उद्धव ठाकरेंना मोठा धक्का;

कोल्हापुरातील बड्या नेत्याचा तडकाफडकी राजीनामा   (Top 10 News)

Top 10 News :  उद्धव ठाकरेंना आणखी एक धक्का बसलाय. एकीकडे खासदारांनी पक्ष सोडला दुसऱ्या बाजुला पक्षातील अंतर्गत वाद पिछा सोडत नाहीये. कोल्हापूर जिल्ह्यातील शिवसेना उद्धव बाळासाहेब ठाकरे गटातील अंतर्गत वादाला कंटाळून कोल्हापुरचे जिल्हाप्रमुख रविकरण इंगवले यांनी आपल्या पदाचा तडकापडकी राजीनामा दिला आहे. गेल्या वर्षीच त्यांची या पदावर नियुक्ती झाली होती. मात्र एक वर्ष पूर्ण होण्याआधीच त्यांनी आपल्या पदाचा राजीनामा दिलाय. राजीनाम्याचे मुख्य कारण पक्षातील दोन गटांतील सातत्याने होणारा वाद आणि तक्रारी असल्याचे सांगण्यात येत आहे. इंगवले यांच्यानुसार त्यांना पक्षात कोणाचीही मदत मिळत नाहीये. यामुळे “आपण एकट्याने किती दिवस पक्षाची पालखी सांभाळायची?” असा सवाल उपस्थित करत पदाचा राजीनामा दिलाय. इंगवले यांनी आपला राजीनामा पक्षाच्या वरिष्ठांकडे पाठवला असून, आता नवीन जिल्हाध्यक्ष कोण होणार? याकडे सर्वांचे लक्ष लागलंय.

ऑपरेशन टायगरनंतर ठाकरेंचे आमदार शिंदेंच्या गळाला?  (Top 10 News)

चार आमदारांनी घेतली एकनाथ शिंदेंची भेट

ठाकरेंच्या शिवसेनेचे सहा खासदार फुटल्यानंतर आता आमदार देखील फुटणार का अशा चर्चा सुरु झाल्या आहेत. ठाकरेंच्या चार आमदारांनी एकनाथ शिंदे यांची भेट घेतल्याची माहिती सूत्रांकडून समोर आली आहे. या चार आमदारांनी 12 आमदार सोबत असल्याचं आश्वासन एकनाथ शिंदेंना दिल्याची सूत्रांची माहिती आहे. ही भेट अलीकडच्या काळात झाल्याची माहिती आहे. आता ठाकरेंच्या खासदारांनंतर आमदार देखील फुटणार का असा प्रश्न निर्माण झाला आहे. एकनाथ शिंदे यांनी ऑपरेशन टायगर संपवल्यानंतर आमदारांचं ऑपरेशन होणार असल्याचं सांगण्यात आलं आहे. ऑपरेशन टायगर 3.0 सक्रिय झाल्याचं सांगण्यात आलं आहे. ठाकरेंच्या शिवसेनेचे चार आमदार दोन तीन दिवसांपूर्वी शिंदेंची भेट घेतल्याची माहिती आहे. त्या आमदारांनी 12 आमदार सोबत असल्याचं सांगितल्याचं माहिती आहे. त्यामुळं राज्यात आता ऑपरेशन टायगर 3.0 च्या चर्चांना उधाण आलंय.

