TOP 15 News: नागपूरमधील भाजप नेत्याचा राजीनामा ते सीजेपी आंदोलनापूर्वी दिल्लीत कडक सुरक्षा; जाणून घ्या आजच्या Top 15 News
TO 15 News: राज्य, देश-विदेश, क्रीडा आणि मनोरंजन क्षेत्रातील ताज्या घडामोडी...
TOP 15 News: 1. पुण्यात शिवसेनेची माघार; पण इतर ठिकाणी बंडखोरांचे आव्हान
विधान परिषदेच्या पदवीधर आणि शिक्षक मतदारसंघाच्या निवडणुकीत उमेदवारी अर्ज मागे घेण्याच्या शुक्रवारच्या अखेरच्या दिवशी पुणे वगळता इतर बंडखोरांनी माघार घेण्यास नकार दिला. त्यामुळे महायुती तसेच महाविकास आघाडीसमोर बंडखोरांचे आव्हान उभे राहिले आहे. दरम्यान, पुणे पदवीधर आणि पुणे शिक्षक मतदारसंघातील युती तसेच आघाडीच्या बंडखोरांनी माघार घेतली. पुणे पदवीधरमधून राष्ट्रवादी काँग्रेसच्या प्रताप उर्फ भैय्या माने तर, पुणे शिक्षक मतदारसंघातून शिवसेनेच्या मंगेश चिवटे यांनी आपले अर्ज मागे घेतले. त्यामुळे भाजपच्या अधिकृत उमेदवार डॉ. स्मिता जाधव आणि कौस्तुभ गावडे यांना दिलासा मिळाला आहे.
पुणे शिक्षक मतदारसंघात महायुतीचे उमेदवार कौस्तुभ गावडे व महाविकास आघाडीतील काँग्रेसचे आमदार व उमेदवार जयंत आसगावकर यांच्यात लढत होणार आहे. या ठिकाणी माजी आमदार दत्तात्रय सावंत, मंत्री उदय सामंत यांचे स्वीय सहायक सचिन सानप हे निवडणूक लढणार असल्याने त्यांचे आव्हान महायुतीसमोर आहे.
2. प्रदीप पुर्णेकर प्रकरणातील मुख्य आरोपीला प्रयागराजमधून अटक
ठाण्यातील शिवसेना ठाकरे गटाचे पदाधिकारी प्रदीप पुर्णेकर प्रकरणातील मुख्य आरोपी ठाणे क्राइम ब्रांचच्या जाळ्यात आला आहे. संतोष कनोजिया उर्फ टल्ली याला अटक केली आहे. सोबत असलेल्या अज्ञात आरोपीला देखील पोलिसांनी पकडलं आहे. प्रयागराज इथे दोघांना केली अटक केली आहे. संतोष कनोजिया हाच या कटातील मुख्य आरोपी असल्याचे आतापर्यंत समोर आले आहे. त्यामुळे आता या प्रकरणात रचलेला कट याबद्दल स्पष्टता समोर येण्याची शक्यता आहे. दरम्यान, प्रदीप पूर्णेकर यांच्यावर 29 सप्टेंबर रोजी रात्री पाच हल्लेखोरांनी गोळीबार केल्याने त्यांच्यावर त्यांचा मृत्यू झाला. त्यानंतर त्यांच्या कुटुंबीयांनी ठाण्याच्या माजी महापौर मिनाक्षी शिंदे आणि त्यांच्या पतीवर हत्येचा कट रचल्याचा आरोप केला आहे.
