Top 10 Sports News : पडिक्कलने सोडला झेल, भारताला दंड अन् लक्ष्य सेनचा पराक्रम! मैदानावरील सर्व थरारक घडामोडी जाणून घ्या एकाच ठिकाणी
Top 10 Sports News : आठवड्याभरात क्रीडा क्षेत्रात घडलेल्या घटनाचा आढावा घेतला आहे, ज्यामध्ये क्रिकेट, टेनिस, फुटबॉल आणि कुस्ती इत्यादी खेळांचा समावेश आहे.

Top 10 Sports News Today १. ‘माझा की तुझा’ या संभ्रमात देवदत्त पडिक्कलच्या हातून सुटला झेल!
भारत आणि न्यूझीलंड यांच्यातील पहिल्या कसोटी सामन्याच्या पहिल्या दिवशी भारताने ७० धावांत ५ गडी बाद करून दमदार सुरुवात केली होती; मात्र त्यानंतर हेन्री निकोल्स (नाबाद ११३) आणि ग्लेन फिलिप्स (नाबाद ९४) यांनी १७३ धावांची अभेद्य भागीदारी रचत न्यूझीलंडला ५ बाद २४३ धावांपर्यंत नेले. डावाच्या ७४ व्या षटकात प्रसिध कृष्णाच्या चेंडूवर निकोल्सचा सोपा झेल पकडताना देवदत्त पडिक्कल आणि यष्टिरक्षक ऋषभ पंत यांच्यात मोठा संभ्रम झाला. दोघांनी एकमेकांना पाहून वेग कमी केल्याने शेवटी पडिक्कलच्या हातून झेल सुटला, ज्यामुळे कर्णधार शुबमन गिल अत्यंत नाराज दिसून आला.
२. टीम इंडियाला आयसीसीचा मोठा दणका; संथ षटकांमुळे ठोठावला ३५ टक्के दंड!
न्यूझीलंडविरुद्धचा पाचवा वनडे सामना जिंकून मालिका ३-१ ने खिशात घातल्यानंतर आयसीसीने भारतीय संघाला मोठा झटका दिला आहे. माउंट मौंगानुई येथे झालेल्या या निर्णायक सामन्यात निर्धारित वेळेत सात षटके कमी टाकल्याबद्दल संपूर्ण भारतीय संघाला सामना शुल्काच्या ३५ टक्के दंड ठोठावण्यात आला आहे. प्रत्येक कमी षटकामागे पाच टक्के दंडाच्या नियमानुसार ही कारवाई झाली असून, कर्णधार श्रेयस अय्यरने सामनाधिकारी रंजन मदुगले यांचा निर्णय स्वीकारल्याने औपचारिक सुनावणी टळली.
३. १३ वर्षांनंतर नागपुरात घुमणार कुस्तीचा शंखनाद! २० जानेवारीपासून रंगणार ‘महाराष्ट्र केसरी’चा थरार
तब्बल १३ वर्षांच्या प्रदीर्घ प्रतीक्षेनंतर प्रतिष्ठेच्या ‘महाराष्ट्र केसरी’ कुस्ती स्पर्धेचे यजमानपद उपराजधानी नागपूरला मिळाले आहे. २० ते २४ जानेवारी २०२७ दरम्यान लकडगंज येथील सरदार वल्लभभाई पटेल मैदानावर नागपूर महानगरपालिका आणि कुस्तीगीर संघाच्या विद्यमाने ही स्पर्धा रंगणार आहे. राज्यातील ४२ शहरांमधून सुमारे १३०० मल्ल सहभागी होणार असून, दोन मॅट आणि दोन लाल मातीच्या आखाड्यांवर चुरशीच्या लढती पाहायला मिळतील. याबाबत राज्याचे कुस्तीगीर संघाचे अध्यक्ष रामदास तडस यांनी अधिकृत माहिती दिली आहे.
