राज्यात पावसाचा तांडव;
नाशिकसह अनेक जिल्ह्यांना रेड अलर्ट

Top 10 News: महाराष्ट्रात गेल्या तीन दिवसांपासून मुसळधार पावसाने थैमान घातले असून अनेक भागांतील जनजीवन विस्कळीत झाले आहे. अनेक जिल्ह्यांत पूरस्थिती निर्माण झाली असून नद्या-नाले दुथडी भरून वाहत आहेत. हवामान विभागाने पालघर, रायगड, नाशिक आणि पुणे घाटमाथ्यासाठी ‘रेड अलर्ट’, तर मुंबई आणि ठाण्यासाठी ‘ऑरेंज अलर्ट’ जारी केला आहे. नाशिक जिल्ह्यासह त्र्यंबकेश्वर, इगतपुरी आणि परिसरात संततधार पाऊस सुरू असून पुढील काही तासांत ढगफुटीसदृश पावसाची शक्यता व्यक्त करण्यात आली आहे. त्यामुळे नाशिकला रेड अलर्ट देण्यात आला आहे. तसेच भारतीय हवामान विभागाने सातारा जिल्ह्यातील घाटमाथा आणि दुर्गम भागात अतिमुसळधार पावसाचा इशारा दिला असून नागरिकांनी आवश्यक ती खबरदारी घेण्याचे आवाहन प्रशासनाने केले आहे.

महाराष्ट्रात मुसळधार पावसाचा कहर;
सहा जिल्ह्यांतील शाळा-महाविद्यालयांना आज सुट्टी

राज्यात गेल्या तीन दिवसांपासून मुसळधार पावसाने थैमान घातले असून अनेक ठिकाणी पूरस्थिती निर्माण झाली आहे. नद्या-नाले दुथडी भरून वाहत असल्याने जनजीवन विस्कळीत झाले आहे. या पार्श्वभूमीवर हवामान विभागाने पालघर, रायगड, नाशिक आणि पुणे घाटमाथ्यासाठी ‘रेड अलर्ट’, तर मुंबई आणि ठाण्यासाठी ‘ऑरेंज अलर्ट’ जारी केला आहे. विद्यार्थ्यांच्या सुरक्षिततेचा विचार करून जिल्हा प्रशासनाने मंगळवारी मुंबई, ठाणे, नवी मुंबई, पुणे, पिंपरी-चिंचवड, नाशिक, पालघर, रत्नागिरी, भिवंडी, कल्याण-डोंबिवली तसेच पुणे ग्रामीण भागातील सर्व शाळा आणि महाविद्यालयांना सुट्टी जाहीर केली आहे. शासकीय, खासगी आणि महानगरपालिका शाळांनाही हा आदेश लागू राहणार आहे.

अभिजीत दीपके यांची अण्णा हजारे यांच्यावर टीका;
‘म्हाताऱ्या लोकांनी सामाजिक-राजकीय जीवनातून निवृत्त व्हावे

‘कॉकरोच जनता पार्टी’चे संस्थापक अध्यक्ष अभिजीत दीपके यांनी ज्येष्ठ समाजसेवक अण्णा हजारे यांच्यावर टीका करत वादग्रस्त वक्तव्य केले आहे. म्हाताऱ्या लोकांनी विद्यार्थी आणि युवकांच्या भविष्याशी संबंधित निर्णय घेऊ नयेत. त्यांनी सामाजिक-राजकीय जीवनातून निवृत्त होऊन आश्रमात जावे, असे दीपके म्हणाले. छत्रपती संभाजीनगर येथे आयोजित पत्रकार परिषदेत ते बोलत होते. यावेळी ‘अण्णा हजारे यांची भेट घेणार का?’ असा प्रश्न विचारण्यात आला असता, आपण अण्णा हजारे किंवा इतर कोणाचीही भेट घेणार नसल्याचे त्यांनी स्पष्ट केले. त्यांच्या या वक्तव्यामुळे नव्या राजकीय वादाला तोंड फुटण्याची शक्यता व्यक्त केली जात आहे.