Nana Patekar
3. नानांच्या अंत्यसंस्काराला बॉलिवूड सेलिब्रिटी अनुपस्थित; मिटकरींची खंत
‘असंवेदनशीलतेचा कळस बॉलीवूडच्या लोकांमध्ये दिसला’
ज्येष्ठ अभिनेते नाना पाटेकर यांच्यावर रात्री उशीरा पुण्यातील डोणजे गावात त्यांच्यावर अंत्यसंस्कार करण्यात आले. मात्र, अंत्यसंस्काराच्यावेळी हिंदी चित्रपटसृष्टी क्षेत्रातील अनेक मान्यवर उपस्थित नसल्याची खंत राष्ट्रवादीचे माजी आमदार अमोल मिटकरी यांनी व्यक्त केली. नाना पाटेकरांचा साधेपणा, मातीशी असलेली नाळ आणि शेतकऱ्यांसाठी केलेलं सहकार्यचं काम चित्रपटसृष्टी क्षेत्रातील चार भिंतीच्या आत राहणाऱ्या इतरांना खूपत होतं का? असं सवाल मिटकरी यांनी यावेळी केला आहे. असंवेदनशीलतेचा कळस बॉलीवूड’च्या लोकांमध्ये दिसला. हे अत्यंत निंदनीय आहे. मराठी माणसाचा तिरस्कार करणं बॉलीवूडच्या काही लोकांनी बंद करावं. पुणे आणि मुंबईतील अभिनेत्यांनी आता हे लक्षात ठेवावं की, चार भिंतीच्या आत राहून ट्विटरच्या माध्यमातून श्रद्धांजली वाहत असतील तर त्यांनाही या वेळेतून जावं लागेल, असेही मिटकरी म्हणाले.
4. नागपूरमधील भाजप नेत्याचा राजीनामा; असंतोष समोर
नागपूर पदवीधर मतदारसंघाच्या निवडणुकीमुळे भाजपच्या अंतर्गत गोटातील असंतोष चव्हाट्यावर आला आहे. पक्षाने सुधाकर कोहळे यांना अधिकृत उमेदवारी जाहीर केल्यानंतर पक्षात मोठी बंडखोरी पाहायला मिळत आहे. बंडखोर उमेदवार अनिल सोले यांचा अर्ज कायम राहिल्याने कोहळेंच्या अडचणी वाढल्या. त्यातच आता भाजपचे माजी आमदार गिरीश व्यास यांनी पक्षाच्या सर्व पदांसह प्राथमिक सदस्यत्वाचा राजीनामा दिला. हा भाजपला मोठा धक्का दिला आहे. तिकीट वाटपावरून जुन्या आणि निष्ठावंत नेत्यांमध्ये प्रचंड नाराजी असल्याचा प्रत्यय या निमित्ताने समोर आला आहे. “सुधाकर कोहळे कार्यकर्ते असतील, तर आम्हीही कार्यकर्ते आहोत. पक्षात अनेकजण कानामागून आले आणि तिखट झाले,” अशा शब्दांत गिरीश व्यास यांनी संताप व्यक्त केला आहे.
5. दुष्काळामुळे नवरात्र साधेपणाने; आमदार रवींद्र फाटकांचा शेतकऱ्यांना मदतीचा निर्धार
संकल्प प्रतिष्ठानच्या वतीने आयोजित करण्यात येणारा बहुचर्चित ‘संकल्प दांडिया उत्सव २०२६’ येत्या ११ ते २० ऑक्टोबरदरम्यान ठाण्यातील रघुनाथनगर येथील संकल्प चौकात रंगणार आहे. आमदार व शिवसेना उपनेते रविंद्र फाटक यांच्या पुढाकाराने आयोजित होणाऱ्या या उत्सवाचे यंदा २१ वे वर्ष असून, उत्सवाच्या माध्यमातून महाराष्ट्रातील दुष्काळग्रस्त शेतकरी बांधवांना मदतीचा हात देण्याचा संकल्प प्रतिष्ठानने केला आहे. त्यामुळे हा उत्सव केवळ मनोरंजनापुरता मर्यादित न राहता सामाजिक संवेदनशीलतेचा संदेशही देणार आहे. संकल्प चौकात रंगणाऱ्या या उत्सवाला मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री सुनेत्रा पवार यांच्यासह मंत्री आणि राजकीय क्षेत्रातील मान्यवर भेट देणार असल्याची माहिती आयोजकांनी दिली.