संजय दिना पाटील यांच्या विरोधात मनसे मैदानात; (Top 10 News)

मुख्यमंत्र्यांचा उल्लेख करत लावले पोस्टर

शिवसेना (शिंदे गट) चे ईशान्य मुंबईचे खासदार संजय दिना पाटील यांनी पत्रकारांना शिवीगाळ करत धमकी दिल्याच्या प्रकारानंतर आता मनसेने आक्रमक भूमिका घेतली आहे. मुंबईतील चारकोप परिसरात मनसेकडून संजय दिना पाटील यांच्या निषेधार्थ बॅनर झळकवण्यात आले आहेत. या बॅनरवर “पत्रकारांना धमकी देणारा आणि बॉम्ब बाळगणाऱ्या संज्या डॉनचा जाहीर निषेध” असा मजकूर छापण्यात आला आहे. मुख्यमंत्री देवेंद्र फडणवीस यांनी पत्रकारांबाबत केलेल्या वक्तव्याचाही उल्लेख करण्यात आला असून, “कॅमेऱ्यासमोर पत्रकारांना शिवीगाळ करणाऱ्यांवर कारवाई करणार का?” असा सवाल उपस्थित करण्यात आलाय. याशिवाय “हा आदेश सत्ताधारी पक्षातील लोकांना लागू नाही का?” असा प्रश्नही बॅनरच्या माध्यमातून विचारण्यात आला आहे. या बॅनरची परिसरात जोरदार चर्चा सुरू आहे. दसम्यान, मुख्यमंत्री देवेंद्र फडणवीस यांनी देखील एकनाथ शिंदेंजवळ संजय पाटील यांच्याबाबत तीव्र नाराजी व्यक्त केलीय.

…तर तिलाही लोहगडावरुन ढकलून द्या’

सियाच्या आई-वडिलांची प्रतिक्रिया Top 10 News : 

पुण्यातील केतन अग्रवाल याला त्याची होणारी पत्नी सिया गोयल हिने लोहगडावरुन 400 फूट खोल दरीत ढकलून हत्या केली होती.सियाच्या या कृत्यानंतर तिच्या वडिलांना प्रचंड मानसिक धक्का बसला आहे. सध्या त्यांना रुग्णालयात दाखल करण्यात आले असून ते अतिदक्षता विभागात उपचार घेत आहेत. सियाच्या आई-वडिलांनी रुग्णालयातून माध्यमांशी संवाद साधताना या दोघांनाही सिया दोषी असेल तर तिला कठोर शिक्षा झाली पाहिजे, असे स्पष्टपणे सांगितले. यामध्ये जो कोणी दोषी असेल तर त्याला कठोर शिक्षा झाली पाहिजे, मग माझी मुलगी का असेना. माझ्या मुलीचा दोष असेल तर माझ्या मुलीला लोहगडावर केतनला जिथून ढकलून दिले होते तिथूनच ढकला, असे सियाची आई पूजा गोयल यांनी म्हटले. सियाचे वडील प्रवीण गोयल यांनीही, जे दोषी असतील त्यांना कठोर शिक्षा झाली पाहिजे, असे मत व्यक्त केली.

भिवंडीत 7 वर्षांच्या चिमुरडीवर अत्याचार

नराधमाच्या एन्काउंटरची संतप्त नागरिकांची मागणी

भिवंडी तालुक्यातील कशेळी परिसरातून एक अत्यंत संतापजनक आणि माणुसकीला काळीमा फासणारी घटना समोर आली आहे. घराखाली भावासोबत खेळत असलेल्या एका सात वर्षीय चिमुरडीला खाऊचे आमिष दाखवून तिच्यावर अत्याचार करण्यात आल्याचा धक्कादायक प्रकार घडला आहे. या घटनेची माहिती मिळताच परिसरात तीव्र संतापाची लाट उसळली. घटनेचं गांभीर्य लक्षात घेत नारपोली पोलीस पथकाने तात्काळ कारवाई करत फरार होण्याच्या तयारीत असलेल्या नराधम आरोपीच्या मुसक्या आवळल्या आहेत. अटक करण्यात आलेला नराधम हा अल्पवयीन असल्याची माहिती आहे. या अमानुष अत्याचारानंतर पीडित चिमुरडीची प्रकृती खालावली असून तिच्यावर भिवंडीतील स्व. इंदिरा गांधी स्मृती उपजिल्हा रुग्णालयात तातडीने उपचार सुरू आहेत. चिमुरडीच्या पालकांनी तात्काळ धाडस दाखवून पोलिसांत तक्रार केल्यामुळे या नराधमाचा पळून जाण्याचा डाव फसला.