मुंबई-पुणे मिसिंग लिंकवर दरड;
‘दैवी प्रकोप’ म्हणत MSRDCची भूमिका

मुंबई-पुणे द्रुतगती महामार्गावरील ७,१८० कोटी रुपयांच्या मिसिंग लिंक प्रकल्पावर मुसळधार पावसामुळे दरड कोसळल्याने सरकारच्या सुरक्षिततेच्या दाव्यावर प्रश्नचिन्ह निर्माण झालेत. अवघ्या नऊ आठवड्यांपूर्वी वाहतुकीसाठी खुला झालेल्या या मार्गावर दरड कोसळल्याने काही काळ वाहतूक ठप्प झाली आणि मुंबई-पुणे संपर्क विस्कळीत झाला. या घटनेनंतर महाराष्ट्र राज्य रस्ते विकास महामंडळाने याला “दैवी प्रकोप” असं म्हटलंय. MSRDCचे उपाध्यक्ष अनिलकुमार गायकवाड यांनी, “यात कंत्राटदाराची कोणतीही चूक नसून हा निसर्गाचा परिणाम आहे,” असं त्यांनी म्हटलंय. दरडी रोखण्यासाठी आवश्यक उपाययोजना आणि डिझाइन करण्यात आले होते, मात्र त्यांनाही मर्यादा असल्याचे गायकवाड यांनी स्पष्ट केलंय.

राजभवनात खळबळ
हाय सिक्युरिटी असलेल्या राजभवनात गोळीबार Top 10 News: 

मुंबईतील मलबार हिल परिसरातील अतिसुरक्षित राजभवनात धक्कादायक घटना घडलीय. राजभवनाच्या सुरक्षेसाठी तैनात असलेल्या राज्य राखीव पोलीस दलाच्या जवानाने ड्युटीदरम्यान स्वतःच्या सर्व्हिस रायफलने स्वतःवर गोळी झाडून आत्महत्या केली. या घटनेमुळे पोलीस आणि प्रशासनात खळबळ उडाली आहे. मृत जवानाचे नाव कौस्तुभ सांगळे असून ते पोलीस अंमलदार म्हणून कार्यरत होते. ते एसआरपीएफ ग्रुप 16, कोल्हापूर येथील तुकडीचे जवान होते आणि सध्या राजभवनाच्या सुरक्षेची जबाबदारी सांभाळत होते. त्यांनी हे टोकाचे पाऊल का उचलले, याचे कारण अद्याप स्पष्ट झालेले नसून पोलिसांनी घटनेचा तपास सुरू केला आहे.

LPG पुरवठ्यासाठी सरकारचा नवा प्लॅन;
अमेरिकेकडून दुप्पट आयात करण्याची तयारी

घरगुती एलपीजी गॅसचा पुरवठा सुरळीत ठेवण्यासाठी केंद्र सरकारने महत्त्वाचा निर्णय घेतला आहे. भविष्यात गॅस टंचाई टाळण्यासाठी भारत आता अमेरिकेकडून एलपीजीची आयात दुप्पट करण्याच्या तयारीत आहे. इराण-अमेरिका संघर्षादरम्यान आखाती देशांतील पुरवठ्यावर परिणाम झाल्याने भारताने आयातीचे स्रोत विविध करण्याचा निर्णय घेतला आहे. त्यानुसार सरकारी तेल कंपन्या अमेरिकेकडून दरवर्षी सुमारे २२ लाख टन एलपीजी आयात वाढवण्याची योजना आखत आहेत. भारत आणि अमेरिका यांच्यात नोव्हेंबर २०२५ मध्ये झालेल्या करारानुसार २०२६ मध्ये भारताच्या एकूण एलपीजी गरजेपैकी सुमारे १० टक्के पुरवठा अमेरिकेकडून होणार होता. आता हे प्रमाण वाढवून आखाती देशांवरील अवलंबित्व कमी करण्याचा सरकारचा प्रयत्न आहे.

गुजरात-मध्य प्रदेशात ATSची मोठी कारवाई;
जैश-ए-मोहम्मदशी संबंधित ८ जण अटकेत

गुजरात आणि मध्य प्रदेशात दहशतवादविरोधी पथकाने संयुक्त कारवाई करत ‘जैश-ए-मोहम्मद’ या दहशतवादी संघटनेशी संबंधित असल्याचा संशय असलेल्या आठ जणांना अटक केली आहे. यापैकी सहा जण गुजरातमधील पालनपूर तालुक्यातील भागल गावचे रहिवासी आहेत. गुजरात आणि मध्य प्रदेशातील विविध ठिकाणी तपास आणि छापेमारीनंतर ही कारवाई करण्यात आली. प्राथमिक तपासानुसार, आरोपी गुजरातमध्ये दहशतवादी कारवायांसाठी नेटवर्क उभारण्याच्या प्रयत्नात होते. या वेळेवर झालेल्या कारवाईमुळे संभाव्य मोठा दहशतवादी कट उधळल्याचा दावा तपास यंत्रणांनी केला आहे. अटक करण्यात आलेले आरोपी नेमके कोणाच्या संपर्कात होते आणि त्यांच्या नेटवर्कमध्ये आणखी कोणाचा सहभाग आहे का, याचा ATSकडून सखोल तपास सुरू आहे.