Dada Bhuse
6. MPSC अध्यक्षांच्या राजीनाम्याची मागणी योग्य नाही, दादा भुसे यांची प्रतिक्रिया
पुण्यात सुरू असलेल्या MPSC विद्यार्थ्यांच्या आंदोलनावरून राज्यातील राजकीय वातावरण तापले आहे. या आंदोलनावरून सत्ताधारी आणि विरोधकांमध्ये आरोप-प्रत्यारोप सुरू आहेत. आयोगाच्या अध्यक्षांच्या राजीनाम्याच्या मागणीवरही आंदोलक विद्यार्थी ठाम आहेत. यावर मंत्री दादा भुसे यांनी प्रतिक्रिया दिली आहे. संबंधित अध्यक्षांच्या कार्यकाळात पेपरफुटीची कोणतीही घटना घडलेली नाही, त्यामुळे त्यांच्या राजीनाम्याची मागणी करणे योग्य नाही, असे दादा भुसे यांनी म्हटले आहे. विद्यार्थ्यांच्या अनेक मागण्यांवर चर्चा सुरू असून शासनाकडून परीक्षा पारदर्शकपणे पार पाडण्यासाठी पावले उचलली जात आहेत, असेही त्यांनी स्पष्ट केले.
7. केंद्रीय दुष्काळ पाहणी पथकाकडून शेती पिकांची पाहणी; सोयाबीन, तूर पिकांचे नुकसान
सोलापूर जिल्ह्यात केंद्रीय दुष्काळ पाहणी पथक दाखल झालं असून बार्शी तालुक्यातील उपळाई ठोंगे येथे पथकाने शेती पिकांची पाहणी केली. यावेळी सोयाबीन आणि तूर पिकांचं मोठ्या प्रमाणात नुकसान झाल्याची माहिती शेतकऱ्यांनी दिली. जनावरांचा चारा, पिण्याच्या पाण्याची उपलब्धता, भूजल पातळी आणि पेरणीनंतर झालेल्या पावसाबाबत पथकाने शेतकऱ्यांकडून माहिती घेतली. गावात पाणीटंचाई असल्याने टँकर सुरू करण्याची मागणीही ग्रामस्थांनी केली. दरम्यान, जिल्ह्यातील ६० टक्के पंचनामे पूर्ण झाले असून पुढील दोन ते तीन दिवसांत शंभर टक्के पंचनामे पूर्ण करून शासनाला अहवाल सादर केला जाईल, अशी माहिती जिल्हाधिकारी एस. कार्तिकेयन यांनी दिली.
8 . भिवंडीत ‘व्होट चोरी’विरोधात इंडिया आघाडीची उग्र निदर्शने; निवडणूक आयुक्तांच्या राजीनाम्याची मागणी
भिवंडीत व्होट चोरीच्या विरोधात इंडिया आघाडीच्या वतीने उपविभागीय अधिकारी कार्यालयासमोर जोरदार निदर्शने करण्यात आली. पोलिसांनी मोर्चाला परवानगी नाकारल्याने मोर्चा रद्द करून प्रांत कार्यालयासमोर आंदोलन करण्यात आले. यावेळी ‘वोट बचाओ, देश बचाओ’च्या घोषणा देत सरकारविरोधात जोरदार घोषणाबाजी करण्यात आली. तसेच निवडणूक आयुक्त ज्ञानेश कुमार यांच्या राजीनाम्याची मागणी करण्यात आली असून, मागण्या मान्य होईपर्यंत आंदोलन अशाच प्रकारे सुरू ठेवण्याचा इशारा इंडिया आघाडीच्या वतीने देण्यात आला आहे. यावेळी परिसरात कोणताही अनुचित प्रकार घडू नये, यासाठी पोलिसांचा तगडा बंदोबस्त तैनात करण्यात आला होता.
9. पालकांना स्कूल बसची फी UPI द्वारे भरता येणार नाही?
मुलांच्या शाळेच्या बसची फी भरताना UPI पेमेंटचा वापर करता येणार नाही. १५ ऑक्टोबरपासून स्कूल बसची फी UPI ने दिली तर ती स्वीकारली जाणार नाही, असा निर्णय स्कूल बस ओनर्स असोसिएशनने (SBOA) घेतल्याची माहिती समोर आली आहे. 2 हजार रुपयांपेक्षा अधिक रकमेच्या UPI व्यवहारांवर प्रति व्यवहार 200 रुपये इतके शुल्क आकारले जात असल्याचे यामागचं महत्त्वाचं कारण असल्याचं बस व्यवस्थापनाकडून सांगण्यात येत आहे. त्यामुळे आता पालकांना बसची फी भरण्यासाठी UPI ऐवजी धनादेश किंवा क्रेडिट कार्डचा पर्याय वापरावा लागू शकतो. दरम्यान, शाळेची सहा महिन्यांची बस फी अनेकदा दोन हजार रुपयांपेक्षा जास्त असते. त्यामुळे प्रत्येक व्यवहारामागे जास्तीचे शुल्क भरावं लागत असल्याने UPI पेमेंट स्वीकारणं थांबवलं पाहिजे असं व्यवस्थापनाने स्पष्ट केलं आहे.
