेत. आपल्यानंतर पारंपरिक अंत्यसंस्कार आणि तेराव्याच्या विधींची जबाबदारी मुलीवर पडू नये, अशी त्यांची इच्छा होती. त्यामुळे हे विधी स्वतःच जिवंतपणी पूर्ण करण्याचा निर्णय त्यांनी घेतला. “मला मुलगा नाही. त्यामुळे माझ्या मुलीवर या जबाबदाऱ्यांचा भार पडू नये, असे मला वाटले. म्हणून मी जिवंतपणीच हे विधी करत आहे,” असे बलजोर सिंह यांनी सांगितले. मात्र सध्या त्यांच्या या निर्णयाची परिसरात चर्चा सुरू आहे.
१३. ‘खूप कणखर व्यक्ती’ ट्रम्प यांच्या पुन्हा एकदा पंतप्रधान मोदींचे कौतुक
अमेरिकेचे अध्यक्ष डोनाल्ड ट्रम्प यांनी पुन्हा एकदा पंतप्रधान नरेंद्र मोदी यांचं कौतुक केलं आहे. फिलिपाइन्सची राजधानी मनिला येथे झालेल्या क्वाड देशांच्या नेत्यांच्या बैठकीदरम्यान ट्रम्प यांनी मोदी यांचा उल्लेख ‘खूप कणखर व्यक्ती’ असा केला. तर जपानच्या पंतप्रधान साने ताकाइची यांचाही उल्लेख करत त्यांनी त्या कदाचित मोदींपेक्षाही अधिक कणखर असू शकतात, अशी मिश्कील टिप्पणी केली.या बैठकीत भारत, अमेरिका, जपान आणि ऑस्ट्रेलिया या चार देशांच्या नेत्यांनी कृत्रिम बुद्धिमत्ता, सागरी सुरक्षा आणि महत्त्वाच्या खनिजांच्या पुरवठ्याबाबत सहकार्य वाढवण्यावर चर्चा केली. क्वाड देशांच्या नेत्यांची ही बैठक तब्बल दोन वर्षांनंतर झाली.
१४. “तुम्ही आमचे थाला आहात आणि कायम राहाल” धोनीसाठी ऋतुराजचा संदेश
CSK ने धोनीच्या खेळाडू म्हणून IPL कारकिर्दीला पूर्णविराम मिळाल्याचे स्पष्ट करत त्याच्यावर नवी जबाबदारी सोपवण्याची घोषणा केली. या घोषणेनंतर ऋतुराज गायकवाडने खास पोस्ट शेअर करत कॅप्टन कूलबद्दलच्या आपल्या भावना व्यक्त केल्या. २०१९ मध्ये मी पहिल्यांदा चेन्नई सुपर किंग्स मध्ये दाखल झालो, तेव्हा तुम्हाला शक्य तितक्या जवळून पाहून मला ‘साधेपणा’ या शब्दाचा खरा अर्थ समजला. गेल्या अनेक वर्षांत तुम्ही असंख्य यश मिळवले, मात्र तुमच्याकडून शिकलेला साधेपणाचा धडा हा माझ्यासाठी सर्वात मोठा होता. तुमच्यासोबत ड्रेसिंग रूम शेअर करणे, मैदानावर एकत्र खेळणे, २२ यार्डच्या खेळपट्टीवर तुमच्यासोबत वेळ घालवणे आणि तुमच्यासोबत सामने जिंकणे, हे एखाद्या स्वप्नासारखे आहे. तुम्ही आमचे थाला आहात आणि कायम राहाल. आमचे कर्णधार आणि आमचे नेतृत्व! प्रत्येक गोष्टीसाठी धन्यवाद, माही भाई, असा भावनिक संदेश भावनिक संदेश ऋतुराजने धोनीसाठी लिहिला.
१५. “प्रत्येक भारतीयाच्या रक्तात राम आहे, मग…”; जावेद अख्तर यांचे विधान
प्रसिद्ध गीतकार आणि कवी जावेद अख्तर यांना ‘रामायण’ चित्रपटाच्या गाण्यातील ओळींबाबत विचारणा करण्यात आली. यात तुम्ही ज्या ओळी लिहिल्या आहेत त्या प्रत्येकाच्या हृदयाला भिडल्या आहेत. यावर जावेद अख्तर म्हणाले, “प्रभू राम म्हणजे एक व्यक्ती नाही, राम म्हणजे जीवन जगण्याचा मार्ग आहे. राम म्हणजे आदर्श आहे. या पातळीवर जर विचार करून लिहिलं तर लोकांना आवडतंच. मी तुम्हाला हे सांगू इच्छितो माझं म्हणणं ऐकून कदाचित लोक नाराज होतील पण तरीही सांगतो, भारतातील प्रत्येक भारतीयाच्या रक्तात राम आहे, मग त्याचा धर्म कुठलाही असो. राम म्हणजे जीवन जगण्याची कला आहे त्यामुळे मी हे म्हणत आहे,”असं जावेद अख्तर यांनी म्हटलं आहे.
हेही वाचा:
Purandar : महात्मा फुले साहित्य संमेलनाच्या अध्यक्षपदी कवी भालेराव