४. ‘गौतम अगदी बरोबर बोलले…’; भारतीय फलंदाजीच्या पडझडीनंतर रवी शास्त्रींचा गंभीरला खंबीर पाठिंबा
माजी प्रशिक्षक रवी शास्त्री यांनी विद्यमान प्रशिक्षक गौतम गंभीर यांच्या भूमिकेचे जोरदार समर्थन केले आहे. न्यूझीलंडविरुद्धची एकदिवसीय मालिका भारताने ३-१ ने जिंकली असली, तरी चौथ्या सामन्यात रोहित शर्मा, विराट कोहली आणि श्रेयस अय्यर यांसारखे दिग्गज अपयशी ठरल्याने संघ अवघ्या ८९ धावांवर गारद झाला होता. अवघ्या २६-२७ षटकांत डाव आटोपल्याने गंभीरने तीव्र नाराजी व्यक्त केली होती. आगामी दक्षिण आफ्रिका विश्वचषकातील खेळपट्ट्या आणि न्यूझीलंडमधील परिस्थिती यात मोठे साम्य असल्याने हे सामूहिक अपयश धोक्याची घंटा असल्याचे शास्त्री म्हणाले. प्रत्येक वेळी ३०० धावांची अपेक्षा न ठेवता खेळपट्टीनुसार संयमी खेळ करावा, असा मोलाचा सल्लाही त्यांनी दिला.
५. ‘रोहित आयुष्यभर खेळत राहणार नाही…’; खराब फॉर्मनंतर कपिल देव यांचा स्पष्ट इशारा
न्यूझीलंडविरुद्धच्या चार एकदिवसीय सामन्यांत केवळ ३० धावा करत अपयशी ठरलेल्या रोहित शर्माच्या आंतरराष्ट्रीय भविष्यावर पुन्हा प्रश्नचिन्ह निर्माण झाले आहे. कसोटी आणि टी-२० मधून यापूर्वीच निवृत्त झालेल्या रोहितबाबत बोलताना माजी कर्णधार कपिल देव म्हणाले की, सचिन, गावस्कर आणि धोनीप्रमाणेच प्रत्येकाला एक दिवस निवृत्त व्हावे लागते; त्यामुळे त्याचा निर्णय निवड समितीने घ्यावा. दुसरीकडे, मुख्य निवडकर्ता आणि रोहितचा जुना मित्र प्रज्ञान ओझा याच्यासमोर आगामी विश्वचषकापूर्वी रोहितला संघात कायम ठेवायचे का, असा मोठा पेच निर्माण झाला असून, स्थान टिकवण्यासाठी रोहितला धावा करणे अनिवार्य ठरले आहे.
६. लक्ष्य सेनने रचला इतिहास! कुमामोटो मास्टर्सचे जेतेपद पटकावणार पहिलाच भारतीय
भारताचा स्टार बॅडमिंटनपटू लक्ष्य सेनने जपानमधील कुमामोटो मास्टर्सचे विजेतेपद पटकावत ऐतिहासिक कामगिरी केली आहे. अंतिम सामन्यात स्थानिक खेळाडू कोकी वातानाबेविरुद्ध पहिला सेट १३-२१ ने गमावल्यानंतर लक्ष्यने जबरदस्त पुनरागमन करत पुढील दोन्ही सेट २१-१८ आणि २१-१४ असे जिंकून ६४ मिनिटांत सामना २-१ ने खिशात घातला. ही स्पर्धा जिंकणारा लक्ष्य पहिलाच भारतीय ठरला असून, २०२६ मधील हे त्याचे सलग दुसरे बीडब्ल्यूएफ वर्ल्ड टूर जेतेपद आहे. या विजयामुळे त्याला ९२०० गुण मिळाले असून वर्ल्ड टूर फायनल्सची दावेदारी अधिक भक्कम झाली आहे.
७ . कर्णधार गंगटेविरोधात वर्णद्वेषी इशारा; एआयएफएफची तक्रार
एएफसी अंडर-१७ आशियाई चषक पात्रता फेरीत पॅलेस्टाईनच्या खेळाडूने भारतीय कर्णधार दलालमुओन गंगटेविरोधात कथित वर्णद्वेषी इशारा केल्याने मोठा वाद निर्माण झाला आहे. अखिल भारतीय फुटबॉल महासंघाने याप्रकरणी आशियाई फुटबॉल महासंघाकडे तक्रार दाखल करून सामन्याचे फुटेज तपासण्याची व दोषीवर कठोर कारवाईची मागणी केली आहे; खेळात भेदभाव खपवून घेतला जाणार नसल्याचेही महासंघाने स्पष्ट केले. दरम्यान, या वादानंतरही भारतीय संघाने मैदानात चोख प्रत्युत्तर देत पॅलेस्टाईनचा ४-१ असा धुव्वा उडवला. कंबुहाओ, मुकुंदो, कर्णधार गंगटे आणि झोरमदिनथारा यांनी गोल करत भारताचा शानदार विजय निश्चित केला.