LPG बाबत केंद्र सरकारचा मोठा निर्णय,

औद्योगिक,व्यावसायिक ग्राहकांना मिळेल दिलासा

केंद्र सरकारने औद्योगिक आणि व्यावसायिक एलपीजी (LPG) ग्राहकांना दिलासा देणारा निर्णय घेतलाय. सरकारने घरगुती वापराव्यतिरिक्तच्या पॅकबंद एलपीजीच्या पुरवठ्यावरील क्षेत्राशी संबंधित सर्व निर्बंध उठवले आहेत. पश्चिम आशियातील तणावामुळे विस्कळीत झालेला एलपीजीचा पुरवठा आता पूर्ववत झाला आहे. यामुळे टंचाईदरम्यान एलपीजी पुरवठ्यावर घातलेले निर्बंध सरकारने शिथिल केले आहेत. पुरवठा आता संकटपूर्व वापराच्या ५० टक्के पातळीपर्यंत पूर्ववत झाला आहे. यामुळे व्यावसायिक आणि औद्योगिक ग्राहकांना मोठा दिलासा मिळणार आहे.

केंद्र सरकारने पासपोर्ट शुल्क वाढवले;

येत्या जुलैपासून नवे दर लागू होणार?

देशात १ जुलै २०२६ पासून पासपोर्ट शुल्क अधिक महाग होणार आहे. केंद्र सरकारने पासपोर्ट नियमांमधील बदलांचा भाग म्हणून शुल्क वाढवण्याचा निर्णय घेतला आहे. सरकारने पासपोर्ट नियम, १९८० मध्ये सुधारणा करून पासपोर्ट आणि प्रवास दस्तऐवजांचे शुल्क वाढवले ​​आहे. सुधारित शुल्क ‘गॅझेट ऑफ इंडिया’ मध्ये अधिसूचित करण्यात आले आहे. नवीन शुल्क अनुसूची IV मध्ये समाविष्ट करण्यात आले आहे. आता तुम्हाला ‘सामान्य’ आणि ‘तत्काळ’ दोन्ही पासपोर्टसाठी अधिक पैसे द्यावे लागतील. एका सरकारी अधिसूचनेनुसार, नवीन किंवा पुनर्जारी केलेल्या ३६-पानांच्या पासपोर्टचे प्रमाणित शुल्क ₹१,५०० वरून ₹२,५०० पर्यंत वाढवण्यात आले आहे. ‘तत्काळ’ सेवेची निवड करणाऱ्यांना आता ₹३,५०० ऐवजी ₹५,००० भरावे लागतील. या श्रेणीसाठीच्या शुल्कात ₹१,५०० ची वाढ करण्यात आली आहे.याव्यतिरिक्त, वारंवार प्रवास करणाऱ्यांकडून वापरल्या जाणाऱ्या ६०-पानांच्या पासपोर्टचे शुल्कही वाढवण्यात आले आहे.