10. नवरात्रोत्सवानिमित्त सप्तशृंगगडावरील तयारी पूर्ण; मंदिर 24 तास खुले
उद्या, 11 ऑक्टोबरपासून नवरात्रोत्सवाला सुरुवात होत असून साडेतीन शक्तिपीठांपैकी अर्धपीठ असलेल्या नाशिक जिल्ह्यातील सप्तशृंगगडावर तयारी पूर्ण झाली आहे. भाविकांची गर्दी लक्षात घेऊन मंदिर व्यवस्थापन आणि प्रशासन सज्ज झाले आहे. नवरात्रोत्सवाच्या काळात मंदिर भाविकांसाठी 24 तास खुले राहणार असल्याने भाविकांना दिवसरात्र देवीचे दर्शन घेता येणार आहे. दरम्यान, घाटरस्त्यावर वाहतूक कोंडी होऊ नये यासाठी सप्तशृंगगडावर जाणाऱ्या खासगी वाहनांना 20 ऑक्टोबरपर्यंत प्रवेशबंदी घालण्यात आली आहे. भाविकांची वाढती गर्दी लक्षात घेऊन गडावर तात्पुरत्या स्वरूपाचे बसस्थानक उभारण्यात आले आहे. त्यामुळे एसटी बसेसच्या माध्यमातून भाविकांची वाहतूक करण्याचे नियोजन करण्यात आले आहे.
CJP Protest
11. सीजेपीचे आंदोलन दिल्लीत कडक सुरक्षा; ट्रेन्स रद्द, इंटरनेट सेवाही स्थगित
कॉकरोच जनता पार्टीने आज १० ऑक्टोबरला दिल्लीच्या जंतर मंतर येथे आंदोलन पुकारले आहे. मुख्य निवडणूक आयुक्त ज्ञानेश कुमार यांच्या राजीनाम्याची आणि मतदार यादीतील एसआयआरच्या मुद्द्याची मागणी या आंदोलनाद्वारे केले जाणार आहे. मात्र दिल्ली पोलिसांनी आंदोलनासाठी परवानगी नाकारली आहे. या पार्श्वभूमीवर दिल्लीत सुरक्षा व्यवस्था कडक करण्यात आली आहे. दिल्लीच्या सीमांवर अतिरिक्त दल तैनात करण्यात आले आहे, अनेक मेट्रो स्थानकांचे प्रवेश आणि निर्गमन दरवाजे बंद करण्यात आले आहेत, अनेक रेल्वेगाड्या रद्द करण्यात आल्या आहेत आणि काही भागांमध्ये इंटरनेट सेवा तात्पुरती स्थगित करण्यात आली आहे. सुरक्षेच्या उपाययोजनांमुळे ३८ रेल्वे गाड्या रद्द करण्यात आल्या आहेत. जंतर मंतरच्या परिसरातील इंटरनेट सेवा शुक्रवार रात्री १० ते शनिवार रात्री १० वाजेपर्यंत बंद ठेवण्यात आली आहे.
12. भाजपचा मोठा विजय! विधानसभा पोटनिवडणुकीत दोन्ही उमेदवारांना मारली बाजी
पश्चिम बंगालमधील पोटनिवडणुकीत भाजपने रेजीनगर आणि नंदीग्राम या दोन्ही विधानसभा मतदारसंघांत मोठा विजय मिळवला. मुस्लिमबहुल रेजीनगरमध्ये भाजपचे शंकराव सरकार यांनी 75 हजार 816 मतांनी विजय मिळवला. त्यांना 1 लाख 29 हजार 914 मते मिळाली. आम जनता उन्नयन पार्टीचे गुलाम नबी आझाद यांना 54 हजार 98 मते मिळाली. तर नंदीग्राममध्ये भाजपच्या हासी रानी रथ यांनी तब्बल 1 लाख 22 हजार 800 मतांनी विजय मिळवला. त्यांनी भाजपचे नेते आणि मुख्यमंत्री शुभेंदू अधिकारी यांचा यापूर्वीचा 82 हजार मतांच्या विजयाचा विक्रमही मागे टाकला. नंदीग्रामची जागा शुभेंदू अधिकारी यांनी भवानीपूर मतदारसंघ स्वतःकडे ठेवण्यासाठी सोडली होती.