८. भारत पाकिस्तानला नमवत दहाव्यांदा सॅफ चॅम्पियन! सामन्यांनंतर दिला ‘गार्ड ऑफ ऑनर’
सॅफ चॅम्पियनशिप २०२६ च्या अंतिम सामन्यात भारतीय फुटबॉल संघाने पारंपरिक प्रतिस्पर्धी पाकिस्तानचा २-१ असा पराभव करत विक्रमी दहाव्यांदा विजेतेपद पटकावले. दहा खेळाडूंसह खेळणाऱ्या पाकिस्तानला हरवल्यानंतर दोन्ही संघांनी एकमेकांना ‘गार्ड ऑफ ऑनर’ देत क्रीडा विश्वाची मने जिंकली. पहलगाम हल्ला आणि ‘ऑपरेशन सिंदूर’नंतर क्रिकेटमध्ये दोन्ही देशांतील तणाव शिगेला असताना, फुटबॉल मैदानावरील या बंधुभावाचा व्हिडिओ व्हायरल होत आहे. यापूर्वी मुख्य प्रशिक्षक नौशाद मुसा यांच्या पुढाकाराने ५ नोव्हेंबरच्या साखळी सामन्यातही दोन्ही कर्णधारांनी हस्तांदोलन करत खिलाडूवृत्तीचे दर्शन घडवले होते.
९. ‘कमिन्सने आमचा विश्वासघात केला…’; सँडपेपरगेट प्रकरणावरून डेव्हिड वॉर्नर संतापला
२०१८ च्या कुप्रसिद्ध ‘सँडपेपरगेट’ चेंडू छेडछाड प्रकरणावरून ऑस्ट्रेलियन क्रिकेटमध्ये पुन्हा एकदा मोठा वाद पेटला आहे. माजी सलामीवीर उस्मान ख्वाजाने आपल्या ‘सब्र’ या आत्मचरित्रात या कटाची माहिती संपूर्ण संघाला होती, असा दावा केला होता. यानंतर कसोटी कर्णधार पॅट कमिन्सने ख्वाजाचे हे आरोप ‘१०० टक्के खोटे आणि बकवास’ म्हणत फेटाळून लावले. मात्र, यानंतर माजी सलामीवीर डेव्हिड वॉर्नरने उघडपणे ख्वाजाची बाजू घेत कमिन्सवर विश्वासघाताचा गंभीर आरोप केला आहे. ख्वाजाच्या पुस्तकातील प्रत्येक शब्द सत्य असल्याचे वॉर्नरने म्हटल्याने आजी-माजी खेळाडूंमधील वाद आता चांगलाच चिघळला आहे.
१०. “बेट्यांनो, अशीच आक्रमकता दाखवत राहा, पण…”, शोएब अख्तरचं वक्तव्य
१९ वर्षांखालील आशिया चषक २०२६ च्या अंतिम सामन्यात भारताने पाकिस्तानवर अवघ्या १ गडी राखून ऐतिहासिक विजय मिळवला. या थरारक विजयानंतर पाकिस्तानचा माजी वेगवान गोलंदाज शोएब अख्तरने भारतीय युवा संघाचे कौतुक केले आहे. ‘पीटीव्ही स्पोर्ट्स’शी बोलताना अख्तर म्हणाला की, “भारतीय खेळाडूंची आक्रमक शैली मला खूप आवडली, बेट्यांनो अशीच आक्रमकता दाखवत राहा.” स्पर्धेत पाकिस्तानचा संघ सरस असूनही निर्णायक क्षणी दबाव हाताळण्यात अपयशी ठरला, तर भारताने कठीण प्रसंगी बाजी मारली, अशी कबुलीही त्याने दिली. या विजयासह भारताने पाकिस्तानविरुद्धच्या ३२ सामन्यांत १७-१५ अशी आघाडी घेतली आहे.