ॲमेझॉनची भारतात ४८ अब्ज डॉलरची गुंतवणूक

CEO अँडी जेसी यांची पंतप्रधानांशी भेट

जागतिक तंत्रज्ञान क्षेत्रातील दिग्गज कंपनी असलेल्या ‘ॲमेझॉन’ने भारतात आपली गुंतवणूक वाढवण्याची घोषणा केली आहे. ॲमेझॉनचे मुख्य कार्यकारी अधिकारी (सीईओ) अँडी जेसी यांनी गुरुवारी पंतप्रधान नरेंद्र मोदी यांची भेट घेतली. या भेटीनंतर त्यांनी भारतात अतिरिक्त १३ अब्ज डॉलरची गुंतवणूक करणार असल्याचे जाहीर केले. जेसी यांच्या घोषणेमुळे २०२६ ते २०३० या पाच वर्षांच्या कालावधीत ॲमेझॉनची भारतातील एकूण नियोजित गुंतवणूक आता तब्बल ४ लाख कोटी रुपयांपेक्षा जास्त झाल्याचं सांगण्यात येतंय. या विक्रमी गुंतवणुकीचे पंतप्रधान मोदी यांनी स्वागत केले आहे. ॲमेझॉनच्या या ऐतिहासिक गुंतवणुकीमुळे देशातील युवकांसाठी रोजगाराच्या नवीन संधी निर्माण होतील. तसेच भारतात गुंतवणूक करण्याबाबत जगभरातील कंपन्यांचा वाढता विश्वासही यामुळे अधोरेखित होत असल्याच त्यांनी यावेळी म्हटलं.

२१ वर्षीय श्री चरणीने इतिहास रचला,

ट्वेंटी-२० वर्ल्ड कपमधील १६ वर्षांपूर्वीचा विक्रम मोडला

भारतीय महिला संघाची युवा गोलंदाज श्री चरणी हिने आयसीसी महिला ट्वेंटी-२० वर्ल्ड कप २०२६ मध्ये इतिहास रचला आहे. बांगलादेशविरुद्धच्या सामन्यात २ विकेट्स घेत तिने हा विक्रम केला आणि १६ वर्षांपूर्वीचा विक्रम मोडला. राधा यादव व श्री चरणी यांनी बांगलादेशला १३६ धावांवर रोखले. २१ वर्षीय चरणी ही भारताकडून एका वर्ल्ड कप स्पर्धेत सर्वाधिक १२ विकेट्स घेणारी आणि जगातील चौथी गोलंदाज ठरली. दरम्यान , या करो वा मरो सामन्यात पहिल्या पाच षटकांत भारतीय खेळाडूंनी चार सोपे झेल सोडले आणि त्याचा फायदा जुआरिया फेर्डोस व सोभना मोस्तरी यांनी उचलून दुसऱ्या विकेटसाठी ५१ धावांची भागीदारी केली. या सामन्यात भारतीय खेळाडूंची अत्यंत खराब कामगिरी पाहायला मिळाली. या कामगिरीवर खुद्द कर्णधार हरमनप्रीत कौर हिने देखील नाराजी व्यक्त केलीय.

‘आता सगळं उघड होणार…!’

‘महाराष्ट्र एपस्टिन फाईल्स’चा टीझर रिलीज Top 10 News : 

राज्यभर गाजलेल्या भोंदू अशोक खरातवर आधारित असलेल्या महाराष्ट्र एपस्टिन फाईल्स या चित्रपटाचा टीझर रिलीज झाला आहे. त्यामध्ये रुपाली चाकणकरांच्या भूमिकेतील अभिनेत्री दिपाली सय्यद यांचा पहिला लूक समोर आला आहे. त्याचवेळी अशोक खरातच्या भूमिकेत नेमकं कोण आहे हे मात्र अद्याप स्पष्ट झालं नाही. ‘आता सगळं उघड होणार…!’ ही टॅगलाईन घेऊन येणारा हा चित्रपट 2 ऑक्टोबर 2026 रोजी प्रदर्शित होणार असून त्यामध्ये कोणकोणत्या गोष्टी उघड होणार याकडे सर्वाचं लक्ष लागलंय. या टीझरमध्ये अभिनेत्री या भोंदू खरातच्या डोक्यावर छत्री धरताना दिसत आहेत. अशोक खरातचा कारनामा उघडकीस आल्यानंतर रुपाली चाकणकरांचा एक फोटो सोशल मीडियावर चांगलाच व्हायरल झाला. त्यामध्ये रुपाली चाकणकर या अशोक खरातच्या डोक्यावर छत्री धरताना दिसत आहेत. नेमका हाच प्रसंग या टीझरमधून समोर आणण्यात आलाय.