ढाक्यात भारताचा चुकीचा नकाशा दाखवल्याने वाद;
भारतीय अधिकाऱ्यांचा तीव्र विरोध

बांगलादेशची राजधानी ढाका येथे आयोजित एका आंतरराष्ट्रीय परिसंवादात भारताचा चुकीचा नकाशा दाखवल्याने वाद निर्माण झाला. सादरीकरणादरम्यान जम्मू-काश्मीरला पाकिस्तानचा भाग म्हणून दर्शविण्यात आले. यावर कार्यक्रमाला उपस्थित असलेल्या भारतीय उच्चायुक्तालयाच्या द्वितीय सचिव पूजा कुमारी झा यांनी तात्काळ आक्षेप घेत, जम्मू-काश्मीर हा भारताचा अविभाज्य भाग असल्याचे स्पष्ट केले. या निषेधानंतर प्रमुख वक्ते आणि बांगलादेशचे माजी राजदूत तारिक ए. करीम यांनी नकाशा केवळ प्रतीकात्मक स्वरूपात वापरल्याचे स्पष्टीकरण दिले. भारताने या घटनेची गंभीर दखल घेतली असून आंतरराष्ट्रीय स्तरावर चुकीच्या नकाशांविरोधात सतर्क भूमिका कायम ठेवली आहे.

रोनाल्डोचे विश्वचषक स्वप्न भंग;
स्पेनचा पोर्तुगालवर 1-0 ने विजय

फिफा विश्वचषकात ख्रिस्तियानो रोनाल्डोचे विश्वविजेतेपदाचे स्वप्न अपूर्णच राहिले. स्पेनने अतिरिक्त वेळेत केलेल्या निर्णायक गोलच्या जोरावर पोर्तुगालवर 1-0 असा थरारक विजय मिळवला. सामन्यात बदली खेळाडू म्हणून मैदानात उतरलेल्या मायकेल मेरिनोने विजयी गोल करत स्पेनला ऐतिहासिक विजय मिळवून दिला. संपूर्ण सामन्यात स्पेनने आक्रमक खेळ केला, मात्र पोर्तुगालचा गोलरक्षक डिओगो कोस्टाने अनेक अप्रतिम बचाव करत संघाला शेवटपर्यंत लढतीत ठेवले. अखेरच्या क्षणी पोर्तुगालने बरोबरीसाठी सर्वतोपरी प्रयत्न केले, मात्र स्पेनच्या बचावफळीने कोणतीही संधी दिली नाही. या पराभवानंतर रोनाल्डोला मैदानावर अश्रू अनावर झाले आणि त्यांच्या विश्वचषक कारकिर्दीचा भावनिक शेवट झाला.

गौरव मोरेच्या नव्या घरी जॉनी लिव्हर यांची खास भेट
पाया पडून घेतला आशीर्वाद Top 10 News: 

‘महाराष्ट्राची हास्यजत्रा’मधून लोकप्रिय झालेला अभिनेता गौरव मोरे सध्या यशाच्या शिखरावर आहे. नुकतेच मुंबईतील पवईत नव्या घरात गृहप्रवेश केल्यानंतर त्याच्या आयुष्यात आणखी एक खास क्षण आला. बॉलिवूडचे ज्येष्ठ अभिनेते आणि प्रसिद्ध विनोदी कलाकार जॉनी लिव्हर यांनी गौरवच्या नव्या घरी अचानक भेट दिली. त्यावेळी गौरवने जॉनी लिव्हर यांच्या पायांना स्पर्श करून आशीर्वाद घेतला. या भावनिक भेटीचा व्हिडिओ गौरवने इन्स्टाग्रामवर शेअर केला असून तो सोशल मीडियावर मोठ्या प्रमाणात व्हायरल होत आहे. चाहत्यांनी व्हिडिओवर लाइक्स आणि कमेंट्सचा वर्षाव करत गौरवचे कौतुक केले आहे.