13. ‘भारताचे खरे बॉस तुम्हीच’ एलॉन मस्क यांचा अंबानींना खोचक टोला
टेस्ला आणि स्पेसएक्सचे सर्वेसर्वा एलॉन मस्क यांनी आता रिलायन्स समूहाचे अध्यक्ष मुकेश अंबानी यांच्यावर उपरोधिक टीका केली आहे. मस्क यांनी शुक्रवारी पहिली पोस्ट शेअर केली होती, ज्यात त्यांनी भारताचे बॉस अंबानी असल्याचा उल्लेख केला होता. तसेच अंबानींना उद्देशून ‘डियर प्राइम मिनिस्टर’ असा उल्लेख करत, अधिकृत पदापेक्षाही अंबानींकडे अधिक अधिकार असल्याचा टोला मस्क यांनी लगावला आहे. त्यानंतर मस्क यांनी नव्या पोस्टमधून, “भारताचे खरे बॉस तुम्हीच आहात, ही बाब लक्षात न आल्याबद्दल कृपया मी दिलगिरी व्यक्त करतो, त्याचा स्वीकार करा”, अशी खोचक टीका केली. भारतीय जनतेचे ‘मक्तेदारीतून होणारे शोषण’ सुरू ठेवण्याचाच अंबानींचा प्रयत्न असल्याचा गंभीर आरोपही मस्क यांनी केला आहे.
14. इशान किशनने रचला षटकारांचा रेकॉर्ड!
भारत आणि वेस्ट इंडिज यांच्यातील रांची येथील दुसऱ्या टी-२० सामन्यात यष्टिरक्षक फलंदाज इशान किशनने आणखी एका ऐतिहासिक विक्रमाला गवसणी घातली आहे. पहिल्या सामन्यात नाबाद ३७ धावा करून विराट कोहलीचा विक्रम मोडणाऱ्या इशानने या सामन्यात अवघ्या २२ चेंडूंत ६ चौकार आणि २ षटकारांच्या जोरावर ४३ धावांची वादळी खेळी केली. या खेळीदरम्यान पहिला षटकार ठोकताच त्याने २०२६ वर्षातील आंतरराष्ट्रीय टी-२० मध्ये ५० षटकारांचा टप्पा गाठत नवा इतिहास रचला. आयसीसीच्या पूर्ण सदस्य देशांमधून एका कॅलेंडर वर्षात ५० हून अधिक आंतरराष्ट्रीय टी-२० षटकार मारणारा इशान किशन हा जगातील केवळ तिसरा फलंदाज ठरला आहे.
15. ‘रामायण’ चित्रपटाच्या रिलीज डेटमध्ये बदल
दिग्दर्शक नितेश तिवारी यांच्या बहुप्रतिक्षित ‘रामायण’ या चित्रपटाबाबत आता एक मोठी अपडेट समोर आली आहे. ‘रामायण’च्या आंतरराष्ट्रीय प्रदर्शनाची तारीख पुन्हा एकदा बदलण्यात आली आहे. सोनी पिक्चर्स जर्मनीच्या अधिकृत यूट्यूब हँडलनुसार हा चित्रपट आता ५ नोव्हेंबर २०२६ रोजी जगभरातील चित्रपटगृहांमध्ये प्रदर्शित केला जाणार आहे. इंग्रजी ट्रेलरमध्ये चित्रपट ६ नोव्हेंबर रोजी प्रदर्शित होणार होता. मात्र, आता ही तारीख एक दिवस आधी म्हणजेच ५ नोव्हेंबर करण्यात आली आहे. भारतातील प्रदर्शनाची तारीख अद्याप निर्मात्यांनी अधिकृतपणे जाहीर केलेली नाही मात्र ८ नोव्हेंबर रोजी येणाऱ्या दिवाळीच्या मुहूर्तावर हा चित्रपट भारतात प्रदर्शित होण्याची शक्यता वर्तवली जात आहे.
